Read kiswahili Ayubu 28 Bible Online

Ayubu 28 - kiswahili bible

Ayubu 28

¹Hakika kuna shimo wachimbako fedha, Na mahali wapatapo dhahabu waisafishayo.

²Chuma hufukuliwa katika ardhi, Na shaba huyeyushwa katika mawe.

³ Binadamu hukomesha giza; Huyatafutatafuta hata katika maeneo ya mbali, Mawe ya madini katika giza, giza kuu.

⁴Hufukua shimo mbali na makao ya watu; Husahauliwa na nyayo zipitazo; Huning'inia mbali na watu, huyumbayumba huku na huko.

⁵Katika ardhi ndimo kitokeamo chakula; Na chini yake hupinduliwa kama kwa moto.

⁶Mawe yake ni mahali zipatikanapo yakuti; Nayo ina mchanga wa dhahabu.

⁷Njia ile hapana ndege mkali aijuaye, Wala jicho la tai halijaiona;

⁸Wanyama wakali wajivunao hawajaikanyaga, Wala simba mkali hajaipita.

⁹Huunyoshea mwamba wa gumegume mkono wake; Huipindua milima hata misingi yake.

¹⁰Hukata mifereji kati ya majabali; Na jicho lake huona kila kito cha thamani.

¹¹Hufunga vijito visichuruzike; Na kitu kilichositirika hukifunua.

¹² Bali hekima itapatikana wapi? Na mahali pa ufahamu ni wapi?

¹³ Mwanadamu hajui thamani yake, Wala haionekani katika nchi ya walio hai.

¹⁴ Vilindi vyasema, Haimo ndani yangu; Na bahari yasema, Haiko kwangu.

¹⁵ Haipatikani kwa dhahabu, Wala fedha haitapimwa iwe thamani yake.

¹⁶Haiwezi kutiwa thamani kwa dhahabu ya Ofiri, Wala kwa shohamu ya thamani nyingi, wala kwa yakuti samawi.

¹⁷Dhahabu na vioo haviwezi kulinganishwa nayo; Wala kubadili kwake hakutakuwa kwa vyombo vya dhahabu safi.

¹⁸Havitatajwa fedhaluka wala bilauri; Naam, kima cha hekima chapita marijani.

¹⁹Yakuti ya rangi ya manjano ya Kushi haitasawazishwa nayo, Wala haitatiwa kima kwa dhahabu safi.

²⁰Basi hekima yatoka wapi? Na mahali pa ufahamu ni wapi?

²¹Kwa kuwa imefichwa mbali na macho ya wote walio hai, Na kusitirika na ndege wa angani.

²²Uharibifu na Mauti husema, Tumesikia habari zake kwa masikio yetu.

²³ Mungu ndiye aijuaye njia yake, Naye anajua mahali pake.

²⁴ Maana anatazama hata miisho ya nchi, Na kuona chini ya mbingu nzima.

²⁵ Apate kuufanyia upepo uzito wake; Naam, anayapima maji kwa kipimo.

²⁶ Hapo alipoiwekea mvua amri, Na njia kwa umeme wa radi.

²⁷Ndipo alipoiona na kuitangaza; Aliithibitisha, naam, na kuichunguza.

²⁸ Kisha akamwambia mwanadamu, Tazama, kumcha Bwana ndiyo hekima, Na kujitenga na uovu ndio ufahamu.