Read kiswahili Mathayo 27 Bible Online

Mathayo 27 - kiswahili bible

Mathayo 27

¹ Na ilipokuwa asubuhi, wakuu wa makuhani wote na wazee wa watu wakafanya shauri juu ya Yesu, wapate kumwua;

² wakamfunga, wakamchukua, wakampeleka kwa Pilato aliyekuwa mtawala.

³ Kisha Yuda, yule mwenye kumsaliti, alipoona ya kuwa amekwisha kuhukumiwa, alijuta, akawarudishia wakuu wa makuhani na wazee vile vipande thelathini vya fedha, akasema, Nilikosa nilipoisaliti damu isiyo na hatia.

⁴Wakasema, Basi, haya yatuhusu nini sisi? Yaangalie haya wewe mwenyewe.

⁵ Akavitupa vile vipande vya fedha katika hekalu, akaondoka; akaenda, akajinyonga.

⁶ Wakuu wa makuhani wakavitwaa vile vipande vya fedha, wakasema, Si halali kuviweka katika sanduku ya sadaka, kwa kuwa ni fedha ya damu.

⁷Wakafanya shauri, wakavitumia kwa kununua shamba la mfinyanzi liwe mahali pa kuzika wageni.

⁸ Kwa hiyo shamba lile huitwa shamba la damu hata leo.

⁹ Ndipo likatimia neno lililonenwa na nabii Yeremia, akisema, Wakavitwaa vipande thelathini vya fedha, kima chake aliyetiwa kima, ambaye baadhi ya Waisraeli walimtia kima;

¹⁰wakavitumia kwa kununua shamba la mfinyanzi, kama Bwana alivyoniagiza.

¹¹ Naye Yesu akasimama mbele ya mtawala; mtawala akamwuliza, akasema, Wewe ndiwe mfalme wa Wayahudi? Yesu akamwambia, Wewe wasema.

¹² Lakini aliposhitakiwa na wakuu wa makuhani na wazee, hakujibu hata neno.

¹³Ndipo Pilato akamwambia, Husikii ni mambo mangapi wanayoshuhudia juu yako?

¹⁴ Asimjibu hata neno moja, hata mtawala akastaajabu sana.

¹⁵ Basi wakati wa sikukuu, mtawala desturi yake huwafungulia mkutano mfungwa mmoja waliyemtaka.

¹⁶Basi palikuwa na mfungwa mashuhuri siku zile, aitwaye Baraba.

¹⁷Basi walipokutanika, Pilato akawaambia, Mnataka niwafungulie yupi? Yule Baraba, au Yesu aitwaye Kristo?

¹⁸ Kwa maana alijua ya kuwa wamemtoa kwa ajili ya husuda.

¹⁹Na alipokuwa ameketi juu ya kiti cha hukumu, mkewe alimpelekea mjumbe, kumwambia, Usiwe na neno na yule mwenye haki; kwa sababu nimeteswa mengi leo katika ndoto kwa ajili yake.

²⁰Nao wakuu wa makuhani na wazee wakawashawishi makutano ili wamtake Baraba, na kumwangamiza Yesu.

²¹Basi mtawala akajibu, akawaambia, Mnataka niwafungulie yupi kati ya hawa wawili? Wakasema, Baraba.

²²Pilato akawaambia, Basi, nimtendeje Yesu aitwaye Kristo? Wakasema wote, Asulubiwe.

²³Akasema, Kwa nini? Ni ubaya gani alioutenda? Wakazidi sana kupiga kelele, wakisema, Na asulubiwe.

²⁴ Basi Pilato alipoona ya kuwa hafai lolote, bali ghasia inazidi tu, akatwaa maji, akanawa mikono yake mbele ya mkutano, akasema, Mimi sina hatia katika damu ya mtu huyu mwenye haki; yaangalieni haya ninyi wenyewe.

²⁵ Watu wote wakajibu wakasema, Damu yake na iwe juu yetu, na juu ya watoto wetu.

²⁶Ndipo akawafungulia Baraba; na baada ya kumpiga Yesu mijeledi, akamtoa ili asulubiwe.

²⁷① Ndipo askari wa mtawala wakamchukua Yesu ndani ya Praitorio,[8] wakamkusanyikia kikosi kizima.

²⁸Wakamvua nguo, wakamvika vazi jekundu.

²⁹Wakasokota taji la miiba, wakaliweka juu ya kichwa chake, na mwanzi katika mkono wake wa kulia; wakapiga magoti mbele yake, wakamdhihaki, wakisema, Salamu, Mfalme wa Wayahudi!

³⁰② Kisha wakamtemea mate, wakautwaa ule mwanzi, wakampigapiga kichwani.

³¹③ Walipokwisha kumdhihaki, wakalivua lile vazi, wakamvika mavazi yake, wakamchukua kumsulubisha.

³²Walipokuwa wakitoka, wakamwona mtu Mkirene, jina lake Simoni; huyu wakamshurutisha auchukue msalaba wake.

³³Na walipofika mahali paitwapo Golgotha, yaani, Fuvu la Kichwa,

³⁴④ wakampa kunywa divai iliyochanganyika na nyongo; lakini yeye alipoionja hakutaka kunywa.

