Read kiswahili Zaburi 139 Bible Online

Zaburi 139 - kiswahili bible

Zaburi 139

¹⑰ Ee BWANA, umenichunguza na kunijua.

²⑱ Wewe wajua kuketi kwangu na kusimama kwangu; Umelifahamu wazo langu tokea mbali.

³Umepepeta kwenda kwangu na kulala kwangu, Umeelewa na njia zangu zote.

⁴⑲ Maana hamna neno katika ulimini wangu Usilolijua kabisa, BWANA.

⁵Umenizingira nyuma na mbele, Ukaniwekea mkono wako.

⁶Maarifa hayo ni ya ajabu, yanishinda mimi, Hayadirikiki, siwezi kuyafikia.

⁷Niende wapi nijiepushe na roho yako? Niende wapi niukimbie uso wako?

⁸⑳ Kama ningepanda mbinguni, Wewe uko; Ningefanya kuzimu kitanda changu, Wewe uko.

⁹Ningezitwaa mbawa za asubuhi, Na kukaa pande za mwisho za bahari;

¹⁰Huko nako mkono wako utaniongoza, Na mkono wako wa kulia utanishika.

¹¹Kama nikisema, Hakika giza litanifunika, Na nuru inizungukayo ingekuwa usiku;

¹²Giza nalo halikufichi kitu, Bali usiku huangaza kama mchana; Giza na mwanga kwako ni sawasawa.

¹³Maana Wewe ndiwe uliyeniumba mtima wangu, Uliniunga tumboni mwa mama yangu.

¹⁴Nitakushukuru kwa kuwa nimeumbwa Kwa njia ya ajabu ya kutisha. Matendo yako ni ya ajabu, Na nafsi yangu yajua sana,

¹⁵Mifupa yangu haikusitirika kwako, Nilipoumbwa kwa siri, Nilipoungwa kwa ustadi katika pande za chini za nchi;

¹⁶Macho yako yaliniona kabla sijakamilika; Kitabuni mwako ziliandikwa zote pia, Siku zilizoamriwa kabla hazijawa bado.

¹⁷Mawazo yako ni mazito sana kwangu; Ee Mungu; nayo ni makuu sana.

¹⁸Kama ningeyahesabu ni mengi kuliko mchanga; Niamkapo ningali pamoja nawe.

¹⁹ Ee Mungu, laiti ungewaua waovu! Na laiti watu wa damu wangetoka kwangu;

²⁰ Wale wanaokusema kwa ubaya, na kutenda maovu juu ya jina lako bure.

²¹Je! BWANA nisiwachukie wanaokuchukia? Nisiudhike nao watu wanaokuasi?

²²Nawachukia kwa upepo wa chuki, Wamekuwa adui kwangu.

²³ Ee Mungu, unichunguze, uujue moyo wangu, Unijaribu, uyajue mawazo yangu;

²⁴ Uone kama iko njia iletayo majuto ndani yangu, Ukaniongoze katika njia ya milele.