Read kiswahili 1 Mambo ya Nyakati 16 Bible Online

1 Mambo ya Nyakati 16 - kiswahili bible

1 Mambo ya Nyakati 16

¹ Wakaliingiza sanduku la Mungu, na kuliweka katikati ya hema aliyoipiga Daudi kwa ajili yake; wakatoa sadaka za kuteketezwa na sadaka za amani mbele za Mungu.

²Na Daudi alipokwisha kuitoa sadaka ya kuteketezwa na sadaka za amani, akawabariki watu kwa jina la BWANA.

³Kisha akawagawia kila mtu wa Israeli, wanaume kwa wanawake, kila mtu mkate wa ngano, na kipande cha nyama, na mkate wa zabibu.

⁴Akawaagiza baadhi ya Walawi kwamba watumike mbele ya sanduku la BWANA, wamfanyie ukumbusho, na shukrani, na sifa, BWANA, Mungu wa Israeli;

⁵Asafu mkuu wao, na wa pili wake Zekaria, na Yeieli, na Shemiramothi, na Yehieli, na Metithia, na Eliabu, na Benaya, na Obed-edomu, na Yeieli, wenye vinanda na vinubi; naye Asafu mwenye kupiga matoazi;

⁶nao makuhani Benaya na Yahazieli wenye baragumu daima, mbele ya sanduku la Agano la Mungu.

⁷ Ndipo siku hiyo Daudi alipoagiza kwanza kumshukuru BWANA, kwa mkono wa Asafu na nduguze.

⁸ Mshukuruni BWANA, liitieni jina lake; Wajulisheni watu matendo yake.

⁹ Mwimbieni, mwimbieni nyimbo za kumsifu; Yatangazeni matendo yake yote ya ajabu.

¹⁰ Jisifuni kwa jina lake takatifu; Na ufurahi moyo wao wamtafutao BWANA.

¹¹ Mtafuteni BWANA na nguvu zake; Utafuteni uso wake siku zote.

¹² Yakumbukeni matendo yake yote ya ajabu aliyoyafanya; Miujiza yake na hukumu za kinywa chake;

¹³Enyi wazao wa Israeli, mtumishi wake, Enyi wana wa Yakobo, wateule wake.

¹⁴Yeye, BWANA, ndiye Mungu wetu; Duniani kote kuna hukumu zake.

¹⁵Likumbukeni agano lake milele, Neno lile aliloviamuru vizazi elfu.

¹⁶ Agano alilofanya na Abrahamu, Na kiapo chake kwa Isaka;

¹⁷Aliyomthibitishia Yakobo kuwa amri, Na kwa Israeli kuwa agano la milele.

¹⁸Akisema, Nitakupa wewe nchi ya Kanaani, Iwe urithi wenu mliopimiwa;

¹⁹ Mlipokuwa watu wawezao kuhesabiwa; Naam, watu wachache na wageni ndani yake.

²⁰Mkitangatanga toka taifa hadi taifa, Toka ufalme mmoja hadi kwa watu wengine.

²¹ Hakumwacha mtu awaonee; Hata wafalme aliwakemea kwa ajili yao;

²² Akisema, Msiwaguse masihi[11] wangu, Wala msiwadhuru nabii zangu.

²³ Mwimbieni BWANA, nchi yote; Tangazeni wokovu wake siku baada ya siku.

²⁴ Watangazieni mataifa habari za utukufu wake, Na watu wote habari za maajabu yake.

²⁵ Kwa kuwa BWANA ni mkuu mwenye kusifiwa sana; Na wa kuhofiwa kuliko miungu yote.

²⁶ Maana miungu yote ya watu si kitu; Lakini BWANA ndiye aliyezifanya mbingu.

²⁷ Heshima na adhama ziko mbele zake; Nguvu na furaha zipo mahali pake.

²⁸Mpeni BWANA, enyi jamaa za watu, Mpeni BWANA utukufu na nguvu.

²⁹Mpeni BWANA utukufu wa jina lake; Leteni sadaka, na mje mbele zake; Mwabuduni BWANA kwa uzuri wa utakatifu;

³⁰Tetemekeni mbele zake, nchi yote. Naam, ulimwengu umethibitika usitikisike;

³¹ Mbingu na zifurahi, nchi na ishangilie; Na waseme katika mataifa, BWANA ametamalaki;

³² Bahari na ivume na vyote viijazavyo; Mashamba na yashangilie na vyote vilivyomo;

³³Ndipo miti yote ya mwituni iimbe kwa furaha, Mbele za BWANA, Kwa maana anakuja kuihukumu nchi.

³⁴ Mshukuruni BWANA kwa kuwa ni mwema; Kwa maana fadhili zake ni za milele.

³⁵ Nanyi semeni, Ee Mungu wa wokovu wetu, utuokoe, Utukusanye kwa kututoa katika mataifa, Tulishukuru jina lako takatifu, Tuzifanyie shangwe sifa zako.

³⁶ Na ahimidiwe BWANA, Mungu wa Israeli, tangu milele hata milele. Na watu wote wakasema, Amina; wakamhimidi BWANA.

³⁷Basi akawaacha huko, mbele ya sanduku la Agano la BWANA, Asafu na nduguze, ili watumike mbele ya sanduku daima, kila siku kama ilivyokuwa kazi yake.

³⁸Naye Obed-edomu, pamoja na ndugu zao, sitini na wanane; Obed-edomu na mwana wa Yeduthuni, na Hosa, wawe mabawabu;

³⁹ na Sadoki kuhani, na nduguze makuhani, mbele ya maskani ya BWANA katika mahali pa juu palipokuwa huko Gibeoni,

⁴⁰ ili kumtolea BWANA sadaka za kuteketezwa juu ya madhabahu ya sadaka ya kuteketezwa daima asubuhi na jioni, naam, kulingana na yote yaliyoandikwa katika Torati ya BWANA, aliyowaamuru Israeli;

⁴¹ na pamoja nao Hemani na Yeduthuni, na wale wengine waliochaguliwa, waliotajwa majina yao, ili kumshukuru BWANA, kwa kuwa fadhili zake ni za milele;

⁴²na pamoja nao Hemani na Yeduthuni wenye baragumu na matoazi, kwa hao watakaovumisha sauti, na vinanda kwa ajili ya hizo nyimbo za Mungu; na hao wana wa Yeduthuni wawepo mlangoni.

⁴³ Kisha watu wote wakaenda zao kila mtu nyumbani kwake; naye Daudi akarudi ili awabariki watu wa nyumbani mwake.