Read kiswahili Ayubu 31 Bible Online

Ayubu 31 - kiswahili bible

Ayubu 31

¹ Nilifanya agano na macho yangu; Basi ningewezaje kumwangalia msichana?

²Kwani sehemu ya Mungu itokayo juu ingekuwa nini, Na urithi wa Mwenyezi utokao juu?

³Je! Siyo msiba kwa wasio haki, Na hasara kwao watendao uovu?

⁴ Je! Yeye hazioni njia zangu, Na kuzihesabu hatua zangu zote?

⁵Kwamba nimetembea katika ubatili, Na mguu wangu umeukimbilia udanganyifu;

⁶(Na nipimwe katika mizani iliyo sawasawa, Ili Mungu aujue uelekevu wangu);

⁷ Kwamba hatua yangu imekengeuka na kuiacha njia, Na moyo wangu kuyaandama macho yangu, Tena kwamba kipaku chochote kimeshikamana na mikono yangu;

⁸Basi na nipande, mwingine ale; Naam, mazao ya shamba langu na yang'olewe.

⁹Kama moyo wangu ulishawishwa kwa mwanamke, Nami nimeotea mlangoni pa jirani yangu;

¹⁰Ndipo hapo mke wangu na asage kwa mwingine, Na wengine na wainame juu yake.

¹¹Kwani hilo lingekuwa kosa kuu; Naam, lingekuwa ni uovu wa kuadhibiwa na waamuzi;

¹²Kwa kuwa ni moto uteketezao hata Uharibifu, Nao ungeyang'oa mavuno yangu yote.

¹³Kama nimeidharau kesi ya mtumishi wangu, au ya kijakazi changu, Waliposhindana nami;

¹⁴Basi Mungu atakapoinuka nitafanya nini? Naye atakapozuru, nitamjibuje?

¹⁵ Je! Huyo aliyenifanya mimi ndani ya tumbo, siye aliyemfanya na yeye? Si yeye mmoja aliyetufinyanga tumboni?

¹⁶Ikiwa nimewanyima maskini haja zao, Au kama nimeyatia kiwi macho ya mwanamke mjane;

¹⁷Au kama nimekula tonge langu peke yangu, Mayatima wasipate kulila;

¹⁸(La, tangu ujana wangu alikuwa pamoja nami kama kwa baba; Nami nimekuwa ni kiongozi wa mjane tangu tumbo la mamangu);

¹⁹Ikiwa nimemwona mtu kuangamia kwa kukosa nguo, Au wahitaji kukosa mavazi;

²⁰Ikiwa viuno vyake havikunibariki, Au kama hakupata moto kwa manyoya ya kondoo wangu;

²¹Ikiwa nimewainulia mayatima mkono, Nilipoona msaada wangu langoni;

²²Basi bega langu na lianguke kutoka mahali pake, Na mkono wangu uvunjike mfupani mwake.

²³Kwani msiba utokao kwa Mungu ulikuwa na kitisho kwangu, Na kwa sababu ya ukuu wake sikuweza kufanya neno.

²⁴Ikiwa nimeifanya dhahabu kuwa tumaini langu, Na kuiambia dhahabu safi, Wewe u tegemeo langu;

²⁵Kama nilifurahi kwa kuwa mali yangu ilikuwa nyingi, Na kwa sababu mkono wangu umepata vitu vingi;

²⁶ Kama nililitazama jua lilipoangaza, Au mwezi ukiendelea kung'aa;

²⁷Na moyo wangu umeshawishwa kwa siri, Na midomo yangu imeubusu mkono wangu;

²⁸ Hilo nalo lingekuwa uovu wa kuadhibiwa na waamuzi; Kwani ningemwambia uongo Mungu aliye juu.

²⁹Kama nilifurahi kwa kuangamia kwake huyo aliyenichukia, Au kujitukuza alipopatikana na maovu;

³⁰ (Naam, sikukiacha kinywa changu kufanya dhambi Kwa kuutaka uhai wake kwa kuapiza);

³¹Kama watu wa hemani mwangu hawakunena, Ni nani awezaye kumpata mtu asiyeshibishwa na yeye kwa nyama?

³² Mgeni hakulala njiani; Lakini nilimfungulia msafiri milango yangu;

³³Ikiwa kama mwanadamu nimeyafunika makosa yangu, Kwa kuuficha uovu wangu kifuani mwangu;

³⁴ Kwa sababu niliwaogopa mkutano mkubwa, Na dharau la jamaa lilinitia hofu, Hata nilinyamaa kimya, nisitoke mlangoni.

³⁵Laiti ningekuwa na mtu wa kunisikia! (Tazama, sahihi yangu ni hii, Mwenyezi na anijibu); Laiti ningekuwa na hayo mashitaka yaliyoandikwa na adui yangu!

³⁶Hakika ningeyachukua mabegani; Ningejifunga mfano wa kilemba.

³⁷Ningemwambia hesabu ya hatua zangu Ningemkaribia kama vile mkuu.

³⁸Kama nchi yangu imelia juu yangu, Na matuta yake hulia pamoja;

³⁹Kama nimeyala matunda yake pasipo kulipa, Au kama nimewafanya wenyewe kupotewa na uhai;

⁴⁰Miiba na imee badala ya ngano, Na magugu badala ya shayiri. Maneno ya Ayubu yamekoma hapa.