Read kiswahili Ayubu 3 Bible Online

Ayubu 3 - kiswahili bible

Ayubu 3

¹ Baada ya hayo Ayubu akafunua kinywa chake, na kuilaani siku yake.[1]

²Ayubu akajibu, na kusema;

³ Na ipotelee mbali ile siku niliyozaliwa mimi, Na ule usiku uliosema, Mtoto wa kiume ametungishwa mimba.

⁴Siku hiyo na iwe giza; Mungu asiiangalie toka juu, Wala mwanga usiiangazie.

⁵ Ishikwe na giza, giza tupu, kuwa yake; Wingu na likae juu yake; Chote kiifanyacho siku kuwa giza na kiitishe.

⁶Tena usiku huo, na ushikwe na giza kuu; Usihesabiwe katika siku za mwaka; Wala kutiwa katika hesabu ya miezi.

⁷Tazama, usiku huo na uwe tasa; Wala isiwe ndani yake sauti ya shangwe.

⁸ Na waulaani hao waulaanio mchana, Hao walio tayari kumwamsha huyo Lewiathani.

⁹Nyota za mapambazuko yake na ziwe giza; Na utafute mwanga lakini usiupate; Wala usiyaone mapambazuko;

¹⁰Kwa sababu haukuifunga milango ya tumbo la mamangu. Wala kunifichia taabu machoni.

¹¹Mbona mimi sikufa wakati nikizaliwa? Mbona nisitoe roho hapo nilipotoka tumboni?

¹²Mbona pawe na magoti ya kunipokea? Au hayo maziwa, hata nikanyonya?

¹³Maana hapo ningelala na kutulia; Ningelala usingizi; na kupata kupumzika;

¹⁴Pamoja na wafalme na washauri wa dunia, Hao waliojijengea maganjoni;

¹⁵Au pamoja na wakuu wenye dhahabu, Waliozijaza nyumba zao fedha;

¹⁶Au, mbona kuzikwa kama mimba iliyoharibika, nisingekuwako; Kama wachanga wasiouona mwanga kabisa.

¹⁷Huko waovu huacha kusumbua; Huko nako hao waliochoka wanapumzika.

¹⁸Huko wafungwa wanastarehe pamoja; Hawaisikii sauti yake msimamizi.

¹⁹Wakuu na wadogo wako huko; Mtumishi yuko huru kwa bwana wake.

²⁰ Mbona yeye aliye mashakani kupewa mwanga, Na hao wenye uchungu rohoni kupewa uhai;

²¹ Ambao wangojea mauti, lakini hawayapati; Na kuyachimbulia kuliko watafutavyo hazina iliyostirika;

²²Ambao wafurahi mno, Na kushangilia watakapoliona kaburi?

²³ Kwa nini mtu aliyezibiwa njia kupewa mwanga, Ambaye Mungu amemzingira kwa ukigo?

²⁴Kwani kuugua kwangu kwaja kana kwamba ni chakula, Na kunguruma kwangu kumemiminika kama maji.

²⁵Maana jambo hilo nichalo hunipata, Nalo linitialo hofu hunijia.

²⁶Mimi sioni raha, wala situlii, wala kupumzika; Lakini taabu huja.