Read kiswahili Zaburi 140 Bible Online

Zaburi 140 - kiswahili bible

Zaburi 140

¹Ee BWANA, uniokoe kutoka kwa watu waovu. Unihifadhi kutoka kwa watu wajeuri.

²Waliowaza mabaya mioyoni mwao, Kila siku huchochea vita.

³ Wamenoa ndimi zao na kuwa kama za nyoka, Na katika midomo yao mna sumu ya fira.

⁴Ee BWANA, unilinde Kutoka kwa mikono ya mtu asiye haki; Unihifadhi na watu wajeuri; Waliopanga kuniangusha.

⁵ Wenye kiburi wamenifichia mtego na kamba; Wametandika wavu kando ya njia; Wameniwekea matanzi.

⁶ Nimemwambia BWANA, Ndiwe Mungu wangu; Ee BWANA, uisikie sauti ya dua zangu.

⁷ Ee MUNGU Bwana, nguvu za wokovu wangu, Umenifunika kichwa changu siku ya vita.

⁸ Ee BWANA, usimpe asiye haki tamaa zake, Usiifanikishe hila yake, wasije wakajiinua.

⁹ Nao wainuapo vichwa watu wanaonizunguka, Madhara ya midomo yao yawafunike.

¹⁰ Makaa ya moto yawaangukie, watupwe motoni, Na katika mashimo, wasipate kusimama tena.

¹¹Msingiziaji hatawekwa imara katika nchi, Mtu wa jeuri, uovu humwinda kumwangamiza.

¹² Najua ya kuwa BWANA atamfanyia mnyonge hukumu, Na wahitaji haki yao.

¹³Hakika wenye haki watalishukuru jina lako, Wenye adili watakaa mahali ulipo Wewe.