Read kiswahili Zaburi 104 Bible Online

Zaburi 104 - kiswahili bible

Zaburi 104

¹Ee nafsi yangu, umhimidi BWANA. Wewe, BWANA, Mungu wangu, Umejifanya mkuu sana; Umejivika heshima na utukufu.

²Umejivika nuru kama vazi; Umezitandika mbingu kama pazia;

³⑰ Na kuziweka nguzo za ghorofa zake majini. Huyafanya mawingu kuwa gari lake, Na kwenda juu ya mabawa ya upepo,

⁴⑱ Huwafanya malaika zake kuwa pepo, Na watumishi wake kuwa moto wa miali.

⁵Uliiweka nchi juu ya misingi yake, Isitikisike milele.

⁶Uliifunika kwa vilindi kama kwa vazi, Maji yalikuwa yakisimama juu ya milima.

⁷Kwa kukemea kwako yakakimbia, Kwa sauti ya radi yako yakaenda zake kasi,

⁸⑲ Yakapanda milima, yakateremka mabondeni, Mpaka mahali ulipoyatengenezea.

⁹⑳ Umeweka mpaka yasiupite, Wala yasirudi kuifunikiza nchi.

¹⁰Hupeleka chemchemi katika mabonde; Zapita kati ya milima;

¹¹Zamnywesha kila mnyama wa porini; Kwayo punda mwitu huzima kiu yao.

¹²Kandokando hukaa ndege wa angani; Na kuimba wakiwa katika matawi.

¹³Huinywesha milima toka juu angani; Nchi umeitosheleza kwa mazao ya kazi zako.

¹⁴ Huyameesha majani kwa makundi, Na maboga kwa matumizi ya mwanadamu; Ili atoe chakula katika nchi,

¹⁵ Na divai imfurahishe mtu moyo wake. Aung'aze uso wake kwa mafuta, Na mkate umburudishe mtu moyo wake.

¹⁶ Miti ya BWANA nayo imetoshelezwa maji, Mierezi ya Lebanoni aliyoipanda.

¹⁷Humo ndege hujenga viota vyao, Korongo, anayo makao katika misonobari.

¹⁸ Milima mirefu ndiko waliko mbuzi wa mwitu, Na magenge ni kimbilio lao wibari.

¹⁹ Aliufanya mwezi kwa ajili ya nyakati, Jua latambua kuchwa kwake.

²⁰ Wewe hufanya giza, kukawa usiku, Ndipo atambaapo kila mnyama wa mwitu.

²¹ Wanasimba hunguruma wakitaka mawindo, Wakitafuta chakula chao kutoka kwa Mungu.

²²Jua linapochomoza, wanakwenda zao, Na kujilaza mapangoni mwao.

²³ Mwanadamu atoka kwenda zake kazini, Na kwenye utumishi wake mpaka jioni.

²⁴ Ee BWANA, jinsi yalivyo mengi matendo yako! Kwa hekima umevifanya vyote pia. Dunia imejaa viumbe wako.

²⁵Bahari iko kule, kubwa na upana, Ndimo mlimo viendavyo visivyohesabika, Viumbe hai wakubwa kwa wadogo.

²⁶ Ndimo zipitamo merikebu, Ndimo alimo Lewiathani uliyemwumba acheze humo.

²⁷ Hao wote wanakungoja Wewe, Uwape chakula chao kwa wakati wake.

²⁸Wewe huwapa, Wao wanakiokota; Wewe waukunjua mkono wako, Wao wanashiba mema;

²⁹ Wewe wauficha uso wako, Wao wanafadhaika; Waiondoa pumzi yao, wanakufa, Na kuyarudia mavumbi yao,

³⁰ Waituma roho yako, wanaumbwa, Nawe waufanya upya uso wa nchi.

³¹Utukufu wa BWANA na udumu milele; BWANA na ayafurahie matendo yake.

³² Aitazamaye nchi, ikatetemeka; Aigusaye milima, ikatoka moshi.

³³Nitamwimbia BWANA maadamu ninaishi; Nitamshangilia Mungu wangu nikiwa hai;

³⁴Kutafakari kwangu na kuwe kutamu kwake; Maana furaha yangu hutoka kwa BWANA.

³⁵ Wenye dhambi waangamizwe katika nchi, Watendao ubaya wasiwepo tena. Ee nafsi yangu, umhimidi BWANA.