Read kiswahili Mwanzo 11 Bible Online

Mwanzo 11 - kiswahili bible

Mwanzo 11

¹⑱ Nchi yote ilikuwa na lugha moja na usemi mmoja.

²⑲ Ikawa watu waliposafiri pande za mashariki waliona nchi tambarare katika nchi ya Shinari; wakakaa huko.

³Wakaambiana, Haya, na tufanye matofali tukayachome moto. Walikuwa na matofali badala ya mawe, na lami badala ya chokaa.

⁴⑳ Wakasema, Haya, na tujijengee mji, na mnara, na kilele chake kifike mbinguni, tujifanyie jina; ili tusipate kutawanyika usoni pa nchi yote.

⁵ BWANA akashuka ili auone mji na mnara waliokuwa wakiujenga wanadamu.

⁶ BWANA akasema, Tazama, watu hawa ni taifa moja, na lugha yao ni moja; na haya ndiyo wanayoanza kuyafanya, wala sasa hawatazuiliwa neno wanalokusudia kulifanya.

⁷ Haya, na tushuke huko, tuwachafulie usemi wao ili wasisikilizane maneno wao kwa wao.

⁸ Basi BWANA akawatawanya kutoka huko waende usoni pa nchi yote; wakaacha kuujenga ule mji.

⁹ Kwa sababu hiyo jina lake likaitwa Babeli; maana hapo ndipo BWANA alipoichafua lugha ya dunia yote; na kutoka huko BWANA akawatawanya waende usoni pa nchi yote.

¹⁰ Hivi ndivyo vizazi vya Shemu; Shemu alikuwa mtu wa miaka mia moja akamzaa Arfaksadi miaka miwili baada ya gharika.

¹¹Shemu akaishi baada ya kumzaa Arfaksadi miaka mia tano, akazaa wana, wa kiume na wa kike.

¹² Arfaksadi akaishi miaka thelathini na mitano, akamzaa Sela.

¹³Arfaksadi akaishi baada ya kumzaa Sela miaka mia nne na mitatu, akazaa wana, wa kiume na wa kike.

¹⁴Sela akaishi miaka thelathini, akamzaa Eberi.

¹⁵Sela akaishi baada ya kumzaa Eberi miaka mia nne na mitatu, akazaa wana, wa kiume na wa kike.

¹⁶ Eberi akaishi miaka thelathini na minne, akamzaa Pelegi.

¹⁷Eberi akaishi baada ya kumzaa Pelegi miaka mia nne na thelathini, akazaa wana, wa kiume na wa kike.

¹⁸Pelegi akaishi miaka thelathini, akamzaa Reu.

¹⁹Pelegi akaishi baada ya kumzaa Reu miaka mia mbili na tisa, akazaa wana, wa kiume na wa kike.

²⁰Reu akaishi miaka thelathini na miwili, akamzaa Serugi.

²¹Reu akaishi baada ya kumzaa Serugi miaka mia mbili na saba, akazaa wana, wa kiume na wa kike.

²²Serugi akaishi miaka thelathini, akamzaa Nahori.

²³Serugi akaishi baada ya kumzaa Nahori miaka mia mbili, akazaa wana, wa kiume na wa kike.

²⁴Nahori akaishi miaka ishirini na tisa, akamzaa Tera.

²⁵Nahori akaishi baada ya kumzaa Tera miaka mia moja na kumi na tisa, akazaa wana, wa kiume na wa kike.

²⁶ Tera akaishi miaka sabini, akamzaa Abramu, na Nahori, na Harani.

²⁷ Na hivi ndivyo vizazi vya Tera. Tera akamzaa Abramu, na Nahori, na Harani. Harani akamzaa Lutu.

²⁸Harani akafa kabla ya baba yake Tera katika nchi aliyozaliwa, yaani, katika Uru wa Wakaldayo.

²⁹ Abramu na Nahori wakajitwalia wake. Jina la mkewe Abramu aliitwa Sarai, na jina la mkewe Nahori aliitwa Milka, binti Harani, ambaye alikuwa baba wa Milka na wa Iska.

³⁰ Na Sarai alikuwa tasa, hakuwa na mtoto.

³¹ Tera akamtwaa Abramu mwanawe, na Lutu mwana wa Harani, mwana wa mwanawe, na Sarai mkwewe, mke wa Abramu mwanawe, wakatoka wote katika Uru wa Wakaldayo, waende nchi ya Kanaani, wakafika mpaka Harani wakakaa huko.

³²Siku za Tera zilikuwa miaka mia mbili na mitano; Tera akafa katika Harani.