Read kiswahili Isaya 3 Bible Online

Isaya 3 - kiswahili bible

Isaya 3

¹③ Kwa maana, tazama, Bwana, BWANA wa majeshi, awaondolea Yerusalemu na Yuda egemeo na tegemeo; tegemeo lote la chakula na tegemeo lote la maji;

²mtu hodari na mtu wa vita; mwamuzi na nabii; mpiga ramli na mzee;

³jemadari aliye juu ya watu hamsini, na mtu mstahifu, na mshauri, na fundi aliye stadi, na mganga ajuaye uganga sana.

⁴④ Nami nitawapa watoto kuwamiliki, na watoto wachanga kuwatawala.

⁵⑤ Nao watu wataonewa, kila mtu na mwenziwe, na kila mtu na jirani yake; mtoto atajivuna mbele ya mzee, na mtu mnyonge mbele ya mtu mwenye heshima.

⁶Mtu atakapomshika ndugu yake ndani ya nyumba ya baba yake, akisema, Wewe una nguo, ututawale wewe; na mahali hapa palipobomoka pawe chini ya mkono wako;

⁷basi, siku ile atainua sauti yake, akisema, Mimi sitakuwa mponya watu; kwa maana ndani ya nyumba yangu hamna chakula wala mavazi; wala hamtanifanya kuwa mtawala juu ya watu hawa.

⁸Kwa maana Yerusalemu umebomolewa na Yuda wameanguka, kwa sababu ulimi wao na matendo yao ni kinyume cha BWANA, hata wakayachukiza macho ya utukufu wake.

⁹Kuonekana kwa nyuso zao kwashuhudia juu yao, wafunua dhambi yao kama Sodoma, hawaifichi. Ole wa nafsi zao, kwa maana wamejilipa nafsi zao uovu.

¹⁰Waambieni wenye haki ya kuwa watakuwa heri, kwa maana watakula matunda ya matendo yao

¹¹Ole wake mtu mbaya; shari itakuwa kwake, kwa maana atapewa malipo ya mikono yake.

¹²Kuhusu watu wangu, watoto ndio wanaowaonea, na wanawake ndio wanaowatawala. Enyi watu wangu, wakuongozao wakukosesha, waiharibu njia ya mapito yako.

¹³BWANA asimama ili atete, asimama ili awahukumu watu.

¹⁴⑥ BWANA ataingia katika kuwahukumu wazee wa watu wake na wakuu wao; Ninyi ndinyi mliokula shamba la mizabibu; vitu mlivyowateka maskini vi ndani ya nyumba zenu.

¹⁵Ni nini maana yake, ninyi kuwaonea watu wangu, na kuponda nyuso za maskini? Asema Bwana, BWANA wa majeshi.

¹⁶BWANA akasema tena, Kwa sababu binti za Sayuni wana kiburi, na kuenda na shingo zilizonyoshwa, na macho ya kutamani, wakienda kwa hatua za madaha, na kuliza njuga kwa miguu yao;

¹⁷Basi, kwa hiyo, Bwana atawapiga binti za Sayuni kwa pele za utosini, na BWANA ataifunua aibu yao.

¹⁸Siku hiyo BWANA atawaondolea uzuri wa njuga zao, na kaya zao;

¹⁹na pete za masikio, na vikuku, na mataji yao;

²⁰na dusumali, na mafurungu, na vitambi, na vibweta vya marashi, na matalasimu;

²¹na pete, na azama,

²²na mavazi ya sikukuu, na debwani; na shali, na vifuko;

²³na vioo vidogo, na kitani nzuri, na vilemba, na utaji.

²⁴Hata itakuwa ya kuwa badala ya manukato mazuri kutakuwa uvundo, na badala ya mishipi, kamba; na badala ya nywele zilizosukwa vizuri, upaa; na badala ya kisibau, mavazi ya kigunia; na kutiwa alama mwilini kwa moto badala ya uzuri.

²⁵Watu wako wanaume wataanguka kwa upanga, na mashujaa wako vitani.

²⁶⑦ Na malango yake yatalia na kuomboleza, naye atakuwa ukiwa, atakaa chini.