Read kiswahili Mithali 2 Bible Online

Mithali 2 - kiswahili bible

Mithali 2

¹Mwanangu, kama ukiyakubali maneno yangu, Na kuyaweka akiba maagizo yangu;

²Hata ukatega sikio lako kusikia hekima, Ukauelekeza moyo wako upate kufahamu;

³Naam, ukiita busara, Na kupaza sauti yako upate ufahamu;

⁴ Ukiutafuta kama fedha, Na kuutafutia kama hazina iliyositirika;

⁵Ndipo utakapofahamu kumcha BWANA, Na kupata kumjua Mungu.

⁶ Kwa kuwa BWANA huwapa watu hekima; Kinywani mwake hutoka maarifa na ufahamu;

⁷ Huwawekea wanyofu akiba ya hekima kamili; Yeye ni ngao kwao waendao kwa ukamilifu;

⁸ Apate kuyalinda mapito ya hukumu, Na kuhifadhi njia ya watakatifu wake.

⁹Ndipo utakapofahamu haki na hukumu, Na adili, na kila njia njema.

¹⁰Maana hekima itaingia moyoni mwako, Na maarifa yatakupendeza nafsi yako;

¹¹ Busara itakulinda; Ufahamu utakuhifadhi.

¹²Ili kukuokoa na njia ya uovu, Na watu wanenao yaliyopotoka;

¹³ Watu waziachao njia za unyofu, Ili kuziendea njia za giza;

¹⁴Wafurahio kutenda mabaya; Wapendezwao na upotovu wa waovu;

¹⁵Waliopotoka katika njia zao; Walio wakaidi katika mapito yao.

¹⁶Ili kuokoka na malaya, Naam, malaya mwenye kubembeleza kwa maneno yake;

¹⁷ Amwachaye rafiki wa ujana wake, Na kulisahau agano la Mungu wake.

¹⁸Maana nyumba yake inaelekea mauti, Na mapito yake yanakwenda kwenye wafu.

¹⁹ Katika hao wamwendeao harudi hata mmoja, Wala hawazifikilii njia za uzima.

²⁰ Ili upate kwenda katika njia ya watu wema, Na kuyashika mapito ya wenye haki.

²¹Maana wanyofu watakaa katika nchi, Na wakamilifu watadumu ndani yake.

²²Bali waovu watatengwa na nchi, Nao wafanyao hila watang'olewa.