Read kiswahili Zaburi 73 Bible Online

Zaburi 73 - kiswahili bible

Zaburi 73

¹Hakika Mungu ni mwema kwa Israeli, Kwa hao walio safi mioyo yao.

²Nami miguu yangu ilikuwa karibu kupotoka, Hatua zangu zilikuwa karibu kuteleza.

³Maana niliwaonea wivu wenye kujivuna, Nilipoiona hali ya amani ya wasio haki.

⁴Maana hawana maumivu katika kufa kwao, Na miili yao ina nguvu.

⁵Hawana taabu kama watu wengine, Wala hawapati mapigo kama wanadamu wenzao.

⁶ Hivyo kiburi kimekuwa mkufu shingoni mwao, Udhalimu huwavika kama nguo.

⁷Macho yao hutokeza kwa kunenepa, Wameipita kadiri ya mawazo ya mioyo yao.

⁸ Hudhihaki, husimulia mabaya, Husimulia udhalimu kana kwamba wako juu.

⁹ Wameweka kinywa chao mbinguni, Na ulimi wao hutangatanga duniani.

¹⁰Kwa hiyo watu wake hugeuka huko, Na maji yaliyojaa humezwa nao.

¹¹ Nao husema, Mungu ajuaje? Yako maarifa kwake aliye juu?

¹²Fahamu, ndivyo walivyo wasio haki, Na kwa kustarehe sikuzote wamepata mali nyingi.

¹³ Hakika nimejisafisha moyo wangu bure, Na kunawa mikono yangu nisitende dhambi.

¹⁴Maana mchana kutwa nimepigwa, Na kuadhibiwa kila asubuhi.

¹⁵Kama ningalisema, Nitasimulia kama hayo; Kumbe! Ningaliwadanganya kizazi cha wana wako.

¹⁶ Nami nilifikiri jinsi ya kufahamu hayo; Ikawa taabu machoni pangu;

¹⁷ Hata nilipoingia katika patakatifu pa Mungu, Nikautafakari mwisho wao.

¹⁸Hakika Wewe huwaweka penye utelezi, Huwaangusha mpaka palipoharibika.

¹⁹Namna gani wameangamizwa punde! Wakafutiliwa mbali kwa vitisho.

²⁰Ee Bwana, wamekuwa kama ndoto wakati wa kuamka, Uondokapo utaidharau sanamu yao.

²¹Moyo wangu ulipoona uchungu, Viuno vyangu viliponichoma,

²²Nilikuwa kama mjinga, sijui neno; Nilikuwa kama mnyama tu mbele zako.

²³Walakini mimi ni pamoja nawe daima, Umenishika mkono wa kulia.

²⁴ Utaniongoza kwa shauri lako, Na baadaye utanikaribisha kwa utukufu.

²⁵ Ni nani niliye naye mbinguni, Wala duniani sina cha kupendeza ila Wewe.

²⁶ Mwili wangu na moyo wangu hupunguka, Bali Mungu ni mwamba wa moyo wangu Na sehemu yangu milele.

²⁷Maana wajitengao nawe watapotea; Umewaangamiza wote waliokuacha Wewe.

²⁸ Nami kumkaribia Mungu ni kwema kwangu; Nimefanya kimbilio kwa Bwana MUNGU, Niyahubiri matendo yako yote.