Read kiswahili Zaburi 17 Bible Online

Zaburi 17 - kiswahili bible

Zaburi 17

¹Ee BWANA, usikie haki, ukisikilize kilio changu, Utege sikio lako kwa maombi yangu, Yasiyotoka katika midomo ya hila.

²Hukumu yangu na itoke kwako, Macho yako na yatazame mambo ya adili.

³② Umenijaribu moyo wangu, umenijia usiku, Umenichunguza usione neno; Nimenuia kinywa changu kisikose,

⁴③ Kuhusu matendo ya wanadamu; Kwa neno la midomo yako Nimejiepusha na njia za wenye jeuri.

⁵Nyayo zangu zimeshikamana na njia zako, Hatua zangu hazikuondoshwa.

⁶Ee Mungu, nimekuita kwa maana utaitika, Utege sikio lako ulisikie neno langu.

⁷Dhihirisha fadhili zako za ajabu Wewe uwaokoaye wanaokukimbilia; Kwa mkono wako wa kulia Uwaokoe kutoka kwa adui zao.

⁸④ Unilinde kama mboni ya jicho, Unifiche chini ya kivuli cha mbawa zako;

⁹Wasinione wasio haki wanaonionea, Adui za roho yangu wanaonizunguka.

¹⁰Wamejawa na ukaidi, Kwa vinywa vyao wanajigamba.

¹¹⑤ Wamenifuatia; na sasa wananizunguka, Na kuyakaza macho yao watuangushe chini.

¹²Kama mfano wa simba atakaye kurarua, Kama mwanasimba aoteaye katika maotea yake.

¹³Inuka, Ee BWANA, umkabili, umwangushe, Kwa upanga wako uniokoe nafsi yangu na mtu mbaya.

¹⁴Ee BWANA, kwa mkono wako uniokoe na watu, Watu wa dunia hii ambao fungu lao liko katika maisha haya. Matumbo yao wayajaza kwa hazina yako, Hushiba wana, huwaachia watoto wao akiba zao,

¹⁵⑥ Bali mimi nikutazame uso wako katika haki, Niamkapo nishibishwe kwa sura yako.