Read kiswahili Zaburi 33 Bible Online

Zaburi 33 - kiswahili bible

Zaburi 33

¹Mpigieni BWANA vigelegele, enyi wenye haki, Kusifu kunawapasa wanyofu wa moyo.

²Mshukuruni BWANA kwa kinubi, Kwa kinanda cha nyuzi kumi mwimbieni sifa.

³ Mwimbieni wimbo mpya, Pigeni kwa ustadi kwa sauti ya shangwe.

⁴Kwa kuwa neno la BWANA lina adili, Na kazi yake yote huitenda kwa uaminifu.

⁵Huzipenda haki na hukumu, Nchi imejaa fadhili za BWANA.

⁶ Kwa neno la BWANA mbingu ziliumbwa, Na jeshi lake lote kwa pumzi ya kinywa chake.

⁷Hukusanya maji ya bahari chungu chungu, Huviweka vilindi katika ghala.

⁸Nchi yote na imwogope BWANA, Wote wakaao duniani na wamche.

⁹ Maana Yeye alisema, na ikawa; Na Yeye aliamuru, ikaumbika.

¹⁰BWANA huyabatilisha mashauri ya mataifa, Huitangua mipango ya watu.

¹¹ Shauri la BWANA lasimama milele, Makusudi ya moyo wake vizazi na vizazi.

¹²Heri taifa ambalo BWANA ni Mungu wao, Watu aliowachagua kuwa urithi wake.

¹³ Toka mbinguni BWANA huchungulia, Huangalia na kuwaona wanadamu wote.

¹⁴Akiwa katika kiti chake cha enzi. Huwaangalia wote wakaao duniani.

¹⁵ Yeye aiumbaye mioyo yao wote Na kuziona kazi zao zote.

¹⁶Mfalme haokolewi kwa jeshi lake kubwa, Wala shujaa haokoki kwa kuwa na nguvu nyingi.

¹⁷Farasi hafai kitu kwa wokovu, Wala hamponyi mtu kwa wingi wa nguvu zake.

¹⁸ Tazama, jicho la BWANA li kwao wamchao, Wazingojeao fadhili zake.

¹⁹Ili kuwaponya nafsi zao kutoka kwa mauti, Na kuwahuisha wakati wa njaa.

²⁰Nafsi zetu zinamngoja BWANA; Yeye ndiye msaada wetu na ngao yetu.

²¹Maana mioyo yetu itamfurahia, Kwa kuwa tumelitumainia jina lake takatifu.

²²Ee BWANA, fadhili zako zikae nasi, Kama tunavyo kutumainia Wewe.