Read kirikeni 1 Samụẹl 9 Bible Online

1 Samụẹl 9 - kirikeni bible

1 Samụẹl 9

¹Gbọrị pẹrẹ pịkị ḅịpịḅẹrẹ la owuḅọ simemẹ Kish anị oria ẹrẹ-ẹ, Bẹnjamin sẹ ḅie ḅọ-ẹ, Ebiẹl ḅe yayo-ẹ se oria opu ḍaḅọ anị Ziro ḅe-ẹ, Bikorat furo ḅie ḅọ-ẹ, Afaịya sẹ mị ḅụ gbọrị pẹkẹrẹ ḅie.

²Gbọrị owutọkụ ọ̀ nwọ nyanamẹ oria ẹrẹ anị Sọl, ḍikitọrụgbẹịn asẹmẹnị ḅọ-ẹ. Sọl ḅe chịẹ tịḅị ḅụ ò geletẹịn ḅẹḅọ ḅẹḅọ nẹngịmẹ Izrẹl mị ḅieḅụ, ori pịkị ḍikitọrụgbẹịntẹịnmẹ.

³Kish ḅe oria yepụra asụnma ḅụ daye ateli irimẹ, anị ọ̀ nwọse Sọl ḅe ḅẹye-ẹ, “Fịrịnwẹngịapụ ma ḅụ gbọrịḅọ ọkị ị́ ḅụ chụa se mun yepụra asụnma ḍọkị.”

⁴Ifrem chịngị ọgọnọ sẹ mị ini nwọ ḅọrọ kelema pịkị Shealisha eke mị mgba ḅọrọ kelemamẹ, ọkụma ini àrị ọrịkẹ; anị ini pa nwẹngịma mun Shealim eke mị kelemaye-ẹ, ọkụma anịju yepụra asụnma àrị ofori-ẹ. Anịsịkị ini so mun Bẹnjamin pẹkẹrẹ mị ḅọrọ kelemamẹ, ọkụma anịsọ ini àrị ọrịkẹ.

⁵Ini ḅo Zọf eke mị lasịkị, Sọl ḅe nwọse oria fịrịnwẹngịḅọ ḅe ḅẹmẹ, “Ye wa vinpịkị so ama mun, anịka ọkụma ị̀ ḍaḅe ọ̀ ḅarị yepụra asụnma koroma kọn ẹkẹ, ọ̀ sakị mịna koroma kọnḅịa.”

⁶Fịrịnwẹngịḅọ ḅe nwọse ọ̀ pẹkẹrẹmẹ, “Matịtẹ! Mịn ama mị ḅie gbọrị Tamụnọ fịrịnwẹngịḅọ omi-ẹ ini opuma osi se pịrịḅọ, anịatịḅị ò ḍukoye goyegoye kọkọma mịẹmịẹmẹ. Ye wa ọ̀ damamun, sosi ori ineda wa yepụra asụnma ọrịḅịa nyọ nwọ ḍuko wa pịrịḅịa.”

⁷“Wa nemikase ọ̀ damamun ọkụma, nde wa seni ḍie ọ̀ pịrịḅịaye?” Sọl ḅe nwọse ò gbelamẹ. “Mịna akpa ma ḅie fịye ḅarị kọnkẹ, wa pịkị se ḍie ọ̀ pịrịḅịa gbọrịye sọnị wa nyanakẹ, wa nyana?”

⁸Fịrịnwẹngịḅọ ḅe nwọse Sọl ḅe pẹkẹrẹmẹ, “Gbọrị kala seleḅa igbiki à nwọ nyana waraḅẹ. Àrị ineda anị seni ọ̀ pịrịḅịa, anịsịkị ori ineda wa mun àrị ḍọkịḅoḅịa nyọ mị ḍuko wa pịrịḅịa.”

⁹Sọl ḅe nwọse ọ̀ pẹkẹrẹmẹ, “Iḅiye ị́ nwọ koroma ḅomẹ! Tarị wa mun.” Anị ini so Tamụnọ fịrịnwẹngịḅọ ḅe anga ama mị mun ye-ẹ. Ini chịngị mị tanjị iwo ama mị mun-arị ogbo, ḅo mengi ḍu-eḅoarị eremeni-awọ ini na ịrịamẹ. Ini nwọse eremeni-awọ ma gbelamẹ, “Yeọrịḅọ ḅe ama mị ḅie ori omi?” (Anịsịkị mị ḅụ ini se ịkịankoroḅọ chịn arịye anị yeọrịḅọ, anịẹrẹchị tomoniḅọ yese Tamụnọ Ḅe gbela ḍọkịmẹ ḅẹḅẹ, ọ̀ nwọ ḅẹḅịa, “Tarị wa yeọrịḅọ ḅe damamun.”)

¹²“Iin, ori omi-ẹ,” eremeni-awọ ma nwọse ini pẹkẹrẹmẹ. “Ḍiki, ọ́mịna tọrọkọ ò mun aḅẹ. Ó nemikase ḅụọsarama ọkụma ó mun ọ̀ laḅịa. Ó mun ama mịn ḅie sọ kirikiri ómine ori ọrịḅịa. Mịmgba ò ḅo ama lamẹ anịatịḅị tomonima ini mun agbamịẹḅịa agbamịẹ ẹbẹ mị ọgọnọ chịngị mị ọgọnọ ḅụ. Ma ò mun laka simeogbo ini chịnḅịpị se pịrị apụma ini sakị yefị ẹkẹ, anịatịḅị ò tatarị agba mị ḅẹlẹmaḅịa. Ó nemikase mịọkụ mun ọkụma, ómine ori ọrịḅịa ma ọ̀ chịngị mị tanjị iwo mun yefịka simeogbo.”

