Read kiswahili Zaburi 38 Bible Online

Zaburi 38 - kiswahili bible

Zaburi 38

¹Ee BWANA, usinilaumu katika ghadhabu yako, Wala usiniadhibu kwa ukali wa hasira yako.

²Kwa maana mishale yako imenichoma, Na mkono wako umenipata.

³Hamna uzima katika mwili wangu Kwa sababu ya ghadhabu yako. Wala hamna amani mifupani mwangu Kwa sababu ya hatia zangu.

⁴Maana dhambi zangu zimenifunika kichwa, Kama mzigo mzito zimenilemea mno.

⁵Majeraha yangu yananuka na kutunga usaha, Kwa sababu ya upumbavu wangu.

⁶Nimejipinda na kuinama sana, Mchana kutwa ninaenda nikiomboleza.

⁷① Maana viuno vyangu vimejaa homa, Wala hamna uzima katika mwili wangu.

⁸Nimedhoofika na kupondeka sana, Nimeugua kwa fadhaa ya moyo wangu.

⁹Bwana, haja zangu zote ziko mbele zako, Kuugua kwangu hakukusitirika kwako.

¹⁰Moyo wangu unadundadunda, Nguvu zangu zimenitoka; Nuru ya macho yangu nayo imeniondoka.

¹¹② Wanipendao na rafiki zangu wanasimama mbali na pigo langu; Na jamaa zangu wanasimama mbali.

¹²Nao wanaoutafuta uhai wangu hutega mitego; Nao wanaotaka kunidhuru hunena mabaya; Na kufikiri hila mchana kutwa.

¹³Lakini kama kiziwi sisikii, Nami ni kama bubu asiyefumbua kinywa chake.

¹⁴Naam, nimekuwa kama mtu asiyesikia, Ambaye hamna ubishi kinywani mwake.

¹⁵③ Kwa kuwa nakungoja Wewe, BWANA, Wewe utajibu, Ee Bwana, Mungu wangu.

¹⁶Maana nilisema, Wasije wakanifurahia; Wale wanaojitukuza juu yangu Mguu wangu unapoteleza.

¹⁷Kwa maana mimi ni karibu na kusita, Na maumivu yangu yako mbele yangu daima.

¹⁸④ Kwa maana nitaungama uovu wangu, Na kusikitika kwa dhambi zangu.

¹⁹Lakini walio adui zangu bila sababu wana nguvu, Nao wanaonichukia bure wamekuwa wengi.

²⁰⑤ Naam, wakilipa mabaya kwa mema, Huwa adui zangu kwa kuwa nilifuata lililo jema.

²¹⑥ Wewe, BWANA, usiniache, Mungu wangu, usijitenge nami.

²²⑦ Ufanye haraka kunisaidia, Ee Bwana, wokovu wangu.