Read kiswahili Hesabu 13 Bible Online

Hesabu 13 - kiswahili bible

Hesabu 13

¹Kisha BWANA akanena na Musa, akamwambia,

²⑬ Tuma watu, ili waende wakaipeleleze nchi ya Kanaani, niwapayo wana wa Israeli; katika kabila la baba zao mtamtuma mtu mmoja, kila mtu na awe mkuu kati yao.

³Basi Musa akawatuma kutoka nyika ya Parani kama alivyoagizwa na BWANA; wote walikuwa ni watu walio vichwa vya wana wa Israeli.

⁴Na majina yao ni haya; katika kabila la Reubeni, Shamua mwana Zakuri.

⁵Katika kabila la Simeoni, Shafati mwana wa Hori.

⁶⑭ Katika kabila la Yuda, Kalebu mwana wa Yefune.

⁷Katika kabila la Isakari, Igali mwana wa Yusufu.

⁸Katika kabila la Efraimu, Hoshea mwana wa Nuni

⁹Katika kabila la Benyamini, Palti mwana wa Rafu.

¹⁰Katika kabila la Zabuloni, Gadieli mwana wa Sodi.

¹¹Katika kabila la Yusufu, yaani, katika kabila la Manase, Gadi mwana wa Susi.

¹²Katika kabila la Dani, Amieli mwana wa Gemali.

¹³Katika kabila la Asheri, Sethuri mwana wa Mikaeli.

¹⁴Katika kabila la Naftali, Nabi mwana wa Wofsi.

¹⁵Katika kabila la Gadi, Geueli mwana wa Maki.

¹⁶⑮ Hayo ndiyo majina ya hao watu waliotumwa na Musa waende kuipeleleza nchi. Na huyo Hoshea mwana wa Nuni, Musa akamwita jina lake Yoshua.

¹⁷⑯ Musa akawatuma ili waipeleleze nchi ya Kanaani, akawaambia, Pandeni sasa katika Negebu mkapande milimani,

¹⁸mkaitazame nchi ni ya namna gani; na watu wanaokaa ndani yake, kama ni wenye nguvu au dhaifu, kama ni wengi au wachache;

¹⁹na nchi wanayoikaa kama ni nzuri au mbaya na kama wanakaa katika kambi au katika ngome;

²⁰⑰ nayo nchi ni ya namna gani, kama ni nchi ya utajiri au ya umaskini; kama ina misitu au haina. Kuweni na mioyo ujasiri, mkayalete matunda ya nchi. Basi wakati ule ulikuwa wakati wa kuiva zabibu za kwanza.

²¹Basi wakapanda wakaipeleleza nchi toka jangwa la Sini hadi Rehobu, mpaka kuingia Hamathi.

²²⑱ Wakapanda katika Negebu, wakafika Hebroni; na Ahimani, na Sheshai, na Talmai, wana wa Anaki, walikuwako huko. Nao Hebroni ulijengwa miaka saba kabla ya Soani wa Misri.

²³Wakafika bonde la Eshkoli, na huko wakakata tawi lenye kishada kimoja cha zabibu, wakalichukua kwa mti kati ya watu wawili; wakaleta makomamanga pia, na tini.

²⁴Bonde lile liliitwa bonde la Eshkoli[24] kwa sababu ya hicho kishada walichokata huko wana wa Israeli.

²⁵Wakarejea baada ya kuipeleleza nchi, mwisho wa siku arubaini.

²⁶Wakaenda wakafika kwa Musa, na kwa Haruni, na kwa mkutano wote wa wana wa Israeli, katika jangwa la Parani, huko Kadeshi; wakawaletea habari, wao na mkutano wote, wakawaonesha matunda ya nchi.

²⁷⑲ Wakamwambia wakasema, Tulifika nchi ile uliyotutuma, kwa hakika, ni nchi yenye wingi wa maziwa na asali, uthibitisho, haya ndiyo matunda yake.

²⁸⑳ Lakini watu wanaokaa katika nchi ile ni wenye nguvu, na miji yao ina maboma, nayo ni makubwa sana; na pamoja na hayo tuliwaona wana wa Anaki huko.

²⁹ Amaleki anakaa katika nchi ya Negebu; na Mhiti, na Myebusi, na Mwamori wanakaa katika milima, na Mkanaani anakaa karibu na bahari; na kando ya ukingo wa Yordani.

³⁰ Kalebu akawatuliza watu mbele ya Musa, akasema, Na tupande mara moja tukaimiliki; maana twaweza kushinda bila shaka.

³¹Bali wale watu waliopanda pamoja naye wakasema, Hatuwezi kupanda tupigane na watu hawa; kwa maana wana nguvu kuliko sisi.

³² Wakawaletea wana wa Israeli habari mbaya ya ile nchi waliyoipeleleza, wakasema, Ile nchi tuliyopita kati yake ili kuipeleleza, ni nchi inayowala wakazi wake; na watu wote tuliowaona ndani yake ni watu wakubwa mno.

³³ Kisha, huko tuliwaona Wanefili, wana wa Anaki, waliotoka kwa hao Wanefili; tukajiona nafsi zetu kuwa kama mapanzi; nao ndivyo walivyotuona sisi.