Read kirikeni 1 Samụẹl 27 Bible Online

1 Samụẹl 27 - kirikeni bible

1 Samụẹl 27

¹Devid ḅe ọ̀ ḅịpị se ọ̀ ḅụ fiemamẹ, “Ma enema ḅụ gbọrị ene Sọl ḅe ori ị̀ ḅaaḅịa. Amịẹtẹịnḅịaye anị mangịso Filistia mun-ẹ. Anịsịkị Sọl ḅe ọ̀ ḅarị ị̀ ḍọkị ẹkẹ Izrẹl mị ḅie, se ye pịkị ị̀ la ẹkẹ.”

²Anị Devid ḅe na oria owuapụ ẹndẹ oyiasi fịnjịma na anị kirikiri saḅa Ekish Meọk yaḅe damamunye-ẹ, Gat amanyanaḅọ ḅe.

³Devid ḅe na oria owuapụma na, inia furoma na, anịju Gat ḅie angamẹ. Devid ḅe oria mama eremeni ma ini ori na omi-ẹ, Ahinoam Jezriẹlḅọ ma na, pịkị Abigẹl, Nebal fịsaḅọ ḅe tarọ Kamẹlḅọ ma na.

⁴Devid ḅe ọ̀ mangịso Gat munsam Sọl ḅe nwọ naa sịkị, ọ̀ ḍọkị mị ḅụ ọ̀ ḅarasinmẹ.

⁵Devid ḅe nwọse Ekish ḅe ḅẹmẹ, “Nemikase ị́rị́ ị̀ya ikiaḅọ-ẹ ḅẹḅẹ, àrị angaḅịa gbọrị kala ama se ị̀ pịrị. À gose ị́rị́na tịḅịda opuama mị ḅie anga gbolomaḅịaye ofori-ẹ, ị̀ nyanaḅọ.”

⁶Anịẹrẹchị Ekish ḅe Ziklag ama mị se ọ̀ pịrịmẹ, mịn mị fiemẹ na Ziklag mị sime Juda amanyanapụma pịrịmẹ ikpuru kụra ḅie ngịsị.

⁷Devid ḅe Filistia mị ḅie ori anga mun gbọrị kụra na inein-akalụ nwọ lamẹ.

⁸Anịsịkị ḅụ Devid ḅe na oria owuapụma na ini owu seni anị pẹkẹrẹ ḅụ anga ḅọlọ sịkị lasa Gẹshọapụ ma na, Gazaị apụma na pịkị Amalẹk apụma na pakapakamẹ, ori ọḅụ owu se inia amama paka ọkịmun Shọ mị la pịkị kan mun Ijipt mị sọ lamẹ,

⁹owuapụma na pịkị eremeni mamgba na ini ini ḅaafama, pịkị ananama na, nambuloma na, yepụra asụnma na, ike-nambuloma na, pịkị ḅiriaye ma sọnị nwọ ọfọịn somẹ. Anịsịkị ò vinpịkị Ekish ḅe damaḅoḅịa,

¹⁰se ori ò gbelaḅịa, “Ndeju ị́ mun ọḅụ owu mị paka mị sịkị mị ḅụ?” se Devid ḅe ò ḍuko ọ̀ pịrịḅịa na, Juda mị ḅụ chuku daọrụ mị-ẹ, anịkanịka ò ḍukoḅịa na Jiramịẹl pẹkẹrẹ mị-ẹ, anịkanịka Kenaị apụma anga sime pẹkẹrẹ mị-ẹ.

¹¹Devid ḅe, tomoniḅọ goyegoye ọ̀ ḅaafamamẹ, owuapụ na eremeni na mịẹsosịkị gbọrịḅọ sọnị somun Gat mị ḅie ori na oria owuapụma na mịẹye mị ḍuko ẹka ḅara. Mị Devid ḅe Filistia mị ḅie anga sịkị mgba ò mịẹye-ẹ.

¹²Ọkụma Ekish ḅe ò kuḅie se Devid ḅe ḅụgbanamẹ, ọ̀ ḅịpị seni ọḅụ fiema ḅụ nwọ ḅẹmẹ, “Oria ama Izrẹlapụma ini opuma kuḅie si nyana ọ̀ pịrịmẹ anịẹrẹchị oria ḍumo ene mamgba ḅie ọ̀ fịrịnwẹngị ị̀ pịrịḅịa.”