Read kiswahili Zaburi 106 Bible Online

Zaburi 106 - kiswahili bible

Zaburi 106

¹ Haleluya. Mshukuruni BWANA kwa kuwa ni mwema, Kwa maana fadhili zake ni za milele.

² Nani awezaye kuyanena matendo makuu ya BWANA, Au kuzihubiri sifa zake zote?

³ Heri washikao hukumu, Na kutenda haki sikuzote.

⁴Ee BWANA, unikumbuke mimi, Kwa kibali ulicho nacho kwa watu wako. Unijie kwa wokovu wako,

⁵Ili niuone wema wa wateule wako. Nipate kuifurahia furaha ya taifa lako, Na kujisifu pamoja na watu wako.

⁶ Tumetenda dhambi pamoja na baba zetu, Tumetenda maovu, tumefanya ubaya.

⁷ Baba zetu katika Misri Hawakuzingatia matendo yako ya ajabu; Hawakukumbuka wingi wa fadhili zako; Wakaasi penye bahari, Bahari ya Shamu.

⁸ Lakini akawaokoa kwa ajili ya jina lake, Ayadhihirishe matendo yake makuu.

⁹ Akaikemea Bahari ya Shamu ikakauka, Akawaongoza vilindini kana kwamba ni nchi kavu.

¹⁰Akawaokoa kutoka kwa mkono wa mtu adui, aliyewachukia, Na kuwakomboa kutoka kwa mkono wa adui zao.

¹¹Maji yakawafunika watesi wao, Hakusalia hata mmoja wao.

¹² Ndipo walipoyaamini maneno yake, Waliziimba sifa zake.

¹³Lakini punde wakayasahau matendo yake, Wakakosa kungojea ushauri wake.

¹⁴ Bali walitamani sana nyikani, Wakamjaribu Mungu jangwani.

¹⁵ Akawapa walichomwomba, Lakini akawatumia ugonjwa wa kuwakondesha.

¹⁶ Wakamhusudu Musa kambini, Na Haruni, mtakatifu wa BWANA.

¹⁷Nchi ikapasuka ikammeza Dathani, Ikaufunika mkutano wa Abiramu.

¹⁸Moto ukawaka katika mkutano wao, Miali yake ikawateketeza waovu.

¹⁹ Walifanya ndama huko Horebu, Wakaisujudia sanamu ya kusubu.

²⁰ Wakaubadili utukufu wao Kuwa mfano wa ng'ombe mla majani.

²¹Wakamsahau Mungu, mwokozi wao, Aliyetenda makuu katika Misri.

²²Matendo ya ajabu katika nchi ya Hamu, Mambo ya kutisha penye Bahari ya Shamu.

²³ Akasema ya kuwa atawaangamiza Kama Musa, mteule wake, asingalisimama, Mbele zake na kusimama palipobomoka, Ili aigeuze hasira yake asije akawaangamiza.

²⁴ Wakaidharau nchi ile ya kupendeza, Wala hawakuliamini neno lake.

²⁵Bali wakanung'unika hemani mwao, Wala hawakuisikiliza sauti ya BWANA.

²⁶Ndipo alipowainulia mkono wake na kuwaapia, Ya kuwa atawaangamiza jangwani,

²⁷ Na kuwatawanya wazao wao kati ya mataifa, Na kuwatapanya katika nchi mbali.

²⁸ Wakamwabudu Baal-Peori, Wakazila dhabihu zilizotolewa kwa wafu.

²⁹Wakamkasirisha kwa matendo yao; Tauni ikawashambulia.

³⁰Ndipo Finehasi akasimama akafanya hukumu; Tauni ikazuiliwa.

³¹Akahesabiwa kuwa ana haki Kizazi baada ya kizazi hata milele.

³² Wakamghadhabisha penye maji ya Meriba, Hasara ikampata Musa kwa ajili yao,

³³Kwa sababu waliiasi roho yake, Akasema yasiyofaa kwa midomo yake.

³⁴ Hawakuwaangamiza watu wa nchi Kama BWANA alivyowaambia;

³⁵ Bali walijichanganya na mataifa, Wakajifunza matendo yao.

³⁶ Wakazitumikia sanamu zao, Nazo zikawa mtego kwao.

³⁷ Naam, walitoa wana wao na binti zao Kuwa dhabihu kwa mashetani.

³⁸ Wakamwaga damu isiyo na hatia, Damu ya wana wao na binti zao, Waliowatoa dhabihu kwa sanamu za Kanaani; Nchi ikatiwa unajisi kwa damu.

³⁹Ndivyo walivyotiwa uchafu kwa kazi zao, Wakafanya uasherati kwa matendo yao.

⁴⁰ Hasira ya BWANA ikawaka juu ya watu wake, Akauchukia urithi wake.

⁴¹① Akawatia mikononi mwa mataifa, Nao waliowachukia wakawatawala.

⁴²Adui zao wakawaonea, Wakatiishwa chini ya mkono wao.

⁴³Mara nyingi aliwaponya, Bali walikuwa wakimwasi kwa mashauri yao, Wakawa dhalili kwa uovu wao.

⁴⁴② Lakini aliyaangalia mateso yao, Aliposikia kilio chao.

⁴⁵③ Akawakumbukia agano lake; Akawahurumia kwa wingi wa fadhili zake;

⁴⁶④ Akawajalia kuhurumiwa Na watu wote waliowateka.

⁴⁷⑤ Ee BWANA, Mungu wetu, utuokoe, Utukusanye kwa kututoa katika mataifa, Tulishukuru jina lako takatifu, Tuzifanyie shangwe sifa zako.

⁴⁸Na ahimidiwe BWANA, Mungu wa Israeli, Tangu milele hata milele. Watu wote na waseme, Amina. Haleluya.