Read kiswahili Ayubu 10 Bible Online

Ayubu 10 - kiswahili bible

Ayubu 10

¹Nayachukia maisha yangu; Nitayasema malalamiko yangu wazi; Nitanena kwa uchungu wa roho yangu.

²Nitamwambia Mungu, Usinihukumie makosa; Nijulishe kwa nini unapingana nami.

³Je! Ni vema kwako wewe kuonea, Na kuidharau kazi ya mikono yako, Na kuiunga mkono mipango ya waovu?

⁴⑥ Je! Wewe una macho ya kimwili, Au je! Waona kama aonavyo binadamu?

⁵Je! Siku zako ni kama siku za mtu, Au je! Miaka yako ni kama miaka ya mtu,

⁶Hata ukaulizauliza habari za uovu wangu, Na kuitafuta dhambi yangu,

⁷Ujapojua ya kuwa mimi si mwovu; Wala hapana awezaye kuokoa kutoka kwa mkono wako?

⁸⑦ Mikono yako imeniumba na kunifinyanga; Nawe utageuka na kuniangamiza?

⁹⑧ Kumbuka, nakusihi ulivyonifinyanga kama vile udongo; Nawe, je! Utanirudisha uvumbini tena?

¹⁰⑩ Je! Wewe hukunimimina kama maziwa, Na kunigandisha mfano wa jibini?

¹¹Umenivika ngozi na nyama, Na kuniunga pamoja kwa mifupa na mishipa.

¹²Unanijalia uhai na fadhili, Na kwa uangalifu wako roho yangu imetunzwa.

¹³Lakini mambo haya uliyaficha moyoni mwako; Najua kuwa haya yamo nafsini mwako;

¹⁴Nikifanya dhambi, ndipo waniangalia, Wala hutaniachilia na uovu wangu.

¹⁵⑪ Mimi nikiwa mwovu, ole wangu! Nami nikiwa mwenye haki, walakini sitainua kichwa changu; Maana nimejaa aibu Nikiyaangalia mateso yangu.

¹⁶⑫ Kichwa changu kikijiinua, waniwinda kama simba; Tena wajionesha kwangu kuwa wa ajabu.

¹⁷Wewe unafanya upya ushahidi wako juu yangu, Na kuongeza kisirani chako juu yangu; Ukileta jeshi baada ya jeshi juu yangu.

¹⁸Kwa nini basi kunitoa tumboni? Ningekata roho, lisinione jicho lolote.

¹⁹Ningalikuwa kama mtu asiyekuwapo; Ningalichukuliwa kaburini kutoka tumboni.

²⁰⑬ Je! Siku zangu si chache? Acha basi, Usinisumbue, nipate angaa kutulizwa moyo kidogo.

²¹⑭ Kabla sijaenda huko ambako sitarudi kutoka huko tena, Ni hiyo nchi ya giza, giza tupu;

²²Ni nchi ya giza kuu, kama giza lenyewe lilivyo; Ni nchi ya giza tupu, isiyo na mpango wowote wa mambo, Nchi ambayo nuru yake ni kama giza.