Read kirikeni 1 Samụẹl 4 Bible Online

1 Samụẹl 4 - kirikeni bible

1 Samụẹl 4

¹Gbọrị ene Filistia apụma ini koḅirimamẹ mun Izrẹl mị na ọmụgbin ḅịa ẹrẹchị, anịgose Izrẹlapụma ini pakamunmẹ ini na owusọḅịa ẹrẹchị. Izrẹlapụma Ebeniza mị nyọ ḅụ ini inia ikowarịma pike simemẹ, se Filistia apụma pịkị Efẹk mị nyọ ḅụ simemẹ.

²Filistia apụma owu mị pakamẹ, owu mị ḅo kụrọ sịkị ini Izrẹlapụma nẹngịmamẹ, se ọmụ mị ḅie kịnị-a oyi-a ẹndẹ nwọ ḅaamẹ.

³Fịkọnmapụ ma vinpịkị somun ini ikowarịma pike sime nyọ mị lasịkị, Izrẹl mị ḅie sẹnịapụma nwọ ḅẹmẹ, “Cheye ẹrẹchị Nyanaḅọ Ḅe ọ̀ wa wẹrịso Filistia apụma pịrị mịmgba ḅụ se ini wa nẹngịma? Ó ye wa mun Shịlo mị ḅie Nyanaḅọ Ḅe Ọḅọkụ Igbe mị ọkịḅo, mịẹse ò mine na mun se mine na tarakapụma ḅara ḅie wa ḍụaḅịa ọkụ.”

⁴Anị ini okumun-apụ seni Shịlo fịrịma se ini mun Ọḅọkụ Igbe mị ọkịḅoye-ẹ, anị Kụrọmamgba Nyanaḅọ Ḅe tọrụkuḅu sime tẹmẹ koroma enjẹlapụma ogboku sime ye mị. Ịlaị mama owuapụ awọma Hofnaị ḅe na Fịnehas ḅe na Ọḅọkụ Igbe mị na ḅomẹ.

⁵Ọḅọkụ Igbe mị ḅo lasịkị, Izrẹlapụma ḅieḅẹlẹ ḅụ oloku so ọkụma kịrị mị mgba jikemẹ.

⁶Filistia apụma oloku tịḅịḅie mị naa se nwọ ḅẹmẹ, “Ó poki Hibru apụma ikowarịma pike sime nyọ mị ḅụ oloku tịḅịḅie ma fiearị ọkụ mị! Nde anị fiearịye?” Nyanaḅọ Ḅe Ọḅọkụ Igbe mị ḅo Hibru apụma ikowarịma pike sime nyọ mị lasam nwọḅẹye mị ini nwọ na sịkị,

⁷inia ḅalafamẹ, se ini nwọ ḅẹmẹ, “oru ini ikowarịma pike sime nyọ ḅụ sọḅosam! Wa fasam! Jịn sịkị nwọ simeye mịnaḅụ ma pakakẹ!

⁸Tụḅọ ineda àrị kụrọ oru ma ḅara ḅie wa ḍụaḅọrọmaḅe? Àrị anị onwun ele mị ḅieḅụ Ijipt apụma ḅaa oru ma-ẹ!

⁹Ó kuḅie kụrọma, Filistia apụ! Ọ́ kụrọma owu mị sọ, anịka wa omoniapụ sọ Hibru apụma pịrịḅịa, anị ini omoniapụ sọ wa pịrị ḅọrọsa ḅara mị. Anịẹrẹchị ọ́ kụrọma owu mị sọ!”

¹⁰Filistia apụma ini gagama Izrẹlapụma na owu mị sọ se ini Izrẹlapụma nẹngịmamẹ, se ini mangị so inia amama mun mẹ. Ini opuma ini ḅaamẹ: Izrẹl owunima ḅụ kịnị-a tẹrẹ-a poku na jie ẹndẹ ini nwọ ḅaamẹ.

¹¹Tamụnọ Ọḅọkụ Igbe mị ini kụrọḅara se anị ọkị somẹ, pịkị Ịlaị owuapụ awọ, Hofnaị ḅe na Fịnehas ḅe na ini ini ḅaamẹ.

