Read kiswahili Zaburi 51 Bible Online

Zaburi 51 - kiswahili bible

Zaburi 51

¹ Ee Mungu, unirehemu, kulingana na fadhili zako. Kiasi cha wingi wa rehema zako, Uyafute makosa yangu.

² Unioshe kabisa uovu wangu, Unitakase dhambi zangu.

³① Maana nimejua mimi makosa yangu Na dhambi yangu iko mbele yangu daima.

⁴② Nimekutenda dhambi Wewe peke yako, Na kufanya maovu mbele za macho yako. Wewe ujulikane kuwa una haki unenapo, Na kuwa safi utoapo hukumu.

⁵③ Tazama, nikazaliwa nikiwa na hatia; Mama yangu akanichukua mimba nikiwa na dhambi.

⁶Tazama, wapendezwa na kweli iliyo moyoni; Nawe utanifundisha hekima kwa siri,

⁷Unisafishe kwa hisopo nami nitakuwa safi, Unioshe, nami nitakuwa mweupe kuliko theluji.

⁸Unifanye kusikia furaha na shangwe, Mifupa uliyoiponda ifurahi.

⁹Usitiri uso wako usitazame dhambi zangu; Uzifute hatia zangu zote.

¹⁰④ Ee Mungu, uniumbie moyo safi, Uifanye upya na kuithibiti roho yangu.

¹¹⑤ Usinitenge na uso wako, Wala roho yako mtakatifu usiniondolee.

¹²⑥ Unirudishie furaha ya wokovu wako; Unitegemeze kwa roho ya upendo.

¹³Nitawafundisha wakosaji njia zako, Na wenye dhambi watarejea kwako.

¹⁴Ee MUNGU, Mungu wa wokovu wangu, Uniponye na umwagaji wa damu, Na ulimi wangu utaiimba haki yako.

¹⁵Ee Bwana, uifumbue midomo yangu, Na kinywa changu kitazinena sifa zako.

¹⁶Maana hupendezwi na dhabihu, na kama ningeitoa, Wewe huridhii sadaka ya kuteketezwa.

¹⁷Dhabihu za Mungu ni roho iliyovunjika; Moyo uliovunjika na kupondeka, Ee Mungu, hutaudharau.

¹⁸Uitendee mema Sayuni kwa radhi yako, Uzijenge kuta za Yerusalemu.

¹⁹⑦ Ndipo utakapopendezwa na dhabihu za haki, Na sadaka za kuteketezwa, na kafara. Ndipo watakapotoa ng'ombe Juu ya madhabahu yako.