Read kirikeni 1 Samụẹl 7 Bible Online

1 Samụẹl 7 - kirikeni bible

1 Samụẹl 7

¹Anịẹrẹchị Kiriat Jearim apụma ini Nyanaḅọ Ḅe Ọḅọkụ Igbe mị ọkị se anị deki mun Abinadab nwọ chịn gbọrị owuḅọ warị wẹrịmẹ, anị chịngị ọgọnọ angaḅọ ḅe. Ini yayo Ẹleaza ḅe tẹmẹ anga ḅụ ọ̀ mịẹ fịafịamamẹ, ori anị ḍikiḍikiḅịa ẹrẹchị.

²Nyanaḅọ Ḅe Ọḅọkụ Igbe mị Kiriat Jearim mị ḅieḅụ anị sime mun ḅọlọ sịkị lamẹ, si kụra pembeye. Mịn sịkị mị ḅụ bebe Izrẹlapụ mamgba owu Nyanaḅọ Ḅe pịrịmẹ ọ̀ ḅarachụa ini pịrịḅịa ọkụ.

³Anịgose Samụẹl ḅe nwọse Izrẹlapụma ḅẹmẹ, “Ó nemikase ọ́mịna kuḅie mgba se vinpịkị Nyanaḅọ Ḅe daḅịa ḅẹḅẹ, anịọkụma, jịn sẹ apụ oru ma na pịkị Astate eremeni oru lụgụ mamgba ómine àrị wẹrịsoḅịa. Ómine okorona okorona tẹmẹ anga ḅụ ọ́mịna ḅụ mịẹ fịafịama Nyanaḅọ Ḅe pịrị, se ori kẹngẹ nwọ tẹkẹmẹ ḅẹḅẹ, Filistia apụma ḅara ḅie ori ọ́ ḍụapakụmaḅịa.”

⁴Anịẹrẹchị Izrẹlapụma inia Beal oru ma na Astate oru ma na wẹrịso se Nyanaḅọ Ḅe kẹngẹ nwọ tẹkẹmẹ.

⁵Anị Samụẹl ḅe bebe Izrẹlapụ mamgba chịnye-ẹ na ini mun Mizpa ḅie koḅirima, se nwọse ini ḅẹmẹ, “Anịju ḅụ à Nyanaḅọ Ḅe tẹkẹ ọ́ pịrịḅịa.”

⁶Anị inimgba mun Mizpa mị ḅie ḅụ koḅirimaye-ẹ. Ini mengi ḍu sara Nyanaḅọ Ḅe pịrịmẹ agbamịẹ ḅaraḅụ, ini bebe ene mị mgba se ḅurukụnma mẹ. Ini nwọ ḅẹmẹ, “Wa si se Nyanaḅọ Ḅe mịẹsam.” (Mizpa mị ḅie anị Samụẹl ḅe ḅẹrẹfama Izrẹlapụma pịrịye-ẹ inia ogboku sime ịgbanịaye ma ḅụ.)

⁷Izrẹlapụma ini Mizpa ḅie koḅirimasam Filistia apụma nwọ naa sịkị, sọnọ-a Filistia amanyanapụma na inia owunima na mun owu se ini paka-omunmẹ. Izrẹlapụma iriaḅa mị naa sịkị inia ḅalafamẹ,

⁸ini nwọse Samụẹl ḅe ḅẹmẹ, “Nyanaḅọ mịna Tamụnọ Ḅe tẹkẹ ḅụ sime se ò Filistia apụma ḅara ḅie wa ḍụaḅọrọma.”

⁹Samụẹl ḅe gbọrị anana tọkụ ọ̀ nwọ ḅaa, se orimgba se dọkịma agbamịẹ Nyanaḅọ Ḅe pịrịmẹ. Anịsịkị ọ̀ Nyanaḅọ Ḅe tẹkẹmẹ na ọ̀ ḅarachụa Izrẹl mị pịrị, se Nyanaḅọ Ḅe pịkị oria tẹkẹ mị pẹkẹrẹmẹ.

¹⁰Samụẹl ḅe dọkịma agba mị mịẹarị sịkị ḅụ, Filistia apụma owuse ini pakaḅịa ẹrẹchị so ini damamunmẹ; ọkụma anịsịkị mị ḅụ Nyanaḅọ Ḅe so mị ḅieḅụ wẹrị soalagba tẹịn ini dapakamẹ. Ḅarị ngịsị mịẹḅịa ọkụ nemika ḅụ, ini tẹmẹ taịntaịn ḅụ mangịsomẹ.

¹¹Izrẹlapụma ini Mizpa mị ḅie pakaḅo se Filistia apụma ḍukomẹ. Kalaye kọnmẹ ini mun mgbọkụ Bẹtka mị lasam, se ateli mị ḅie ini ini ḅaama mun mẹ.

¹²Samụẹl ḅe gbọrị ḍụparị ọ̀ nwọ deki, se anị seni Mizpa mị na Shẹn mị na ogboku chịẹmamẹ se nwọ ḅẹmẹ, “Nyanaḅọ Ḅe wa kọn nwẹngị mamgba ḅụ ọ̀ ḅarachụa wa pịrịsam”—se ọ̀ nwọse anị chịnmẹ “Ḅarachụa Ḍụparị.”

¹³Anịẹrẹchị Filistia apụma ọmụ inia ḅarasimẹ, se Nyanaḅọ Ḅe ngịsị ò ḅereni ini pịrịkẹ ini Izrẹl eke mị ḅụ owu paka Samụẹl ḅe lasịkị mị mgba.

¹⁴Filistia apụma, Ẹkrọn na Gat na ogboku ọkịsa opuama mamgba àrị pịkịmaḅo Izrẹl mị pịrịmẹ, anịẹrẹchị Izrẹl mị pịkị kpoto anị nyana eke mamgba nwọ ọkị famamẹ. Se deinma pịkị Izrẹlapụma na Kenan apụma na ogboku simemẹ.

¹⁵Samụẹl ḅe ọ̀ ḅẹrẹtọn Izrẹl mị pịrịmẹ oria ḍumo ene mamgba ḅụ.

¹⁶Kụra goyegoye ò so Bẹtẹl mị na, Gilgalị mị na, pịkị Mizpa mị na nwẹngị kelema kelemamẹ, se ma sẹma ḅụ ini nyana ịgbanịaye ma ọ̀ kọn fama ini pịrịpịrịmẹ.

¹⁷Anịsịkị re mị ò somun Rema oria ama ḅie simesimeye-ẹ; anịju ḅụ sọnị ḅẹrẹkọn fịrị ọ̀ pịkị nwọ nwẹngị nwẹngịmẹ. Rema mị ḅieḅụ ori agbamịẹ ẹbẹ pike chịẹma Nyanaḅọ Ḅe pịrịmẹ.