Read kiswahili Mithali 25 Bible Online

Mithali 25 - kiswahili bible

Mithali 25

¹Hizi nazo ni mithali za Sulemani, ambazo watu wa Hezekia, mfalme wa Yuda, walizinakili.

²⑪ Ni utukufu wa Mungu kuficha jambo; Bali ni utukufu wa mfalme kuchunguza jambo.

³Mbingu huenda juu sana, na nchi huenda chini; Lakini mioyo ya wafalme haichunguziki.

⁴Ondoa takataka katika fedha, Na chombo kitatokea kwa mtakasaji;

⁵Mwondoe asiye haki mbele ya mfalme, Na kiti chake cha enzi kitathibitika katika haki.

⁶⑫ Usijitukuze mbele ya uso wa mfalme; Wala usisimame mahali pa watu wakuu;

⁷Kwa maana ni heri kuambiwa, Njoo huku mbele; Kuliko kuwekwa nyuma machoni pa mkuu. Yale uliyoyaona kwa macho,

⁸⑬ Usitoke nje kwa haraka ili kuyashindania; Usije ukakosa kujua la kutenda hatimaye, Mwenzako atakapokuwa amekuaibisha.

⁹⑭ Ujitetee na mwenzako peke yake; Bali usiifunue siri ya mtu mwingine;

¹⁰Yeye asikiaye asije akakutukana; Na aibu yako isiondoke.

¹¹Neno linenwalo wakati ufaao, Ni kama machungwa katika vyano vya fedha.

¹²Kipuli cha dhahabu, na pambo la dhahabu safi; Ndivyo alivyo mwonyaji mwenye hekima kwa sikio lisikialo.

¹³Kama baridi ya theluji wakati wa mavuno; Ndivyo alivyo mjumbe mwaminifu kwao wamtumao; Kwa maana huwaburudisha bwana zake nafsi zao.

¹⁴⑮ Kama mawingu na upepo pasipo mvua; Ndivyo alivyo yeye ajisifiaye karama kwa uongo.

¹⁵Kwa uvumilivu mwingi mkuu husadikishwa; Na ulimi laini huvunja mfupa.

¹⁶Je! Umeona asali? Kula kadiri ya kukutosha; Usije ukashiba na kuitapika.

¹⁷Mguu wako usiingie katika nyumba ya jirani yako ila kwa kiasi; Asije akakukinai na kukuchukia.

¹⁸⑯ Mtu amshuhudiaye jirani yake uongo Ni nyundo, na upanga, na mshale mkali.

¹⁹⑰ Kumtumaini asiye mwaminifu wakati wa taabu Ni kama jino lililovunjika, au mguu ulioteguka.

²⁰⑱ Amwimbiaye nyimbo mtu mwenye moyo mzito, Ni kama yeye avuaye nguo wakati wa baridi; Ni kama siki juu ya magadi.

²¹⑲ Adui yako akiwa ana njaa, mpe chakula; Tena akiwa ana kiu, mpe maji ya kunywa;

²²⑳ Maana utatia makaa ya moto kichwani pake; Na BWANA atakupa thawabu.

²³Upepo wa kusi huleta mvua; Vile vile asingiziaye huleta uso wa ghadhabu.

²⁴Ni afadhali kukaa katika pembe ya darini, Kuliko katika nyumba pana pamoja na mwanamke mgomvi.

²⁵Kama vile maji ya baridi kwa mtu mwenye kiu, Ndivyo ilivyo habari njema itokayo katika nchi ya mbali.

²⁶ Mwenye haki amwangukiapo mtu mbaya Ni kama chemchemi iliyochafuka, Na kisima kilichokanyagwa.

²⁷ Haifai kula asali nyingi mno; Vile vile mtu kutafuta utukufu wake mwenyewe si utukufu.

²⁸Asiyetawala roho yake Ni mfano wa mji uliobomolewa, usio na kuta.