Read kiswahili Ayubu 11 Bible Online

Ayubu 11 - kiswahili bible

Ayubu 11

¹Ndipo Sofari Mnaamathi akajibu, na kusema,

²Je! Huu wingi wa maneno usijibiwe? Na mtu aliyejaa maneno, je! Ahesabiwe kuwa na haki?

³Je! Majivuno yako yawanyamazishe watu wawe kimya? Nawe hapo ufanyapo dhihaka, je! Hapana mtu atakayekutahayarisha?

⁴⑮ Kwa kuwa wewe wasema, Mafunzo yangu ni safi, Nami ni safi machoni pako.

⁵Lakini, laiti Mungu angenena, Na kuifunua midomo yake juu yako;

⁶⑯ Tena akuoneshe hizo siri za hekima, Ya kuwa hufanikiwa katika kuyatimiza makusudi yake! Ujue basi ya kuwa Mungu akuachilia katika uovu wako.

⁷⑰ Je! Wewe waweza kuuvumbua ukuu wa Mungu? Waweza kuufikia upeo wa huyo Mwenyezi?

⁸Ni juu mno kama mbingu; waweza kufanya nini wewe? Ni wenye kina kuliko kuzimuni; waweza kujua nini wewe?

⁹Cheo chake ni kirefu kuliko dunia, Ni kipana zaidi ya bahari.

¹⁰Yeye akipita, na kufunga watu, Na kuwaita hukumuni, ni nani basi awezaye kumzuia?

¹¹⑱ Kwa kuwa yeye awajua watu baradhuli; Anapouona uovu, je; hatauangalia?

¹²Lakini mpumbavu aweza kupata ufahamu, Ingawa mwanadamu huzaliwa kama mtoto wa punda mwitu.

¹³⑲ Wewe ukiuweka moyo wako kwa uelekevu, Na kumnyoshea mikono yako;

¹⁴Ikiwa una uovu mkononi mwako, uweke mbali nawe, Wala usikubali upuzi kukaa hemani mwako;

¹⁵⑳ Hakika ndipo utakapopata kuinua uso pasipo ila; Naam, utathibitika, wala hutakuwa na hofu;

¹⁶Kwa kuwa utasahau mateso yako; Utayakumbuka kama maji yaliyokwisha pita;

¹⁷Na maisha yako yatakuwa meupe kuliko adhuhuri; Giza lake litakuwa kama alfajiri.

¹⁸Nawe utakuwa salama, kwa sababu kuna matumaini; Naam, utatafutatafuta kando yako, na kupumzika salama.

¹⁹Tena utalala, wala hapana atakayekutia hofu; Naam, wengi watakutafuta uso wako.

²⁰Lakini macho ya waovu yataingia kiwi, Nao hawatakuwa na njia ya kukimbilia, Na matumaini yao yatakuwa ni kutoa roho.