Read kiswahili Mithali 8 Bible Online

Mithali 8 - kiswahili bible

Mithali 8

¹ Je! Hekima halii? Ufahamu hatoi sauti yake?

²Juu ya mahali palipoinuka karibu na njia, Penye njia panda, ndipo asimamapo.

³Karibu na malango, mahali pa kuingia mjini, Mahali pa kuyaingilia malango anapiga kelele.

⁴Enyi watu, nawaita ninyi; Na sauti yangu ni kwa wanadamu.

⁵Enyi wajinga, fahamuni werevu, Nanyi wapumbavu, mpate moyo wa kufahamu.

⁶ Sikilizeni, maana nitasema yaliyo mazuri, Na kufumbua midomo yangu kutakuwa maadili.

⁷ Maana kinywa changu kitasema kweli, Na uovu ni chukizo kwa midomo yangu.

⁸Maneno yote ya kinywa changu yana haki; Hapana hata neno lililopotoka au la ukaidi.

⁹Yote humwelea yule afahamuye, Yote huelekea mbele yao waliopata maarifa.

¹⁰Pokea mafundisho yangu, wala si fedha, Na maarifa kuliko dhahabu safi.

¹¹ Maana hekima ni bora kuliko marijani; Wala vyote vinavyotamanika havilingani nayo.

¹²Mimi, hekima, nimefanya werevu kuwa makao yangu; Natafuta maarifa na busara.

¹³ Kumcha BWANA ni kuchukia uovu; Kiburi na majivuno, na njia mbovu, Na kinywa cha ukaidi pia nakichukia.

¹⁴ Ushauri ni wangu, na maarifa yaliyo sahihi; Mimi ni ufahamu, mimi nina nguvu.

¹⁵ Kwa msaada wangu wafalme humiliki, Na wakuu wanahukumu haki.

¹⁶Kwa msaada wangu wakuu hutawala, Na waungwana, naam, waamuzi wote wa dunia.

¹⁷ Nawapenda wale wanipendao, Na wale wanitafutao kwa bidii wataniona.

¹⁸ Utajiri na heshima ziko kwangu, Naam, utajiri udumuo, na haki pia.

¹⁹ Matunda yangu ni bora kuliko dhahabu, naam, dhahabu safi, Na faida yangu ni bora kuliko fedha iliyo safi.

²⁰Natembea katika njia ya haki, Katikati ya mapito ya hukumu.

²¹Niwarithishe mali wale wanipendao, Tena nipate kuzijaza hazina zao.

²² BWANA alikuwa nami katika mwanzo wa njia yake, Kabla ya matendo yake ya kale.

²³ Nilitukuka tokea milele, tangu awali, Kabla haijakuwako dunia.

²⁴Wakati havijakuwapo vilindi nilizaliwa, Wakati hazijakuwapo chemchemi zilizojaa maji.

²⁵ Kabla milima haijawekwa imara, Kabla ya vilima nilizaliwa.

²⁶Alipokuwa hajaiumba dunia, wala mashamba Wala chanzo cha udongo wa dunia;

²⁷Alipozithibitisha mbingu nilikuwako; Alipopiga duara katika uso wa bahari;

²⁸Alipofanya imara mawingu yaliyo juu; Chemchemi za bahari zilipopata nguvu;

²⁹ Alipoipa bahari mpaka wake, Kwamba maji yake yasiasi amri yake; Alipoiagiza misingi ya nchi;

³⁰ Ndipo nilipokuwa pamoja naye, kama stadi wa kazi; Nikawa furaha yake kila siku; Nikifurahi daima mbele zake;

³¹ Nikiifurahia dunia inayokaliwa na watu; Na furaha yangu ilikuwa pamoja na wanadamu.

³² Basi, wanangu, nisikilizeni sasa; Maana heri hao wazishikao amri zangu.

³³Sikieni mafundisho, mpate hekima, Wala msiikatae.

³⁴Ana heri mtu yule anisikilizaye, Akisubiri sikuzote malangoni pangu, Akingoja penye vizingiti vya milango yangu.

³⁵ Maana yeye anionaye mimi aona uzima, Naye atapata kibali kwa BWANA.

³⁶ Bali anikosaye hujidhuru nafsi yake mwenyewe, Na wao wanichukiao hupenda mauti.