Read kiswahili Zaburi 59 Bible Online

Zaburi 59 - kiswahili bible

Zaburi 59

¹Ee Mungu wangu, uniponye na adui zangu, Uniinue juu yao wanaoshindana nami.

²Uniponye nao wafanyao maovu, Uniokoe na watu wa damu.

³⑩ Kwa maana wanaiotea nafsi yangu; Wenye nguvu wamepanga kunishambulia; Ee BWANA, si kwa kosa langu, Wala si kwa hatia yangu.

⁴Bila kosa langu wanaenda mbio, kujiweka tayari; Inuka utazame na kunisaidia.

⁵⑪ Na Wewe, BWANA, Mungu wa majeshi, Mungu wa Israeli, uinuke. Uwapatilize mataifa yote; Usimrehemu hata mmoja wa wale wapangao maovu kwa hila.

⁶Wakati wa jioni hurudi, wakilia kama mbwa, Na kuzungukazunguka mjini.

⁷Tazama, kwa vinywa vyao huteuka, Midomoni mwao mna panga, Kwa maana ni nani asikiaye?

⁸⑫ Na Wewe, BWANA, utawacheka, Utawadhihaki mataifa yote.

⁹Ee nguvu zangu, nitakungoja Wewe, Maana Mungu ndiye aliye ngome yangu.

¹⁰Mungu wa fadhili zangu atanitangulia, Mungu atanijalia kutazama kwa ushindi juu ya adui zangu.

¹¹⑬ Usiwaue, watu wangu wasije wakasahau; Uwatawanye kwa uweza wako, Na kuwaangamiza, Ee Bwana, ngao yetu.

¹²Kwa dhambi ya kinywa chao, Na kwa neno la midomo yao, Wanaswe kwa kiburi chao, Kwa ajili ya kulaani na uongo wasemao.

¹³Uwakomeshe kwa hasira, Uwakomeshe watoweke, Wajue ya kuwa Mungu atawala katika Yakobo, Na hata miisho ya dunia.

¹⁴Wakati wa jioni hurudi, wakilia kama mbwa, Na kuzungukazunguka mjini.

¹⁵Wanatangatanga wakitafuta chakula; Na kunung'unika wasiposhiba.

¹⁶Nami nitaimba juu ya nguvu zako, Nitaimba kwa furaha juu ya fadhili zako asubuhi. Maana umekuwa ngome yangu, na kimbilio wakati wa mateso yangu.

¹⁷Ee nguvu zangu, nitakuimbia sifa, Maana Ewe Mungu ndiwe ngome yangu, Mungu wa fadhili zangu.