¹⁴Anị Sọl ḅe na oria fịrịnwẹngịḅọ ḅe na so ama mị mun ye-ẹ, se ini sọmun-arị ogbo ini Samụẹl ḅe ọrịmẹ ọ̀ nwẹngị ini damaḅoaḅẹ, ò so tẹkẹ nyọ mị mun aḅẹ.

¹⁵Ḅọrọsa ene mị ḅụ Nyanaḅọ Ḅe nwọse Samụẹl ḅe ḅẹmẹ,

¹⁶“Ḅa nwọ pembe ḅiri ḅụ Bẹnjamin sẹ mị ḅie à gbọrị owuḅọ se ị́ fịrịmaḅịa; pulo se ọ̀ tịḅịsara se ori amanyanaḅọ sọ ị̀ya tomoni Izrẹlapụma pịrịḅịa; ori anị pịkị Filistia apụma ḅara ḅie ini ḍụaḅịaye-ẹ. Ị̀ya tomonima inia tọrụsiọrị mị àrị ọrịsam ini pịkị ḅarachụa gose kọn àrị owu ma sọnị à naasam.”

¹⁷Samụẹl ḅe ọ̀ Sọl ḅe ọrị kirikiri, Nyanaḅọ Ḅe nwọse ọ̀ ḅẹmẹ, “Ḅe anị à ḍuko ị́ pịrị ḅọḅe-ẹ. Ori anị amada ị̀ya tomonima pịrịḅịaye-ẹ.”

¹⁸Sọl ḅe ọ̀ saḅamun Samụẹl ḅe lamẹ, anịsịkị ò ḅo ama onu ḅọkọ mị na kpekisam, se ọ̀ nwọse ò gbelamẹ, “Ḍuko ị̀ pịrị, ndeju yeọrịḅọ ḅe ori anga?”

¹⁹Samụẹl ḅe nwọse ọ̀ pẹkẹrẹmẹ, “Ị̀rị̀ anị yeọrịḅọ ḅe-ẹ. Ị̀ tọrọkọ pẹlẹma mun tẹkẹ nyọ mị ḅụ sime. Ómine mama apụma ómine ị̀rị̀ na yefị gbolomaḅịa mịmgba. Ḅa dede ḅie ó gbelaḅịaye ma à nwọ pẹkẹrẹ ọ́ pịrị se ó soḅịa.

²⁰Tẹrẹ-a ḍin ḅụ famẹ nwọḅẹ yepụra asụnma ọkụma, ómine àrị gose ḅụḅalaḅala nyanama, ini àrị ọrị ḅọrọsam. Ọkụma Izrẹlapụma anịkanịka ḅaraḅụ ḅiarịḅọ tụḅọ? Ị́rị́-ẹ—ị́rị́ na ị́ ḍa furo mị na-ẹ.”

²¹Sọl ḅe nwọ pẹkẹrẹmẹ, “Ị̀rị̀ Bẹnjamin sẹ ḅieḅọ-ẹ, Izrẹl ḅie bokatẹịn sẹ mị, ị̀ furo mị anị pịkị sẹ mị ḅie yeḅụsọkatẹịn furo mị-ẹ. Anịọkụma nde ị́ gose mị ḅara mị se ọkwẹịn ị̀ pịrịarịye?”

²²Anịsịkị Samụẹl ḅe Sọl ḅe na oria fịrịnwẹngịḅọ ḅe na ọkị opu ḅiekiri ḅie dẹbụl mị ḅụ tịḅịda nyọ mị ḅụ koromamẹ, igoniapụ soi pembeye anị nyọ kpọnjị sime waraḅẹ.

²³Samụẹl ḅe nwọse fịaye chụọḅọ ḅe ḅẹmẹ, “Àrị ị́ ḅẹ na sikima-ẹ nwọḅẹ nama okpokpo mị ọkịḅo.”

²⁴Anị fịaye chụọḅọ ḅe ini sẹlẹ sikima nama eleke mị ọkịḅo Sọl ḅe tọrọkọ koromaye-ẹ. Samụẹl ḅe nwọ ḅẹmẹ, “Ḍiki, mị anị ini se koroma ị́ pịrị nama mị-ẹ. Anị pẹị. Ị̀rị̀ anị koko ị́ wẹrịmamẹ, ị́ mị sịkịḅụ anị pẹịḅịaye gose, pịkị à chịnḅịpị se pịrị apụma na.” Anịḅụ Sọl ḅe na Samụẹl ḅe na anị ene yefịmẹ.

²⁵Tẹkẹ nyọ mị ḅụ ini tukoro ama mun sịkị, ini mọnọye mịẹ Sọl ḅe pịrịmẹ ochu ọgọnọ,

²⁶seni anị nyọ ọ̀ mọnọmẹ. Ḅaso ḅiri ḅụ Samụẹl ḅe ò mun ochu mị ọgọnọ Sọl ḅe chịnmẹ, “Sịsẹ, àrị ọ́ ḅọrọma se ó so.” Sọl ḅe ọ̀ sịsẹmẹ, se ori na Samụẹl ḅe na paka somun ateli mị lamẹ.

²⁷Ini nwẹngị mun ama mị akasịkị lasịkị, Samụẹl ḅe nwọse Sọl ḅe ḅẹmẹ, “Fịrịnwẹngịḅọ ḅe ḅẹ ọ̀ nwẹngị tọrọkọ mun.” Fịrịnwẹngịḅọ ḅe so sịkị, Samụẹl ḅe nwọse Sọl ḅe ḅẹmẹ, “Kalasịkị se mịanga sime, se ye Tamụnọ Ḅe ḍukoye mị à nwọ ḍuko ị́ pịrị.”