Read kiswahili Mwanzo 9 Bible Online

Mwanzo 9 - kiswahili bible

Mwanzo 9

¹ Mungu akambariki Nuhu na wanawe, akawaambia, Zaeni, mkaongezeke, mkaijaze nchi.

² Kila mnyama wa nchi atawaogopa ninyi na kuwahofu, na kila ndege wa angani: pamoja na vitu vyote vilivyojaa katika ardhi, na samaki wote wa baharini; vimetiwa mikononi mwenu.

³ Kila kiendacho kilicho hai kitakuwa chakula chenu, kama nilivyowapa mboga za majani, kadhalika nawapa hivi vyote.

⁴ Bali nyama pamoja na uhai, yaani, damu yake, msile.

⁵ Hakika damu yenu ya uhai wenu nitaitaka; na kwa mkono wa kila mnyama nitaitaka; na kwa mkono wa mwanadamu, kwa mkono wa ndugu ya mtu nitataka uhai wa mwanadamu.

⁶ Atakayemwaga damu ya mwanadamu, damu yake huyo itamwagwa na mwanadamu, maana kwa mfano wake Mungu alimfanya mwanadamu.

⁷ Nanyi zaeni, mkaongezeke; zaeni sana katika nchi, mkaongezeke ndani yake.

⁸Mungu akamwambia Nuhu, na wanawe pamoja naye, akisema,

⁹Tazama, nilithibitisha agano langu nanyi; tena na uzao wenu baada yenu;

¹⁰ tena na kila kiumbe hai kilichoko pamoja nanyi, ndege, na mnyama wa kufugwa, na kila mnyama wa mwitu katika nchi pamoja nanyi; wote wanaotoka katika safina, hata kila kilicho hai katika nchi.

¹¹ Na agano langu nitalithibitisha nanyi; wala kila chenye mwili hakitafutwa tena kwa maji ya gharika; wala hakutakuwa tena gharika, baada ya hayo, kuiharibu nchi.

¹² Mungu akasema, Hii ndiyo ishara ya agano nifanyalo kati yangu na ninyi, na kila kiumbe hai kilichoko pamoja nanyi, kwa vizazi vyote hata milele;

¹³Mimi nauweka upinde wangu winguni, nao utakuwa ni ishara ya agano kati yangu na nchi.

¹⁴Hata itakuwa nikitanda mawingu juu ya nchi, upinde utaonekana winguni,

¹⁵ nami nitalikumbuka agano langu, lililoko kati yangu na ninyi, na kila kiumbe hai katika wote wenye mwili, wala maji hayatakuwa gharika tena kuwaharibu wote wenye mwili.

¹⁶ Basi huo upinde utakuwa winguni; nami nitauangalia nipate kulikumbuka agano la milele lililoko kati ya Mungu na kila kiumbe hai katika wote wenye mwili kilichoko katika nchi.

¹⁷Mungu akamwambia Nuhu, Hii ndiyo ishara ya agano nililoliweka kati yangu na watu wote walioko katika nchi.

¹⁸ Wana wa Nuhu waliotoka katika safina, ni Shemu, na Hamu, na Yafethi; na Hamu ndiye baba wa Kanaani.

¹⁹ Hawa watatu walikuwa wana wa Nuhu na kwa hao nchi yote ikaenea watu.

²⁰① Nuhu akaanza kuwa mkulima, akapanda mizabibu;

²¹② akanywa divai, akalewa; akawa uchi katika hema yake.

²²Hamu, baba wa Kanaani, akauona uchi wa baba yake, akawaeleza ndugu zake wawili waliokuwa nje.

²³③ Shemu na Yafethi wakatwaa vazi, wakalitanda mabegani mwao wote wawili, wakaenda kinyumenyume, wakaufunika uchi wa baba yao; na nyuso zao zilielekea nyuma, wala hawakuuona uchi wa baba yao.

²⁴Nuhu akalevuka katika ulevi wake, akajua mwana wake mdogo alivyomtendea.

²⁵④ Akasema, Na alaaniwe Kanaani; Atakuwa mtumwa kabisa kwa ndugu zake.

²⁶⑤ Akasema, Na atukuzwe BWANA Mungu wa Shemu; Na Kanaani awe mtumwa wake.

²⁷⑥ Mungu amwongezee Yafethi. Na akae katika hema za Shemu; Na Kanaani awe mtumwa wake.

²⁸Na Nuhu akaishi baada ya ile gharika miaka mia tatu na hamsini.

²⁹⑦ Siku zote za Nuhu zilikuwa miaka mia tisa na hamsini, akafa.