Read kiswahili Ayubu 29 Bible Online

Ayubu 29 - kiswahili bible

Ayubu 29

¹Kisha Ayubu akaendelea na hoja yake, na kusema,

²Laiti ningekuwa kama nilivyokuwa katika miezi ya zamani, Kama katika siku hizo Mungu aliponilinda;

³ Hapo taa yake ilipomulika juu yangu kichwani, Nami nilitembea gizani kwa njia ya mwanga wake;

⁴ Kama nilivyokuwa katika siku zangu za kukomaa, Hapo siri ya Mungu ilipokuwa hemani mwangu;

⁵Wakati Mwenyezi alipokuwa angali pamoja nami, Nao watoto wangu walipokuwa wakinizunguka;

⁶ Wakati hatua zangu zilipokuwa zikioshwa kwa siagi, Nalo jabali liliponimiminia mito ya mafuta!

⁷Wakati nilipotoka kwenda mjini, kupitia langoni, Nilipokitengeza kiti changu katika njia kuu,

⁸Hao vijana waliniona wakanipisha, Nao wazee wakasimama kwa heshima;

⁹Wakuu wakanyamaa wasinene, Na kuweka mikono yao vinywani mwao;

¹⁰ Sauti yao wakuu ilinyamaa, Na ndimi zao zilishikamana na makaakaa yao.

¹¹Maana sikio liliponisikia, ndipo likanibarikia; Na jicho liliponiona, likanishuhudia.

¹² Kwa sababu nilimwokoa maskini aliyenililia; Yatima naye, na yule asiyekuwa na mtu wa kumsaidia.

¹³Baraka yake yeye aliyekuwa karibu na kupotea ilinijia; Nikaufanya moyo wa mjane kuimba kwa furaha.

¹⁴① Nilijivika haki, ikanifunika, Adili yangu ilikuwa kama joho na kilemba.

¹⁵② Nilikuwa macho kwa kipofu, Nilikuwa miguu kwa aliyechechemea.

¹⁶③ Nilikuwa baba kwa mhitaji, Na kesi ya mtu nisiyemjua niliichunguza.

¹⁷Nami nilizivunja taya za wasio haki, Na kumpokonya mawindo katika meno yake.

¹⁸④ Ndipo niliposema, Nitakufa ndani ya kiota changu, Nami nitaziongeza siku zangu kama mchanga;

¹⁹⑤ Shina langu limeenea hata kufika majini, Na umande hukaa usiku kucha katika matawi yangu;

²⁰⑥ Utukufu wangu utakuwa mpya kwangu, Na uta wangu hurejeshwa upya mkononi mwangu.

²¹Watu walitega masikio kunisikiliza, na kungoja, Wakanyamaza kimya wapate kusikia mashauri yangu.

²²Hawakunena tena baada ya kusikia maneno yangu; Matamko yangu yakadondoka juu yao.

²³Walikuwa wakiningojea kama kungojea mvua; Wakafunua vinywa vyao sana kama mvua ya masika.

²⁴Walipokata tamaa nikacheka nao; Na mwanga wa uso wangu hawakuuangusha.

²⁵Niliwachagulia njia, nikakaa kama mkuu wao. Nikakaa kama mfalme katika jeshi la askari, Mfano wa awafarijiye hao waombolezao.