Read kiswahili Mhubiri 1 Bible Online

Mhubiri 1 - kiswahili bible

Mhubiri 1

¹Maneno ya Mhubiri[1] mwana wa Daudi, mfalme katika Yerusalemu

² Mhubiri asema, Ubatili mtupu, ubatili mtupu, mambo yote ni ubatili.

³ Mtu ana faida gani ya kazi yake yote aifanyayo chini ya jua?

⁴ Kizazi huenda, kizazi huja; nayo dunia hudumu daima.

⁵ Jua lachomoza, na jua lashuka, na kufanya haraka kwenda mahali pa maawio yake.

⁶ Upepo huvuma kuelekea kusini, kisha huvuma kuelekea kaskazini; hugeuka daima katika mwendo wake, nao huyarudia mazunguko yake.

⁷ Mito yote huingia baharini, lakini bahari haijai; huko iendako mito, ndiko irudiko tena.

⁸ Mambo yote yamejaa uchovu usioneneka, jicho halishibi kuona, wala sikio halikinai kusikia.

⁹ Yaliyokuwako ndiyo yatakayokuwako; na yaliyotendeka ndiyo yatakayotendeka; wala jambo jipya hakuna chini ya jua.

¹⁰Je! Kuna jambo lolote ambalo watu husema juu yake, Tazama, ni jambo jipya? Limekwisha kuwako, tangu zamani za kale zilizokuwa kabla yetu sisi.

¹¹Hakuna kumbukumbu lolote la vizazi vilivyotangulia; wala hakutakuwa na kumbukumbu lolote la vizazi vitakavyokuja, miongoni mwao wale watakaofuata baadaye.

¹²Mimi, Mhubiri, nilikuwa Mfalme wa Israeli katika Yerusalemu.

¹³ Nikatia moyo wangu ili kuyatafuta yote yanayotendeka chini ya mbingu, na kuyavumbua kwa hekima; ni taabu kubwa ambayo Mungu amewapa wanadamu, ili kutaabika ndani yake.

¹⁴Nimeziona kazi zote zifanywazo chini ya jua; na, tazama, mambo yote ni ubatili na kufukuza upepo.[2]

¹⁵ Yaliyopotoka hayawezi kunyoshwa, Wala yasiyokuwapo hayahesabiki.

¹⁶ Nikatafakari nikisema, Nimejipatia hekima nyingi kupita wote walionitangulia katika Yerusalemu; naam, moyo wangu umeona kwa wingi hekima na maarifa.

¹⁷ Nikatia moyo wangu ili kuijua hekima, na kujua wazimu na upumbavu; nikatambua ya kwamba hayo yote nayo ni kufukuza upepo.

¹⁸ Yaani, Katika wingi wa hekima mna wingi wa huzuni; Naye aongezaye maarifa huongeza masikitiko.