Read kiswahili Zaburi 19 Bible Online

Zaburi 19 - kiswahili bible

Zaburi 19

¹ Mbingu zauhubiri utukufu wa Mungu, Na anga laitangaza kazi ya mikono yake.

²Mchana husemezana na mchana, Usiku hutolea usiku maarifa.

³Hakuna usemi wala maneno, Sauti yao haisikilikani.

⁴ Sauti yao imeenea duniani kote, Na maneno yao hadi miisho ya ulimwengu. Katika hizo ameliwekea jua hema,

⁵ Nalo hutokeza kama bwana arusi akitoka chumbani mwake, Lafurahi kama mtu aliye hodari Kwenda mbio katika njia yake.

⁶ Kuchomoza kwake ni katika mwisho wa mbingu, Na kuzunguka kwake ni hadi miisho ya mbingu, Wala hakuna kitu Kisichofikiwa na joto lake.

⁷Sheria ya BWANA ni kamilifu, Huiburudisha nafsi. Ushuhuda wa BWANA ni amini, Humtia hekima mtu asiye nayo.

⁸ Maagizo ya BWANA ni ya adili, Huufurahisha moyo. Amri ya BWANA ni safi, Huyatia macho nuru.

⁹Kicho cha BWANA ni kitakatifu, Kinadumu milele. Hukumu za BWANA ni kweli, Zina haki kabisa.

¹⁰Ni za kutamanika kuliko dhahabu, Kuliko wingi wa dhahabu safi. Nazo ni tamu kuliko asali, Kuliko sega la asali.

¹¹ Tena mtumishi wako huonywa kwazo, Katika kuzishika kuna thawabu kuu.

¹²Ni nani awezaye kuyatambua makosa yake? Unitakase na mambo ya siri.

¹³Umzuie mtumishi wako asitende mambo ya kiburi, Yasinitawale mimi. Ndipo nitakapokuwa kamili, Nami nitakuwa safi, sina kosa lililo kubwa.

¹⁴ Maneno ya kinywa changu, Na mawazo ya moyo wangu, Yapate kibali mbele zako, Ee BWANA, Mwamba wangu, na mwokozi wangu.