Read kiswahili Zaburi 77 Bible Online

Zaburi 77 - kiswahili bible

Zaburi 77

¹Nimpazie Mungu sauti yangu, Naam, nimpazie Mungu, naye atanisikia.

²⑭ Katika siku ya taabu yangu nilimtafuta Bwana; Mkono wangu ulinyoshwa usiku, bila kulegea; Nafsi yangu ilikataa kufarijika.

³Nilipotaka kumkumbuka Mungu nilifadhaika; Nilipotaka kutafakari roho yangu ilizimia.

⁴Ulizishika kope za macho yangu zisifumbike; Nilitaabika nisiweze kunena.

⁵⑮ Nilifikiri habari za siku za kale, Miaka ya zamani zilizopita.

⁶Nanena na moyo wangu usiku, Nawaza moyoni mwangu, Roho yangu naipeleleza.

⁷Je! Bwana atatutupa milele na milele? Asiwe na fadhili kwetu kamwe?

⁸⑯ Rehema zake zimekoma hata milele? Ahadi yake imekwisha hata vizazi vyote?

⁹⑰ Mungu amesahau fadhili zake? Amezuia kwa hasira rehema zake?

¹⁰⑱ Nikasema, Ndio udhaifu wangu huo; Lakini nitaikumbuka miaka ya mkono wa kulia wake Aliye Juu.

¹¹⑲ Nitayakumbuka matendo ya BWANA; Naam, nitayakumbuka maajabu yako ya kale.

¹²Pia nitaitafakari kazi yako yote; Nitaziwaza habari za matendo yako.

¹³⑳ Ee Mungu, njia yako iko katika utakatifu; Ni Mungu yupi aliye mkuu kama Mungu wetu?

¹⁴Wewe ndiwe Mungu ufanyaye maajabu; Uliudhihirisha uweza wako kati ya mataifa.

¹⁵Kwa mkono wako umewakomboa watu wako, Wana wa Yakobo na Yusufu.

¹⁶ Ee Mungu, yale maji yalikuona, Yale maji yalikuona, yakaogopa. Vilindi vya maji navyo vikatetemeka,

¹⁷Mawingu yakamwaga maji. Mbingu nazo zikatoa sauti, Mishale yako nayo ikatapakaa.

¹⁸Sauti ya radi yako ikawa katika kisulisuli; Umeme uliuangaza ulimwengu. Nchi ilitetemeka na kutikisika;

¹⁹ Njia yako ilikuwa katika bahari. Na mapito yako yalikuwa katika maji makuu; Hatua zako hazikujulikana.

²⁰ Uliwaongoza watu wako kama kundi, Kwa mkono wa Musa na Haruni.