Read kiswahili Mathayo 5 Bible Online

Mathayo 5 - kiswahili bible

Mathayo 5

¹ Naye alipowaona makundi ya watu, alipanda mlimani; na alipokwisha kuketi, wanafunzi wake walimjia;

²akafumbua kinywa chake, akawafundisha, akisema,

³ Heri walio maskini wa roho; Maana ufalme wa mbinguni ni wao.

⁴ Heri wenye huzuni; Maana hao watafarijika.

⁵ Heri wenye upole; Maana hao watairithi nchi.

⁶ Heri wenye njaa na kiu ya haki; Maana hao watashibishwa.

⁷ Heri wenye rehema; Maana hao watapata rehema.

⁸ Heri wenye moyo safi; Maana hao watamwona Mungu.

⁹ Heri wapatanishi; Maana hao wataitwa wana wa Mungu.

¹⁰ Heri wenye kuudhiwa kwa ajili ya haki; Maana ufalme wa mbinguni ni wao.

¹¹① Heri ninyi watakapowashutumu na kuwaudhi na kuwanenea kila neno baya kwa uongo, kwa ajili yangu.

¹²② Furahini, na kushangilia; kwa kuwa thawabu yenu ni kubwa mbinguni; kwa maana ndivyo walivyowaudhi manabii waliokuwa kabla yenu.

¹³③ Ninyi ni chumvi ya dunia; lakini chumvi ikipoteza ladha yake, ladha hiyo itarudishwa vipi? Haifai tena kabisa, ila kutupwa nje na kukanyagwa na watu.

¹⁴④ Ninyi ni nuru ya ulimwengu. Mji ukiwa juu ya mlima hauwezi kusitirika.

¹⁵⑤ Wala watu hawawashi taa na kuiweka chini ya pishi, bali juu ya kiango; nayo yawaangaza wote waliomo nyumbani.

¹⁶⑥ Vivyo hivyo nuru yenu na iangaze mbele ya watu, wapate kuyaona matendo yenu mema, wamtukuze Baba yenu aliye mbinguni.

¹⁷⑦ Msidhani ya kuwa nilikuja kuitangua Torati au Manabii; la, sikuja kutangua, bali kutimiliza.

¹⁸⑧ Kwa maana, amin,[1] nawaambia, Mpaka mbingu na nchi zitakapoondoka, yodi moja wala nukta moja ya torati haitaondoka, hata yote yatimie.

¹⁹⑩ Basi mtu yeyote atakayevunja amri moja katika hizi zilizo ndogo, na kuwafundisha watu hivyo, ataitwa mdogo kabisa katika ufalme wa mbinguni; bali mtu atakayezitenda na kuzifundisha, huyo ataitwa mkubwa katika ufalme wa mbinguni.

²⁰Maana nawaambia ya kwamba, Haki yenu isipozidi hiyo haki ya Waandishi na Mafarisayo, hamtaingia kamwe katika ufalme wa mbinguni.

²¹⑪ Mmesikia watu wa kale walivyoambiwa, Usiue, na mtu akiua, itampasa hukumu.

²²⑫ Bali mimi nawaambieni, Kila amkasirikiaye ndugu yake itampasa hukumu; na mtu akimtusi ndugu yake, anastahili kuhukumiwa na baraza; na mtu akimwambia nduguye, Ewe mpumbavu, anastahili kuingia katika moto wa Jehanamu.

²³⑬ Basi ukileta sadaka yako madhabahuni, ukikumbuka ya kuwa ndugu yako ana neno juu yako,

²⁴iache sadaka yako mbele ya madhabahu, uende zako, upatane kwanza na ndugu yako, kisha urudi uitoe sadaka yako.

²⁵⑭ Patana na mshitaki wako upesi, wakati uwapo pamoja naye njiani; yule mshitaki asije akakupeleka kwa hakimu, na hakimu akakupeleka kwa askari, ukatupwa gerezani.

²⁶Amin, nakuambia, Hutoki humo kamwe hadi utakapolipa senti ya mwisho.

²⁷⑮ Mmesikia kwamba imenenwa, Usizini;

²⁸⑯ lakini mimi nawaambia, Kila mtu atazamaye mwanamke kwa kumtamani, amekwisha kuzini naye moyoni mwake.

²⁹⑰ Jicho lako la kulia likikukosesha, ling'oe ulitupe mbali nawe; kwa maana yakufaa kiungo chako kimoja kipotee kuliko mwili wako wote utupwe katika Jehanamu.

³⁰⑱ Na mkono wako wa kulia ukikukosesha, ukate uutupe mbali nawe; kwa maana yakufaa kiungo chako kimoja kipotee kuliko mwili wako wote kutupwa katika Jehanamu.

³¹⑲ Imenenwa pia, Mtu akimwacha mkewe, na ampe hati ya talaka;

³²⑳ lakini mimi nawaambia, Kila mtu amwachaye mkewe, isipokuwa kwa sababu ya uasherati, amfanya kuwa mzinzi; na mtu akimwoa yule aliyeachwa, azini.

³³ Tena mmesikia watu wa kale walivyoambiwa, Usiape uongo, ila mtimizie Bwana viapo vyako;

³⁴ lakini mimi nawaambia, Usiape kabisa; hata kwa mbingu, kwa maana ndicho kiti cha enzi cha Mungu;

³⁵ wala kwa nchi, kwa maana ndipo pa kuwekea miguu yake; wala kwa Yerusalemu, kwa maana ndio mji wa Mfalme mkuu.

³⁶Wala usiape kwa kichwa chako, maana huwezi kufanya unywele mmoja kuwa mweupe au mweusi.

³⁷ Bali maneno yenu yawe Ndiyo, ndiyo; Siyo, siyo; kwa kuwa yazidiyo hayo yatoka kwa yule mwovu.

³⁸ Mmesikia kwamba imenenwa, Jicho kwa jicho, na jino kwa jino;

³⁹ Lakini mimi nawaambia, Msishindane na mtu mwovu; lakini mtu akupigaye shavu la kulia, mgeuzie na la pili.

⁴⁰ Na mtu atakaye kukushitaki na kulichukua shati lako, mwachie na koti pia.

⁴¹Mtu yeyote akikulazimisha mwendo wa maili moja, nenda naye maili mbili.

⁴²Akuombaye, mpe; naye atakaye kukopa kwako, usimpe kisogo.

⁴³ Mmesikia kwamba imenenwa, Umpende jirani yako, na, Umchukie adui yako;

⁴⁴ lakini mimi nawaambia, Wapendeni adui zenu, waombeeni wanaowaudhi,

⁴⁵ ili mpate kuwa wana wa Baba yenu aliye mbinguni; maana yeye huwaangazia jua lake waovu na wema, huwanyeshea mvua wenye haki na wasio haki.

⁴⁶Maana mkiwapenda wanaowapenda ninyi mnapata thawabu gani? Hata watoza ushuru, je! Nao hawafanyi yayo hayo?

⁴⁷Tena mkiwaamkia ndugu zenu tu, mnatenda tendo gani la ziada? Hata watu wa mataifa, je! Nao hawafanyi sawa na hayo?

⁴⁸ Basi ninyi iweni wakamilifu, kama Baba yenu wa mbinguni alivyo mkamilifu.