Read kiswahili 2 Samweli 22 Bible Online

2 Samweli 22 - kiswahili bible

2 Samweli 22

¹ Basi Daudi akamwambia BWANA maneno ya wimbo huu, siku ile BWANA alipomwokoa mikononi mwa adui zake wote, na mkononi mwa Sauli;

² akasema, BWANA ndiye jabali langu, na ngome yangu, na mwokozi wangu,

³ Mungu wa mwamba wangu, nitamwamini yeye; Ngao yangu, na pembe ya wokovu wangu, mnara wangu, na kimbilio langu; Mwokozi wangu, waniokoa na jeuri.

⁴Nitamwita BWANA astahiliye kusifiwa; Hivyo nitaokoka na adui zangu.

⁵Maana mawimbi ya mauti yalinizunguka, Mafuriko ya uovu yakanitia hofu.

⁶Kamba za kuzimu zilinizunguka; Mitego ya mauti ikanikabili.

⁷ Katika shida yangu nilimwita BWANA, Naam, nikamlalamikia Mungu wangu; Naye akaisikia sauti yangu hekaluni mwake, Kilio changu kikaingia masikioni mwake.

⁸ Ndipo nchi ilipotikisika na kutetemeka, Misingi ya mbinguni ikasukasuka Na kutikisika, kwa sababu alikuwa na ghadhabu.

⁹ Kukapanda moshi kutoka puani mwake, Moto ukatoka kinywani mwake ukala; Makaa yakawashwa nao.

¹⁰ Aliziinamisha mbingu akashuka; Kukawa na giza kuu chini ya miguu yake.

¹¹ Akapanda juu ya kerubi akaruka; Naam, alionekana juu ya mabawa ya upepo.

¹²Akafanya giza hema zake za kumzunguka, Makusanyiko ya maji, mawingu makuu ya mbinguni.

¹³Toka mwangaza uliokuwa mbele zake Makaa ya moto yakawashwa.

¹⁴① BWANA alipiga radi toka mbinguni, Naye Aliye Juu akaitoa sauti yake.

¹⁵② Akapiga mishale, akawatawanya; Umeme, naye akawatimua.

¹⁶Ndipo ilipoonekana mikondo ya bahari, Misingi ya ulimwengu ikafichuliwa, Kwa kukemea kwake BWANA, Kwa mvumo wa pumzi ya puani mwake.

¹⁷Alipeleka kutoka juu, akanishika; Akanitoa katika maji mengi;

¹⁸Akaniokoa na adui yangu mwenye nguvu, Na wale walionichukia; Maana walikuwa na nguvu kuliko mimi.

¹⁹Walinikabili siku ya msiba wangu; Lakini BWANA alikuwa tegemeo langu.

²⁰③ Akanitoa akanipeleka panapo nafasi; Aliniponya kwa kuwa alipendezwa nami.

²¹BWANA alinitendea kulingana na haki yangu; Kulingana na usafi wa mikono yangu akanilipa.

²²Maana nimezishika njia za BWANA, Wala sikumwasi Mungu wangu.

²³④ Maana hukumu zake zote zilikuwa mbele yangu; Na kuhusu amri zake, sikuziacha.

²⁴⑤ Nami nilikuwa mkamilifu kwake, Nikajilinda na uovu wangu.

²⁵Basi BWANA amenilipa kulingana na haki yangu; Kulingana na usafi wa mikono yangu mbele zake.

²⁶⑥ Kwa mtu mwenye fadhili utakuwa mwenye fadhili Kwa mkamilifu utajionesha kuwa mkamilifu;

²⁷⑦ Kwake ajitakasaye utajionesha kuwa mtakatifu; Na kwa mpotovu utajionesha kuwa mkaidi.

²⁸⑧ Na watu wanaoonewa wewe utawaokoa; Ila macho yako huwapinga wenye kiburi, uwadhili.

²⁹Kwa kuwa wewe u taa yangu, Ee BWANA; Na BWANA ataniangazia giza langu.

³⁰Maana kwa msaada wako nafuatia jeshi; Kwa msaada wa Mungu wangu ninaruka ukuta.

³¹⑩ Mungu njia yake ni kamilifu; Ahadi ya BWANA imehakikishwa; Yeye ndiye ngao yao Wote wanaomkimbilia.

³²⑪ Maana ni nani aliye Mungu, ila BWANA? Ni nani aliye mwamba, ila Mungu wetu?

³³⑫ Mungu ndiye ngome yangu yenye nguvu; Naye huwaongoza wakamilifu katika njia yake.

³⁴⑬ Huifanya miguu yangu kuwa kama ya kulungu; Na kunisimamisha mahali pangu pa juu.

³⁵Ananifundisha mikono yangu vita; Hata mikono yangu inaupanda upinde wa shaba.

³⁶Nawe umenipa ngao ya wokovu wako; Na unyenyekevu wako umenikuza.

³⁷Umezifanyia nafasi hatua zangu, Wala miguu yangu haikuteleza.

³⁸Nimewafuatia adui zangu, na kuwaangamiza; Wala sikurudi nyuma hadi walipokomeshwa.

³⁹Nami nimewakomesha na kuwapiga wasiweze kusimama; Naam, wameanguka chini ya miguu yangu.

⁴⁰Maana umenijaza nguvu ya kupigana vita; Ukawafanya adui zangu wafifie chini yangu.

⁴¹Naam, adui zangu umewafanya wanipe visogo, Ili niwakatilie mbali wanaonichukia.

⁴²⑭ Walitazama, lakini hapakuwa na wa kuwaokoa; Walimwita BWANA, lakini hakuwajibu.

⁴³Ndipo nikawaponda kama mavumbi ya nchi, Nikawakanyaga kama matope ya njiani, nikawatawanya.

⁴⁴⑮ Nawe umeniokoa na mashindano ya watu wangu; Umenihifadhi niwe kichwa cha mataifa; Watu nisiowajua watanitumikia.

⁴⁵Wageni walinijia wakinyenyekea; Mara tu waliposikia habari zangu, Walinitii.

⁴⁶⑯ Wageni nao waliishiwa nguvu, Wakatoka katika ngome zao wakitetemeka.

⁴⁷⑰ BWANA yu hai; Na ahimidiwe mwamba wangu; Na atukuzwe Mungu wangu, mwamba wa wokovu wangu;

⁴⁸⑱ Naam, Mungu anilipiziaye kisasi, Na kuwatweza watu chini yangu,

⁴⁹Na kuniokoa kutoka kwa adui zangu; Naam, waniinua juu yao walioniinukia; Ukaniokoa kutoka kwa watu wajeuri.

⁵⁰⑲ Basi, BWANA, nitakushukuru kati ya mataifa, Nami nitaliimbia jina lako.

⁵¹Yeye ni mnara wa wokovu[15] kwa mfalme wake; Amfanyia fadhili masihi[16] wake, Kwa Daudi na wazawa wake, hata milele.