Read kiswahili Ayubu 34 Bible Online

Ayubu 34 - kiswahili bible

Ayubu 34

¹Tena Elihu akajibu na kusema,

²Sikilizeni maneno yangu, enyi wenye hekima; Tegeni masikio kwangu, ninyi mlio na maarifa.

³Kwa kuwa sikio huyajaribu maneno, Kama vile kaakaa lionjavyo chakula.

⁴Na tujichagulie yaliyo ya uelekevu; Na tujue wenyewe yaliyo mema.

⁵⑪ Kwani Ayubu amesema, Mimi ni mwenye haki, Naye Mungu ameniondolea haki yangu;

⁶⑫ Nijapokuwa mwenye haki, nimehesabiwa kuwa mwongo; Jeraha langu haliponyeki, nijapokuwa sina makosa.

⁷Je! Ni mtu gani mfano wa Ayubu, Anywaye mzaha kama maji?

⁸Atembeaye na hao watendao uovu, Na kwenda pamoja na watu wabaya.

⁹⑬ Kwa kuwa amenena, Haimfai mtu lolote Kujifurahisha na Mungu.

¹⁰⑭ Kwa hiyo nisikilizeni, enyi wenye fahamu; Mungu asidhaniwe kutenda udhalimu; Wala Mwenyezi kufanya uovu.

¹¹⑮ Kwani atamlipa binadamu kwa kazi yake, Naye atamfanya kila mtu kuona kulingana na njia zake.

¹²Naam, hakika, Mungu hatatenda mabaya, Wala Mwenyezi hatapotosha hukumu.

¹³Ni nani aliyemwagiza kuiangalia dunia? Au ni nani aliyemwekea ulimwengu huu wote?

¹⁴⑯ Kama akimwekea mtu moyo wake, Akijikusanyia roho yake na pumzi zake;

¹⁵Wenye mwili wote wangeangamia pamoja, Nao wanadamu watarejea tena kuwa mavumbi.

¹⁶Ikiwa una ufahamu, sikia neno hili; Isikilize sauti ya maneno yangu.

¹⁷⑰ Je! Atatawala mtu aichukiaye haki hata mmoja? Nawe, je! Utamhukumia mkosa aliye na haki na mwenye nguvu?

¹⁸Je! Inafaa kumwambia mfalme, Wewe u mwovu? Au kuwaambia wakuu, Ninyi ni wabaya?

¹⁹⑱ Sembuse yeye huwajali nyuso za wakuu, Wala hawajali matajiri kuliko maskini? Kwani wote ni kazi ya mikono yake,

²⁰Hufa ghafla, hata usiku wa manane; Watu hutikisika na kwenda zao, Nao mashujaa huondolewa pasipo mkono wa mtu.

²¹Kwani macho yake yako juu ya njia za mtu, Naye huziona hatua zake zote.

²²Hapana hofu ya giza kuu, mahali wawezapo kujificha watendao udhalimu.

²³⑲ Kwani yeye hana haja ya kumfikiria mtu zaidi, ili aende mbele za Mungu ahukumiwe.

²⁴Yeye huwavunjavunja mashujaa pasipo kuwachunguza, Na kuwaweka wengine mahali pao.

²⁵Kwa sababu hiyo yeye huyatafiti matendo yao; Naye huwapindua usiku, wakaangamia.

²⁶Yeye huwapiga kwa sababu ya uovu wao, Waziwazi mbele ya macho ya wengine;

²⁷Kwa sababu walikengeuka, wasimfuate yeye, Wasikubali kuzishika njia zake hata moja;

²⁸⑳ Hata wakafanya kilio cha maskini kumfikia, Naye akasikia kilio cha hao wateswao.

²⁹Akitoa utulivu yeye, ni nani awezaye kuhukumia makosa? Akificha uso wake, ni nani awezaye kumtazama? Kama hufanyiwa taifa, au mtu mmoja, ni sawasawa;

³⁰ Ili huyo mpotovu asitawale, Wala pasiwe na wa kuwatega watu.

³¹Kwani kuna mtu aliyemwambia Mungu, Mimi nimevumilia kurudiwa, ingawa sikukosa;

³²Nisiyoyaona nifundishe wewe; Kama nimefanya uovu sitafanya tena?

³³Je! Malipo yake yatakuwa kama upendavyo wewe, hata ukayakataa? Kwani yakupasa wewe kuchagua, si mimi; Kwa sababu hiyo sema uyajuayo.

³⁴Watu walio na akili wataniambia, Naam, kila mtu mwenye hekima anisikiaye;

³⁵ Huyo Ayubu amesema pasipo maarifa, Na maneno yake hayana hekima.

³⁶Laiti Ayubu angejaribiwa hadi mwisho, Kwa kuwa amejibu kama watu waovu.

³⁷Maana huongeza uasi juu ya dhambi zake, Apiga makofi kati yetu, Na kuongeza maneno yake kinyume cha Mungu.