Read kiswahili Ayubu 18 Bible Online

Ayubu 18 - kiswahili bible

Ayubu 18

¹Ndipo Bildadi, Mshuhi, akajibu, na kusema,

²Je! Hata lini utayawinda maneno kwa mitego? Fikiri, kisha baadaye tutanena.

³ Twahesabiwa kuwa wanyama kwa sababu gani, Tena kuwa wanajisi machoni pako?

⁴ Wewe ujiraruaye mwenyewe katika hasira yako, Je! Dunia itaachwa kwa ajili yako wewe? Au jabali litaondolewa mahali pake?

⁵ Naam, mwanga wa waovu utazimika, Wala muali wa moto wake hautang'aa.

⁶Mwanga hemani mwake utakuwa giza, Nayo taa iliyo juu yake itazimwa.

⁷Hatua zake za nguvu zitasongwa, Na shauri lake mwenyewe litamwangusha chini.

⁸Kwani ametupwa katika wavu na miguu yake mwenyewe, Naye huenda juu ya matanzi.

⁹Tanzi litamshika kisigino chake, Na mtego utamshika.

¹⁰Amefichiwa tanzi chini, Na mtego amewekewa njiani.

¹¹ Vitisho vitamtia hofu kutoka kila upande, Na kumfukuza karibu na visigino vyake.

¹² Nguvu zake zitaliwa na njaa, Na msiba utakuwa tayari kwa kusita kwake.

¹³Utakula via vya mwili wake, Naam, mzaliwa wa kwanza wa mauti atavila via vyake.

¹⁴ Atang'olewa katika hema yake aliyokuwa akiitumaini; Naye atapelekwa kwake mfalme wa vitisho.

¹⁵ Katika hema yake hakuna kitakachobaki; Kiberiti kitamwagwa juu ya makazi yake.

¹⁶Chini, mizizi yake itakaushwa; Na juu, tawi lake litasinyaa.

¹⁷ Kumbukumbu lake litakoma katika nchi, Wala hatakuwa na jina mashambani.

¹⁸Atakimbizwa kutoka mwangani hata gizani, Na kufukuzwa atoke duniani.

¹⁹ Hatakuwa na mwana wala mjukuu kati ya watu wake, Wala hatasalia mtu hapo alipokaa.

²⁰Hao wanaokaa magharibi watastaajabia siku yake, Kama vile wanaokaa mashariki walivyotiwa hofu.

²¹① Hakika ndivyo yalivyo makazi ya wapotovu, Na hapa ni mahali pake asiyemjua Mungu.