Read kiswahili Mithali 21 Bible Online

Mithali 21 - kiswahili bible

Mithali 21

¹Moyo wa mfalme huwa katika mkono wa BWANA; Kama mifereji ya maji huugeuza popote apendapo.

²⑮ Kila njia ya mtu ni sawa machoni pake mwenyewe; Bali BWANA huipima mioyo.

³⑯ Kutenda haki na hukumu Humpendeza BWANA kuliko kutoa sadaka.

⁴⑰ Mwenye kiburi na moyo wa majivuno, Taa yake ni dhambi.

⁵Mawazo ya wenye bidii huuelekea utajiri tu; Bali kila mwenye pupa huuelekea uhitaji.

⁶Kupata akiba ya mali kwa ulimi wa uongo Ni moshi upeperushwao; ni kutafuta mauti.

⁷Jeuri ya wabaya itawaondolea mbali; Kwa sababu wamekataa kutenda hukumu.

⁸Njia yake aliyelemewa na dhambi imepotoka sana; Bali mtu aliye safi, kazi yake ni sawasawa.

⁹Ni afadhali kukaa katika pembe ya darini, Kuliko katika nyumba pana pamoja na mwanamke mgomvi.

¹⁰⑱ Nafsi ya mtu mbaya hutamani uovu; Jirani yake hapati fadhili machoni pake.

¹¹Mwenye mzaha aadhibiwapo, mjinga hupata hekima; Na mwenye hekima afundishwapo, hupokea maarifa.

¹²⑲ Mwenye haki huitafakari nyumba ya mtu mbaya; Jinsi wabaya waangushwavyo wakaangamia.

¹³⑳ Azibaye masikio yake asisikie kilio cha maskini, Yeye naye atalia, lakini hatasikiwa.

¹⁴Kipawa cha siri hutuliza hasira; Na rushwa bindoni humliza ghadhabu kali.

¹⁵Ni furaha yao wenye haki kutenda hukumu; Lakini ni uharibifu kwao watendao maovu.

¹⁶Mtu aikosaye njia ya busara Atakaa katika mkutano wao waliokufa.

¹⁷Mtu apendaye anasa atakuwa maskini; Apendaye mvinyo na mafuta hatakuwa tajiri.

¹⁸ Mtu asiye haki ni fidia ya wenye haki; Naye afanyaye hila ni badala ya watu wa adili.

¹⁹Ni afadhali kukaa katika nchi ya nyika; Kuliko na mwanamke mgomvi, mchokozi.

²⁰ Kuna hazina ya thamani na mafuta katika maskani ya mwenye hekima; Bali mwanadamu aliye mpumbavu huyameza.

²¹ Aandamaye haki na fadhili, Ataona uhai na haki na heshima.

²²Mwenye hekima huupandia mji wao wenye nguvu; Na kuziangusha nguvu za tumaini lao.

²³Mtu azuiaye kinywa chake na ulimi wake, Atajilinda nafsi yake na taabu.

²⁴Mwenye kiburi na kutakabari, jina lake ni mbishi; Hutenda mambo katika majivuno ya kiburi chake.

²⁵Matakwa yake mtu mvivu humwua, Kwa maana mikono yake hukataa kufanya kazi.

²⁶Kuna atamaniye kwa choyo mchana kutwa; Bali mwenye haki hutoa wala hanyimi.

²⁷Sadaka ya wasio haki ni chukizo; Si zaidi sana ailetapo mwenye nia mbaya!

²⁸Shahidi wa uongo atapotea; Bali mtu asikiaye atasema maneno yadumuyo.

²⁹Asiye haki huufanya uso wake kuwa mgumu; Bali mtu mnyofu huzifikiri njia zake.

³⁰Hapana hekima, wala ufahamu, Wala shauri, juu ya BWANA.

³¹Farasi huwekwa tayari kwa siku ya vita; Lakini BWANA ndiye aletaye wokovu.