¹²Bẹnjamin sẹ mị ḅie gbọrịḅọ ọmụgbin ele mị ḅie ngịsị sakị mangị so mun anị gbọrị ene ḅụ Shịlo mị lamẹ. Se oria kururu mị ḍiepakụma ḅụ, oria ḅụchụayema ọ̀ kanmẹ pịkị fọn se ọ̀ tịḅị saramẹ.

¹³Ịlaị ḅe ò kuḅie opuma chịẹ-chịẹ-chịẹmẹ Ọḅọkụ Igbe mị gose, ori ịkasịe ọgọnọ ateli aka ḅụ sime se nyọ ḍikiaḅẹ. Tomoniḅọ ḅe ḅẹrẹ mị ḍuko bebe ama mị mgba kelemamẹ, se ọrụḅọḅọ ḅalafa ḅụ oloku owuaḅẹ.

¹⁴Ịlaị ḅe owutịḅịḅie mị fiearị ọkụ naa sịkị, ò gbelamẹ, “Nde ama mị gose nwọse fiearịye?” Tomoniḅọ ḅe ò be Ịlaị ḅe damaḅomẹ ḅẹrẹ mị ḍuko ọ̀ pịrịḅịa ẹrẹchị.

¹⁵(Mịọkụ Ịlaị ḅe ò ḅo maịnfa kụra sọnọasi lasam, ọ̀ tọrụmgbọlụma pịkị ḅara iḅiọkụma nyọ ọrịkẹ.)

¹⁶Tomoniḅọ ḅe nwọ ḅẹmẹ, “Ọmụ mị ḅie à mangị soḅomẹ se mịmgba ḅụ à mangị ḅo mịanga lamẹ.” Ịlaị ḅe nwọse ò gbelamẹ, “Cheye paka, ị̀ya tọkụ?”

¹⁷Okuḅoḅọ ḅe nwọse ọ̀ pẹkẹrẹmẹ, “Izrẹlapụma, ini mangị Filistia apụma pịrịmẹ, anị opuma ḅalafamamẹ, ini wa nẹngịma ḅara mị! Anị mị sikima ọkụma ị́ya owuapụ awọ Hofnaị ḅe na Fịnehas ḅe na ini ini ḅaamẹ, pịkị Tamụnọ Ọḅọkụ Igbe mị sọnị ini ọkịsomẹ!”

¹⁸Tomoniḅọ ḅe Ọḅọkụ Igbe mị go kirikiri Ịlaị ḅe ò sime ịkasịe ọgọnọ vuma ọḅụda se ḅịkịkoromẹ onu ḅọkọ mị aka sịkị ḅụ, ori opuma olomu pịkị ḍụḅa so ọkụma ọ̀ kọn ḅịkị mị ọ̀ kọngọ anyịma se ọ̀ fị̀mẹ. Kụra mesi ọ̀ nwọse tịḅịnịḅọ sọ Izrẹl mị pịrịmẹ.

¹⁹Ịlaị ya, Fịnehas ta ma á simekọnmẹ, á yiḅịa sịkị mị pịkị kpekisam. Á nwọ naa na Tamụnọ Ọḅọkụ Igbe mị ini kụrọḅara se anị ọkịsosam, dewu ḍaḅe na pịkị dewu ḅe na pịkị fị̀sam nwọḅẹ kirikiri anị á jike se yiye-ẹ.

²⁰Á fịarị sịkị ḅụ, ḅarachụa á pịrị sime ịrịamaịnma eremeni ma nwọse á ḅẹmẹ, “Kuḅie kụrọma! Ị́ owutọkụ nyanasam!” Ọkụma á pokikẹ á pịkị ye pẹkẹrẹkẹ.

²¹Á nwọse tọkụ ḅe chịnmẹ Ikabọd, mịn mị fiemẹ, “Tamụnọ Ḅe boma mị Izrẹl mị ḅie sosam”—anị ini kụrọḅara se Ọḅọkụ Igbe mị ọkịsoye mị na pịkị dewu ḍaḅe na dewu ḅe na kọn fị mị gose.

²²“Tamụnọ Ḅe boma mị Izrẹl mị ḅie sosam,” á nwọ ḅẹmẹ, “anịatịḅị Tamụnọ Ọḅọkụ Igbe mị ini kụrọḅara se anị ọkịsosam.”