Read kiswahili Marko 3 Bible Online

Marko 3 - kiswahili bible

Marko 3

¹⑫ Akaingia tena katika sinagogi; na palikuwako huko mtu mwenye mkono uliopooza;

²wakamvizia ili kuona kama atamponya siku ya sabato; wapate kumshitaki.

³Akamwambia yule mtu mwenye mkono uliopooza, Simama katikati.

⁴Akawauliza, Ni halali siku ya sabato kutenda mema, au kutenda mabaya? Kuponya roho au kuiua? Wakanyamaza.

⁵⑬ Akawakazia macho pande zote kwa hasira, akiona huzuni kwa ajili ya ugumu wa mioyo yao, akamwambia yule mtu, Nyosha mkono wako. Naye akaunyosha; mkono wake ukawa mzima tena.

⁶⑭ Mara wakatoka wale Mafarisayo, wakawa wakifanya shauri juu yake pamoja na Maherodi, jinsi ya kumwangamiza.

⁷⑮ Naye Yesu akajitenga, yeye na wanafunzi wake, akaenda baharini. Mkutano mkuu ukamfuata, kutoka Galilaya, na Yudea,

⁸⑯ na Yerusalemu, na Idumaya, na ng'ambo ya Yordani, na pande za Tiro na Sidoni, mkutano mkuu, waliposikia habari za mambo yote aliyokuwa akiyatenda, wakamwendea.

⁹⑰ Akawaambia wanafunzi wake ya kwamba mashua ndogo ikae karibu naye, kwa sababu ya mkutano, wasije wakamsonga.

¹⁰Maana aliponya wengi, hata wote waliokuwa na misiba wakamrukia wapate kumgusa.

¹¹⑱ Na pepo wachafu, kila walipomwona, walianguka mbele yake, wakalia wakisema, Wewe ndiwe Mwana wa Mungu.

¹²⑲ Akawakataza sana, wasimdhihirishe.

¹³⑳ Akapanda mlimani, akawaita aliowataka mwenyewe; wakamwendea.

¹⁴Akaweka watu kumi na wawili, wapate kuwa pamoja naye, na kwamba awatume kuhubiri,

¹⁵tena wawe na mamlaka ya kutoa pepo.

¹⁶ Akawaweka wale Kumi na Wawili; na Simoni akampa jina la Petro;

¹⁷ na Yakobo, mwana wa Zebedayo, na Yohana nduguye Yakobo, akawapa jina la Boanerge, maana yake, wana wa ngurumo;

¹⁸na Andrea, na Filipo, na Bartholomayo, na Mathayo, na Tomaso, na Yakobo wa Alfayo, na Thadayo, na Simoni Mkananayo,

¹⁹na Yuda Iskarioti, ndiye aliyemsaliti. Kisha akaingia nyumbani.

²⁰Mkutano wakakusanyika tena, hata wao wenyewe wasiweze hata kula mkate.

²¹ Jamaa zake walipopata habari wakatoka kwenda kumkamata; maana walisema, Amerukwa na akili.

²² Nao waandishi walioshuka kutoka Yerusalemu wakasema, Ana Beelzebuli, na, Kwa mkuu wa pepo huwatoa pepo.

²³Akawaita, akawaambia kwa mifano, Awezaje Shetani kumtoa Shetani?

²⁴Na ufalme ukifitinika juu ya nafsi yake, ufalme huo hauwezi kusimama;

²⁵na nyumba ikifitinika juu ya nafsi yake, nyumba hiyo haiwezi kusimama.

²⁶Na kama Shetani ameondoka juu ya nafsi yake, akafitinika, hawezi kusimama, bali huwa na kikomo.

²⁷Hawezi mtu kuingia ndani ya nyumba ya mtu mwenye nguvu, na kuviteka vitu vyake, asipomfunga kwanza yule mwenye nguvu; ndipo atakapoiteka nyumba yake.

²⁸Amin, nawaambia, Dhambi zote watasamehewa wanadamu, na kufuru zao watakazokufuru zote;

²⁹ bali mtu atakayemkufuru Roho Mtakatifu hana msamaha hata milele; ila atakuwa ana dhambi ya milele,

³⁰ kwa vile walivyosema, Ana pepo mchafu.

³¹ Wakaja mamaye na nduguze; wakasimama nje, wakatuma mtu kumwita.

³²Na makutano walikuwa wameketi, wakimzunguka, wakamwambia, Tazama, mama yako na ndugu zako wako nje, wanakutafuta.

³³Akawajibu, akisema, Mama yangu na ndugu zangu ni akina nani?

³⁴Akawatazama wale walioketi wakimzunguka pande zote, akasema, Tazama, mama yangu na ndugu zangu!

³⁵Kwa maana mtu yeyote atakayeyafanya mapenzi ya Mungu, huyo ndiye kaka yangu, na dada yangu, na mama yangu.