Read kiswahili Marko 15 Bible Online

Marko 15 - kiswahili bible

Marko 15

¹ Mara kulipokuwa asubuhi wakuu wa makuhani walifanya shauri pamoja na wazee na waandishi na baraza nzima, wakamfunga Yesu, wakamchukua, wakamleta mbele ya Pilato.

² Pilato akamwuliza, Wewe ndiwe mfalme wa Wayahudi? Akajibu, akamwambia, Wewe wasema.

³Nao wakuu wa makuhani walikuwa wakimshitaki mambo mengi.

⁴Pilato akamwuliza tena akisema, Hujibu neno? Tazama ni mambo mangapi wanayokushitaki!

⁵ Wala Yesu hakujibu neno tena, hata Pilato akastaajabu.

⁶Basi wakati wa sikukuu huwafungulia mfungwa mmoja, wamwombaye.

⁷Palikuwa na mtu aitwaye Baraba, aliyefungwa pamoja na waasi, waliosababisha mauaji katika uhalifu huo.

⁸Makutano wakaja, wakaanza kuomba awafanyie kama vile alivyozoea.

⁹Pilato akawajibu, akisema, Je! Mnataka niwafungulie mfalme wa Wayahudi?

¹⁰ Kwa maana alitambua ya kuwa wakuu wa makuhani wamemtoa kwa husuda.

¹¹Lakini wakuu wa makuhani wakawachochea watu, kuwa afadhali awafungulie Baraba.

¹²Pilato akajibu tena akawaambia, Basi nimtendeje huyu mnayemnena kuwa ni mfalme wa Wayahudi?

¹³Wakapiga kelele tena, Msulubishe.

¹⁴Pilato akawaambia, Kwani ni ubaya gani alioutenda? Wakazidi sana kupiga kelele, Msulubishe.

¹⁵Pilato kwa kupenda kuwaridhisha watu, akawafungulia Baraba; akamtoa Yesu, baada ya kumpiga mijeledi, ili asulubiwe.

¹⁶Nao askari wakamchukua ndani ya behewa, ndiyo Praitorio (yaani, makao makuu ya mtawala), wakakusanya pamoja kikosi kizima.

¹⁷Wakamvika vazi la rangi ya zambarau, wakasokota taji la miiba, wakamtia kichwani;

¹⁸wakaanza kumsalimu, Salamu, Mfalme wa Wayahudi!

¹⁹Wakampiga mwanzi wa kichwa, wakamtemea mate, wakapiga magoti, wakamsujudia.

²⁰ Hata wakiisha kumdhihaki, wakamvua lile vazi la rangi ya zambarau, wakamvika mavazi yake mwenyewe; wakampeleka nje ili wamsulubishe.

²¹ Wakamshurutisha mtu aliyekuwa akipita, akitoka mashambani, Simoni Mkirene, baba yao Iskanda na Rufo, ili auchukue msalaba wake.

²²Wakamleta mpaka mahali paitwapo Golgotha, yaani, Fuvu la kichwa.

²³ Wakampa mvinyo iliyotiwa manemane, asiipokee.

²⁴ Wakamsulubisha, wakagawa mavazi yake, wakayapigia kura kila mtu atwae nini.

²⁵Basi ilikuwa saa tatu, nao wakamsulubisha.

²⁶Palikuwa na anwani ya mashitaka yake iliyoandikwa juu, MFALME WA WAYAHUDI.

²⁷Na pamoja naye walisulubisha wanyang'anyi wawili, mmoja mkono wake wa kulia na mmoja mkono wake wa kushoto. [

²⁸ Basi andiko likatimizwa linenalo, Alihesabiwa pamoja na waasi.]

²⁹ Nao waliokuwa wakipita njiani wakamtukana, wakitikisatikisa vichwa, wakisema, Ahaa! Wewe mwenye kulivunja hekalu na kulijenga katika siku tatu,

³⁰jiponye nafsi yako, ushuke msalabani.

³¹Kadhalika na wakuu wa makuhani wakamdhihaki wao kwa wao, pamoja na waandishi, wakisema, Aliponya wengine; hawezi kujiponya mwenyewe.

³² Kristo, mfalme wa Israeli, na ashuke sasa msalabani tupate kuona na kuamini. Hata wale waliosulubiwa pamoja naye wakamsuta.

³³ Na ilipokuwa saa sita, palikuwa na giza juu ya nchi yote, hadi saa tisa.

³⁴ Na saa tisa Yesu akapaza sauti yake kwa nguvu, Eloi, Eloi, lama sabakthani? Maana yake, Mungu wangu, Mungu wangu, mbona umeniacha?

³⁵Na baadhi yao waliosimama pale, walisema, Tazama, anamwita Eliya.

³⁶ Na mmoja akaenda mbio, akajaza sifongo siki, akaitia juu ya mwanzi, akamnywesha, akisema, Acheni, na tuone kwamba Eliya anakuja kumteremsha.

³⁷Naye Yesu akatoa sauti kuu, akakata roho.

³⁸ Pazia la hekalu likapasuka vipande viwili toka juu hadi chini.

³⁹Basi yule kamanda, aliyesimama hapo akimwelekea, alipoona ya kuwa alikata roho jinsi hii, akasema, Hakika mtu huyu alikuwa Mwana wa Mungu.

⁴⁰ Palikuwako na wanawake wakitazama kwa mbali; miongoni mwao alikuwemo Mariamu Magdalene, na Mariamu mama yao Yakobo mdogo na Yose, na Salome;

⁴¹hao ndio waliofuatana naye huko Galilaya, na kumtumikia; na wengine wengi waliopanda pamoja naye mpaka Yerusalemu.

⁴² Ilipofika wakati wa jioni, kwa sababu ni Maandalio, ndiyo siku iliyo kabla ya sabato,

⁴³akaenda Yusufu, mtu wa Arimathaya, mstahiki, mtu wa baraza ya mashauri, naye mwenyewe anautazamia ufalme wa Mungu; akafanya ujasiri, akaingia mbele ya Pilato akauomba mwili wake Yesu.

⁴⁴Lakini Pilato akastaajabu, kama amekwisha kufa. Akamwita yule kamanda, akamwuliza kwamba amekufa kitambo.

⁴⁵Hata alipokwisha kupata hakika kutoka kwa yule kamanda, alimpa Yusufu yule maiti.

⁴⁶Naye akanunua sanda ya kitani, akamteremsha, akamfungia ile sanda, akamweka katika kaburi lililochongwa mwambani; akavingirisha jiwe mbele ya mlango wa kaburi.

⁴⁷Nao Mariamu Magdalene na Mariamu mamaye Yose wakapatazama mahali alipowekwa.