Read kirikeni 1 Samụẹl 5 Bible Online

1 Samụẹl 5 - kirikeni bible

1 Samụẹl 5

¹Filistia apụma kụrọḅara se Ọḅọkụ Igbe mị ọkịso sịkị, ini Ebeniza mị ḅie anị deki so inia opuama Ashdọd mị mun mẹ,

²ini anị deki mun inia oru Degọn mị warị ḅie koromamẹ, se anị seni lụgụ mị anga sịkị gbanamẹ.

³Anịḅe eneḅa dede funfun ḅie Ashdọd apụma ini ọrịmẹ na Degọn lụgụ mị ḅịkị kiri iḅo sime waraḅẹ, Nyanaḅọ Ḅe Ọḅọkụ Igbe mị tọrọkọ ḅụ. Anị ini anị deki anịa kiri ḅụ chịẹma koromaye-ẹ.

⁴Anịḅe jịn eneḅa dede funfun ḅie ini ọrịmẹ na lụgụ mị anị pịkịna ḅịkị korosam Ọḅọkụ Igbe mị tọrọkọ ḅụ. Mị sịkị ḅụ anịa tịḅị na, pịkị anịa mama ḅarama na anyị ḅọkọ mị nyọ ḅụ sara waraḅẹ, oju mị kẹngẹ kpọngọlọma simemẹ.

⁵(Anịẹrẹchị ọkịḅo mịmgba la sọnị Degọn orualapụma na pịkị Ashdọd ḅie anị tẹkẹarị apụma na gose ḅụọ se anịnyọ mị ọgọnọ nwẹngị nwẹngịka se anị saḅa korokoroye-ẹ.)

⁶Nyanaḅọ Ḅe ọ̀ ḅụakụma ḅara se fomuḅara se Ashdọd apụma pịrị pịkị inia ḅalafamamẹ. Ò fomuḅara se ini na pịkị inia eke mị ḅụ anga apụma na pịrịmẹ se mịẹse ini oju ḅụ pẹkẹrẹ-pẹkẹrẹ ḅụ foin obi kọnmẹ.

⁷Pakarịye mị ini nwọ ọrị sịkị, ini nwọ ḅẹmẹ, “Izrẹl Tamụnọ Ḅe ò fomuḅara se mine na mịna oru Degọn mị na pịrịaḅẹ. Wa ḅarị ḅereni ẹkẹ Ọḅọkụ Igbe mị pa mịanga ḅụ sime tọrọkọ mun.”

⁸Anị ini okumun-apụ ma fịrịma Filistia sọnọ amanyanapụ mamgba chịnḅo koḅirima se ini gbelaye-ẹ, “Izrẹl Tamụnọ Ọḅọkụ Igbe mị nde wa anị na kọnḅịa nwẹngị?” Ini nwọse ini pẹkẹrẹmẹ, “Ómine anị ọkị saḅama mun Gat mị ḅie ḅụ wẹrị,” anị pịkị jịn Filistia apụ opuama-ẹ.

⁹Ọkụma anị ḅo anịju lasịkị, Nyanaḅọ Ḅe ò fomuḅara se opuama mị pịrị pịkị opu ḅalafa se ini pịrịmẹ. Ojuḅụ pẹkẹrẹ-pẹkẹrẹ foin obi ḅe fomuḅara ọ̀ nwọse ini pịrịmẹ se tomoni mamgba anị kọnmẹ opuama mị ḅieḅụ, ire na asẹ na pịkị olomuapụ na.

¹⁰Anị ini Ọḅọkụ Igbe mị seni Ẹkrọn mị fịrịmaye-ẹ, anị pịkị jịn Filistia apụ opuama-ẹ; ọkụma anị ḅo anịju lasịkị, tomonima oloku se nwọ ḅẹmẹ, “Ini Izrẹl Tamụnọ Ọḅọkụ Igbe mị se mịanga ḅosam, se mine mgba ḅaafamaḅịa ẹrẹchị!”

¹¹Anị ini Filistia amanyanapụ mamgba fịrịma ḅo se ini ḅẹye-ẹ, “Ómine Izrẹl Ọḅọkụ Igbe mị se mun anịa kiri ḅụ koroma, mịẹse anị mine na mịna furoma na ḅaa ẹka ḅara.” Bebe opuama mị ḅie mgba tẹmẹtaịntaịn simemẹ anịatịḅị Tamụnọ Ḅe ori opuma ḅụakụma fomuḅara se ini pịrịaḅẹ.

¹²Ini fịka apụma sọnị foin obi mị kọnmẹ se tomonima ini oloku owu inia oru ma chịnmẹ ḅarachụa ini pịrịḅịa ẹrẹchị.