Read kiswahili Mithali 17 Bible Online

Mithali 17 - kiswahili bible

Mithali 17

¹Afadhali mego kavu pamoja na utulivu, Kuliko nyumba yenye karamu nyingi pamoja na magomvi.

²Mtumwa atendaye kwa busara atamtawala mwana atendaye mambo ya aibu; Tena atapata sehemu ya urithi kati ya ndugu.

³⑲ Kalibu ni kwa fedha, na tanuri kwa dhahabu; Bali BWANA huijaribu mioyo.

⁴Mtenda mabaya husikiliza midomo ya uovu; Na mwongo hutega sikio lake kusikiliza ulimi wa madhara.

⁵⑳ Amchekaye maskini humtukana Muumba wake; Naye aufurahiaye msiba hatakosa adhabu.

⁶Wana wa wana ndio taji la wazee, Na utukufu wa watoto ni baba zao.

⁷Maneno mazuri hayapendezi kinywani mwa mpumbavu; Sembuse midomo ya uongo kinywani mwa mkuu.

⁸ Kipawa ni kama kito cha thamani machoni pake yeye aliye nacho; Kila kigeukapo hufanikiwa.

⁹Afunikaye kosa hutafuta kupendwa; Bali yeye afichuaye siri hutenga rafiki.

¹⁰Lawama hupenya moyoni mwa mwenye ufahamu, Kuliko mapigo mia moyoni mwa mpumbavu.

¹¹Mtu mwovu hataki neno ila kuasi tu; Kwa hiyo mjumbe mkali atatumwa kwake.

¹²Afadhali mtu akutwe na dubu jike aliyenyang'anywa watoto wake, Kuliko na mpumbavu katika upumbavu wake.

¹³ Yeye arudishaye mabaya badala ya mema, Mabaya hayataondoka nyumbani mwake.

¹⁴ Mwanzo wa ugomvi ni kama kutoboa penye maji; Basi acheni ugomvi kabla haujafurika.

¹⁵ Yeye asemaye kwamba asiye haki ana haki; naye asemaye kwamba mwenye haki hana haki; Hao wote wawili ni chukizo kwa BWANA.

¹⁶Nini maana yake, mpumbavu kuwa na fedha mkononi mwake ya kununulia hekima, Ikiwa hana moyo wa ufahamu?

¹⁷Rafiki hupenda sikuzote; Na ndugu amezaliwa kwa siku ya taabu.

¹⁸Asiye na hekima hupeana mkono na mtu; Na kuwa mdhamini wa mtu mwingine.

¹⁹Apendaye ugomvi hupenda dhambi; Auinuaye sana mlango wake hutafuta uharibifu.

²⁰Mtu mwenye moyo wa ukaidi hatapata mema; Na mwenye ulimi wa upotovu huanguka katika misiba.

²¹Azaaye mpumbavu ni kwa huzuni yake mwenyewe; Wala baba wa mpumbavu hana furaha.

²²Moyo uliochangamka ni dawa nzuri; Bali roho iliyopondeka huikausha mifupa.

²³ Asiye haki hutoa rushwa kifuani, Ili kuzipotosha njia za hukumu.

²⁴ Hekima huwa machoni pake mwenye ufahamu; Bali macho ya mpumbavu huwa katika ncha za dunia.

²⁵Mwana mpumbavu ni huzuni kwa babaye, Na uchungu kwa mamaye aliyemzaa.

²⁶Tena kumwadhibu mwenye haki si vizuri; Wala si vyema kuwapiga wakuu kwa unyofu wao.

²⁷ Azuiaye maneno yake ni mwenye maarifa; Na mwenye roho ya utulivu ana busara.

²⁸Hata mpumbavu akinyamaza, huhesabiwa hekima; Akifumba midomo yake, huhesabiwa ufahamu.