Read kiswahili Zaburi 35 Bible Online

Zaburi 35 - kiswahili bible

Zaburi 35

¹Ee BWANA, uwapinge hao wanaonipinga, Upigane nao wanaopigana nami.

²Uishike ngao na kikingio, Uinuke unisaidie.

³Uutoe na mkuki uwapinge wanaonifuatia, Uiambie nafsi yangu, Mimi ni wokovu wako.

⁴Waaibike na kufedheheka, Wanaoitafuta nafsi yangu. Warudishwe nyuma, wafadhaishwe, Wanaonizulia mabaya.

⁵Wawe kama makapi mbele ya upepo, Malaika wa BWANA akiwaangusha chini.

⁶Njia yao na iwe giza na utelezi, Malaika wa BWANA akiwafuatia.

⁷Maana bila sababu wamenifichia wavu, Bila sababu wameichimbia shimo nafsi yangu.

⁸⑮ Uharibifu na umpate kwa ghafla, Na wavu aliouficha umnase yeye mwenyewe; Kwa uharibifu aanguke ndani yake.

⁹⑯ Na nafsi yangu itamfurahia BWANA, Na kuushangilia wokovu wake.

¹⁰⑰ Mifupa yangu yote itasema, BWANA, ni nani aliye kama Wewe? Umponyaye maskini kutoka kwa mtu aliye hodari kumshinda yeye, Naam, maskini na mhitaji na mtu amtekaye.

¹¹Mashahidi wa udhalimu wanasimama, Wananiuliza mambo nisiyoyajua.

¹²Wananilipa mabaya badala ya mema, Hata nafsi yangu ikaingia ukiwa.

¹³Bali mimi, walipougua wao, Nguo yangu ilikuwa gunia. Nilijitesa nafsi yangu kwa kufunga; Maombi yangu yakarejea kifuani mwangu.

¹⁴Nilisikitika kana kwamba ni rafiki au ndugu yangu, Niliinama nikilia kama aliyefiwa na mamaye.

¹⁵Lakini nikijikwaa wanafurahi na kukusanyana, Walinikusanyikia watu ovyo nisiowajua, Wakanipapura bila kukoma.

¹⁶Bila heshima walinidhihaki kupindukia, Wakanisagia meno yao.

¹⁷BWANA, utatazama hadi lini? Uiokoe nafsi yangu kutoka kwa maangamizi yao, Na maisha yangu kutoka kwa wanasimba.

¹⁸Nitakushukuru katika kusanyiko kubwa; Nitakusifu kati ya watu wengi.

¹⁹⑱ Walio adui zangu bure wasinisimange, Wanaonichukia bila sababu wasining'ong'e.

²⁰Maana hawasemi maneno ya amani, Ila juu ya watulivu wa nchi huwaza hila.

²¹Nao wananifumbulia vinywa vyao, Husema, Ewe! Ewe! Jicho letu limeona.

²²⑲ Wewe, BWANA, umeona, usinyamaze; Ee Bwana, usiwe mbali nami.

²³Uamke, uwe macho ili kunipatia hukumu Kwa ajili ya madai yangu, Mungu wangu na Bwana wangu.

²⁴⑳ Unihukumu kwa haki yako, Ee BWANA, Mungu wangu, Na usiwaache wanisimange.

²⁵Wasiseme moyoni, Haya! Ndivyo tutakavyo; Wasiseme, Tumemmeza.

²⁶Waaibishwe, wafedheheshwe pamoja, Wanaoifurahia hali yangu mbaya. Wavikwe aibu na fedheha, Wanaojikuza juu yangu.

²⁷Washangilie na kufurahi, Wapendezwao na haki yangu. Naam, waseme daima, Atukuzwe BWANA, Apendezwaye na amani ya mtumishi wake.

²⁸Na ulimi wangu utanena haki yako, Na sifa zako mchana kutwa.