Read kiswahili Mathayo 24 Bible Online

Mathayo 24 - kiswahili bible

Mathayo 24

¹ Yesu akaenda zake, akatoka hekaluni; wanafunzi wake wakamwendea ili kumwonesha majengo ya hekalu.

² Naye akajibu akawaambia, Hamyaoni haya yote? Amin, nawaambieni, Halitasalia hapa jiwe juu ya jiwe ambalo halitabomolewa.

³Hata alipokuwa ameketi katika mlima wa Mizeituni, wanafunzi wake wakamwendea kwa faragha, wakisema, Tuambie, mambo hayo yatakuwa lini? Nayo ni nini dalili ya kuja kwako, na ya mwisho wa dunia?

⁴Yesu akajibu, akawaambia, Angalieni, mtu asiwadanganye.

⁵ Kwa sababu wengi watakuja kwa jina langu, wakisema, Mimi ni Kristo; nao watadanganya wengi.

⁶ Nanyi mtasikia habari za vita na tetesi za vita; angalieni, msitishwe; maana hayo hayana budi kutukia; lakini ule mwisho bado.

⁷ Kwa maana taifa litaondoka kupigana na taifa, na ufalme kupigana na ufalme; kutakuwa na njaa, na mitetemeko ya ardhi sehemu mbalimbali.

⁸Hayo yote ndiyo mwanzo wa uchungu.

⁹ Wakati huo watawasaliti ninyi mpate dhiki, nao watawaua; nanyi mtakuwa watu wa kuchukiwa na mataifa yote kwa ajili ya jina langu.

¹⁰ Ndipo wengi watakapojikwaa, nao watasalitiana, na kuchukiana.

¹¹ Na manabii wengi wa uongo watatokea, na kudanganya wengi.

¹² Na kwa sababu ya kuongezeka maasi, upendo wa wengi utapunguka.

¹³ Lakini mwenye kuvumilia hata mwisho, ndiye atakayeokoka.

¹⁴ Tena Habari Njema ya ufalme itahubiriwa katika ulimwengu wote, kuwa ushuhuda kwa mataifa yote; hapo ndipo ule mwisho utakapokuja.

¹⁵ Basi hapo mtakapoliona chukizo la uharibifu, lile lililonenwa na nabii Danieli, limesimama katika patakatifu (asomaye na afahamu),

¹⁶ndipo walio katika Yudea na wakimbilie milimani;

¹⁷ naye aliye juu ya dari asishuke kuvichukua vitu vilivyomo nyumbani mwake;

¹⁸wala aliye shambani asirudi nyuma kuichukua nguo yake.

¹⁹Ole wao wenye mimba na wanyonyeshao siku hizo!

²⁰ Ombeni, ili kukimbia kwenu kusiwe wakati wa baridi, wala siku ya sabato.

²¹ Kwa kuwa wakati huo kutakuwapo dhiki kubwa, ambayo haijatokea namna yake tangu mwanzo wa ulimwengu hata sasa, wala haitakuwapo kamwe.

²²Na kama siku hizo zisingalifupishwa, asingeokoka mtu yeyote; lakini kwa ajili ya wateule siku hizo zitafupishwa.

²³Wakati huo mtu akiwaambia, Tazama, Kristo yupo hapa, au yuko kule msisadiki.

²⁴ Kwa maana watatokea Makristo wa uongo, na manabii wa uongo, nao watatoa ishara kubwa na maajabu; wapate kuwapoteza, ikiwezekana, hata walio wateule.

²⁵Tazama, nimekwisha kuwaonya mbele.

²⁶ Basi wakiwaambia, Yuko jangwani, msitoke; yumo nyumbani, msisadiki.

²⁷Kwa maana kama vile umeme utokavyo mashariki ukaonekana hata magharibi, hivyo ndivyo kutakavyokuwa kuja kwake Mwana wa Adamu.

²⁸ Kwa kuwa popote ulipo mzoga, ndipo watakapokusanyika tai.

²⁹ Lakini mara tu, baada ya dhiki ya siku zile, jua litatiwa giza, na mwezi hautatoa mwanga wake, na nyota zitaanguka kutoka mbinguni, na nguvu za mbinguni zitatikisika;

³⁰① ndipo itakapoonekana ishara yake Mwana wa Adamu mbinguni; ndipo mataifa yote ya ulimwengu watakapoomboleza, nao watamwona Mwana wa Adamu akija juu ya mawingu ya mbinguni pamoja na nguvu na utukufu mwingi.

³¹② Naye atawatuma malaika wake pamoja na sauti kuu ya parapanda, nao watawakusanya wateule wake toka pepo nne, toka mwisho huu wa mbingu mpaka mwisho huu.

³²Basi kwa mtini jifunzeni mfano; tawi lake likiisha kuchipuka na kuchanua majani, mnatambua ya kuwa wakati wa mavuno uko karibu;

³³nanyi kadhalika, myaonapo mambo hayo yote, tambueni ya kuwa yuko karibu, katika malango.

³⁴Amin, nawaambia, Kizazi hiki hakitapita, hata hayo yote yatakapotimia.

³⁵③ Mbingu na nchi zitapita; lakini maneno yangu hayatapita kamwe.

³⁶④ Lakini kuhusu siku ile na saa ile hakuna aijuaye, hata malaika walio mbinguni, wala Mwana, ila Baba peke yake.

³⁷⑤ Kwa maana kama vile ilivyokuwa siku za Nuhu, ndivyo kutakavyokuwa kuja kwake Mwana wa Adamu.

³⁸⑥ Kwa kuwa kama vile siku zile zilizokuwa kabla ya Gharika watu walivyokuwa wakila, na kunywa, wakioa na kuolewa, hadi siku ile aliyoingia Nuhu katika safina,

³⁹⑦ wasitambue, hata Gharika ikaja, ikawachukua wote, ndivyo kutakavyokuwa kuja kwake Mwana wa Adamu.

⁴⁰⑧ Wakati ule watu wawili watakuwako shambani; mmoja atwaliwa, mmoja aachwa;

⁴¹wanawake wawili watakuwa wakisaga; mmoja atwaliwa, mmoja aachwa.

⁴²⑩ Kesheni basi; kwa maana hamjui ni siku ipi atakayokuja Bwana wenu.

⁴³⑪ Lakini fahamuni neno hili; kama mwenye nyumba angaliujua ule wakati mwizi atakaokuja, angalikesha, wala asingaliiacha nyumba yake kuvunjwa.

⁴⁴⑫ Kwa sababu hiyo ninyi nanyi jiwekeni tayari; kwa kuwa katika saa msiyotazamia Mwana wa Adamu yuaja.

⁴⁵Ni nani basi yule mtumwa mwaminifu mwenye akili, ambaye bwana wake alimweka juu ya nyumba yake, awape watu chakula kwa wakati wake?

⁴⁶Heri mtumwa yule, ambaye bwana wake ajapo atamkuta akifanya hivyo.

⁴⁷⑬ Amin, nawaambieni, atamweka juu ya vitu vyake vyote.

⁴⁸⑭ Lakini mtumwa yule mbaya akisema moyoni mwake, Bwana wangu anakawia;

⁴⁹akaanza kuwapiga watumwa wenzake, na kula na kunywa pamoja na walevi;

⁵⁰bwana wake mtumwa huyo atakuja siku asiyotazamia, na saa asiyojua,

⁵¹⑮ atamkata vipande viwili, na kumwekea fungu lake pamoja na wanafiki; ndiko kutakuwako kilio na kusaga meno.