Read kiswahili Ayubu 23 Bible Online

Ayubu 23 - kiswahili bible

Ayubu 23

¹Ndipo Ayubu akajibu, na kusema,

²Hata leo malalamiko yangu yana uchungu; Pigo langu ni zito zaidi ya kuugua kwangu.

³Laiti ningejua mahali niwezapo kumwona, Nifike hata hapo anapokaa!

⁴Ningeiweka kesi yangu mbele yake, Na kukijaza kinywa changu hoja.

⁵Ningeyajua maneno atakayonijibu, Na kuelewa hayo atakayoniambia.

⁶ Je! Angeshindana nami kwa ukuu wa uwezo wake? La, lakini angenisikiliza.

⁷Hapo waelekevu wangepata kuhojiana naye; Basi hivyo ningeachiliwa na mwamuzi wangu milele.

⁸ Tazama, naenda mbele, wala hayuko; Narudi nyuma, lakini siwezi kumwona;

⁹Na mkono wa kushoto, afanyapo kazi, lakini siwezi kumwona; Hujificha upande wa kulia, hata nisimwone.

¹⁰ Lakini yeye aijua njia niendeayo; Akisha kunijaribu, nitatoka kama dhahabu.

¹¹ Mguu wangu umeshikamana sana na hatua zake; Njia yake nimeishika, wala sikukengeuka.

¹²Sikurudi nyuma kuiacha amri ya midomo yake; Nimeyatunza maneno ya kinywa chake zaidi ya riziki yangu,

¹³ Lakini yeye ni mmoja, ni nani awezaye kumgeuza? Tena nafsi yake ilitakalo, ndilo afanyalo.

¹⁴ Kwani yeye hulitimiliza hilo nililoamriwa; Tena mambo mengi kama hayo ya pamoja naye.

¹⁵ Kwa hiyo naona taabu mbele ya uso wake; Nitakapofikiri, namwogopa.

¹⁶Kwa maana Mungu ameufanya moyo wangu kuzimia, Naye Mwenyezi amenitaabisha;

¹⁷ Maana sikufadhaishwa kwa sababu ya giza, Wala kwa sababu giza kuu limenifunika uso.