³⁵⑤ Walipokwisha kumsulubisha, waligawana mavazi yake, kwa kupiga kura; [ili litimie neno lililonenwa na nabii, Waligawa nguo zangu kati yao, na juu ya vazi langu walipiga kura.]

³⁶Wakaketi, wakamlinda huko.

³⁷Wakaweka juu ya kichwa chake mashitaka yake, yaliyoandikwa HUYU NI YESU, MFALME WA WAYAHUDI.

³⁸⑥ Wakati uo huo wanyang'anyi wawili wakasulubiwa pamoja naye, mmoja katika mkono wake wa kulia, na mmoja katika mkono wake wa kushoto.

³⁹⑦ Nao waliokuwa wakipita njiani wakamtukana, wakitikisatikisa vichwa vyao, wakisema,

⁴⁰⑧ Ewe mwenye kulivunja hekalu na kulijenga kwa siku tatu, jiokoe nafsi yako; ukiwa ndiwe Mwana wa Mungu, shuka msalabani.

⁴¹Kadhalika na wale wakuu wa makuhani wakamdhihaki pamoja na waandishi na wazee, wakisema, Aliokoa wengine, hawezi kujiokoa mwenyewe.

⁴²Yeye ni mfalme wa Israeli; na ashuke sasa msalabani, nasi tutamwamini.

⁴³⑩ Amemtegemea Mungu; na amwokoe sasa, kama anamtaka; kwa maana alisema, Mimi ni Mwana wa Mungu.

⁴⁴Pia wale wanyang'anyi waliosulubiwa pamoja naye walimshutumu vile vile.

⁴⁵Basi tangu saa sita palikuwa na giza juu ya nchi yote hadi saa tisa.

⁴⁶⑪ Na kama saa tisa, Yesu akapaza sauti yake kwa nguvu akisema, Eloi, Eloi, lama sabakthani? Yaani, Mungu wangu, Mungu wangu, mbona umeniacha?

⁴⁷Na baadhi yao waliokuweko, waliposikia, walisema, Huyu anamwita Eliya.

⁴⁸⑫ Mara mmoja wao akaenda mbio, akatwaa sifongo, akaijaza siki, akaitia juu ya mwanzi, akamnywesha.

⁴⁹Wale wengine wakasema, Acha; na tuone kama Eliya anakuja kumwokoa.

⁵⁰Naye Yesu akiisha kupaza sauti tena kwa nguvu, akaitoa roho yake.

⁵¹⑬ Na tazama, pazia la hekalu likapasuka vipande viwili toka juu hadi chini; nchi ikatetemeka; miamba ikapasuka;

⁵²makaburi yakafunuka; ikainuka miili mingi ya watakatifu waliolala;

⁵³⑭ nao wakiisha kutoka makaburini mwao, baada ya kufufuka kwake, wakauingia mji mtakatifu, wakawatokea wengi.

⁵⁴Basi yule afisa, na hao waliokuwa pamoja naye wakimlinda Yesu, walipoliona tetemeko la ardhi na mambo yaliyofanyika, wakaogopa sana, wakisema, Hakika huyu alikuwa Mwana wa Mungu.

⁵⁵⑮ Palikuwa na wanawake wengi pale wakitazama kwa mbali, hao ndio waliomfuata Yesu toka Galilaya, na kumtumikia.

⁵⁶⑯ Miongoni mwao alikuwamo Mariamu Magdalene, na Mariamu mama yao Yakobo na Yusufu, na mama yao wana wa Zebedayo.

⁵⁷⑰ Na ilipokuwa jioni akafika mtu tajiri wa Arimathaya, jina lake Yusufu, naye mwenyewe alikuwa mwanafunzi wa Yesu;⑱

⁵⁸mtu huyu alimwendea Pilato akaomba apewe mwili wa Yesu. Ndipo Pilato akaamuru apewe.

⁵⁹Yusufu akautwaa mwili, akauzongazonga katika sanda ya kitani safi,

⁶⁰⑲ akauweka katika kaburi lake jipya, alilokuwa amelichonga mwambani; akavingirisha jiwe kubwa mbele ya mlango wa kaburi, akaenda zake.

⁶¹Na pale walikuwapo Mariamu Magdalene, na Mariamu yule wa pili, wameketi kulielekea kaburi.

⁶²Hata siku ya pili, ndiyo iliyo baada ya Maandalio, wakuu wa makuhani, na Mafarisayo wakamkusanyikia Pilato,

⁶³⑳ wakasema, Bwana, tumekumbuka kwamba yule mjanja alisema, alipokuwa angali hai, Baada ya siku tatu nitafufuka.

⁶⁴Basi amuru kwamba kaburi lilindwe salama hadi siku ya tatu; wasije wanafunzi wake wakamwiba, na kuwaambia watu, Amefufuka katika wafu; na udanganyifu wa mwisho utapita ule wa kwanza.

⁶⁵Pilato akawaambia, Mna askari; nendeni mkalilinde salama kadiri mjuavyo.

⁶⁶ Wakaenda, wakalilinda kaburi salama, kwa kulitia lile jiwe mhuri, pamoja na kuwaweka wale askari walinzi.