Read kiswahili Zaburi 96 Bible Online

Zaburi 96 - kiswahili bible

Zaburi 96

¹Mwimbieni BWANA wimbo mpya, Mwimbieni BWANA, nchi yote.

²Mwimbieni BWANA, lisifuni jina lake, Tangazeni wokovu wake kila siku.

³Wahubirieni mataifa habari za utukufu wake, Na watu wote habari za maajabu yake.

⁴Kwa kuwa BWANA ni mkuu mwenye kusifiwa sana. Na wa kuhofiwa kuliko miungu yote.

⁵⑧ Maana miungu yote ya watu si kitu, Lakini BWANA ndiye aliyezifanya mbingu.

⁶Heshima na adhama ziko mbele zake, Nguvu na uzuri zimo katika patakatifu pake.

⁷⑩ Mpeni BWANA, enyi jamaa za watu, Mpeni BWANA utukufu na nguvu.

⁸Mpeni BWANA utukufu wa jina lake, Leteni sadaka, na mwingie katika nyua zake.

⁹Mwabuduni BWANA kwa uzuri wa utakatifu, Tetemekeni mbele zake, nchi yote.

¹⁰⑪ Semeni katika mataifa, BWANA ametamalaki; Naam, ulimwengu umethibitika usitikisike, Atawahukumu watu kwa adili.

¹¹Mbingu na zifurahi, nchi na ishangilie, Bahari na ivume na vyote viijazavyo,

¹²Mashamba na yashangilie, na vyote vilivyomo, Ndipo miti yote ya mwituni iimbe kwa furaha;

¹³⑫ Mbele za BWANA, kwa maana anakuja, Kwa maana anakuja aihukumu nchi. Atauhukumu ulimwengu kwa haki, Na mataifa kwa uaminifu wake.