Read kiswahili Luka 3 Bible Online

Luka 3 - kiswahili bible

Luka 3

¹Mwaka wa kumi na tano wa kutawala kwake Kaisari Tiberio, Pontio Pilato alipokuwa mtawala wa Yudea, na Herode mfalme wa Galilaya, na Filipo, ndugu yake, mfalme wa Iturea na nchi ya Trakoniti, na Lisania mfalme wa Abilene,

²wakati wa ukuhani mkuu wa Anasi na Kayafa, neno la Mungu lilimfikia Yohana, mwana wa Zakaria, jangwani.

³ Akafika katika nchi yote iliyo karibu na Yordani, akihubiri ubatizo wa toba iletayo ondoleo la dhambi,

⁴ kama ilivyoandikwa katika kitabu cha maneno ya nabii Isaya; Sauti ya mtu aliaye nyikani, Itengenezeni njia ya Bwana, Yanyosheni mapito yake.

⁵Kila bonde litajazwa, Na kila mlima na kilima kitashushwa; Palipopindika patakuwa pamenyoka, Na palipoparuza patalainishwa;

⁶ Na wote wenye mwili watauona wokovu wa Mungu.

⁷ Basi, aliwaambia makutano ya wale waliomwendea ili awabatize, Enyi wazawa wa nyoka, ni nani aliyewaonya ninyi kuikimbia hasira itakayokuja?

⁸ Basi, toeni matunda yapatanayo na toba; wala msianze kusema mioyoni mwenu, Tunaye baba, ndiye Abrahamu; kwa maana nawaambia ya kwamba katika mawe haya Mungu aweza kumwinulia Abrahamu watoto.

⁹① Na sasa hivi shoka limekwisha kuwekwa kwenye mashina ya miti; basi kila mti usiozaa matunda mazuri hukatwa na kutupwa motoni.

¹⁰Makutano wakamwuliza, Tufanye nini basi?

¹¹Akawajibu akiwaambia, Mwenye kanzu mbili na ampe asiye na kanzu; na mwenye vyakula na afanye vivyo hivyo.

¹²② Watoza ushuru nao wakaja kubatizwa, wakamwuliza, Mwalimu, tufanye nini sisi?

¹³Akawaambia, Msitoze kitu zaidi kuliko mlivyoamriwa.

¹⁴Askari nao wakamwuliza, wakisema, Sisi nasi tufanye nini? Akawaambia, Msidhulumu mtu, wala msishitaki kwa uongo; tena mtosheke na mishahara yenu.

¹⁵③ Basi, watu walipokuwa wakingoja yatakayotokea, wote wakiwaza mioyoni mwao kuhusu Yohana, kama labda yeye ndiye Kristo,

¹⁶④ Yohana alijibu akawaambia wote, Kweli mimi nawabatiza kwa maji; lakini yuaja mtu mwenye nguvu kuliko mimi, ambaye mimi sistahili kuilegeza kamba ya viatu vyake; yeye atawabatiza kwa Roho Mtakatifu na kwa moto;

¹⁷ambaye ungo wake uko mkononi mwake, naye atausafisha sana uwanja wake wa kupuria, na kuikusanya ngano ghalani mwake, bali makapi atayateketeza kwa moto usiozimika.

¹⁸Basi, kwa maonyo mengine mengi aliwahubiria watu.

¹⁹⑤ Lakini mfalme Herode alipokaripiwa na yeye kwa ajili ya Herodia, mke wa nduguye, na maovu yote aliyoyafanya Herode,

²⁰aliongeza na hili juu ya yote, alimfunga Yohana gerezani.

²¹⑥ Ikawa, watu wote walipokwisha kubatizwa, na Yesu naye amebatizwa, naye anaomba, mbingu zilifunuka;

²²⑦ Roho Mtakatifu akashuka juu yake kwa mfano wa kiwiliwili, kama hua; sauti ikatoka mbinguni, Wewe ndiwe Mwanangu, mpendwa wangu; nimependezwa nawe.

²³⑧ Na Yesu mwenyewe, alipoanza kufundisha, alikuwa na umri wa miaka thelathini, akidhaniwa kuwa ni mwana wa Yusufu, wa Eli,⑩

²⁴wa Mathati, wa Lawi, wa Melki, wa Yana, wa Yusufu,

²⁵wa Matathia, wa Amosi, wa Nahumu, wa Esli, wa Nagai,

²⁶wa Maathi, wa Matathia, wa Semei, wa Yusufu, wa Yuda,

²⁷⑪ wa Yoana, wa Resa, wa Zerubabeli, wa Shealtieli, wa Neri,

²⁸wa Melki, wa Adi, wa Kosamu, wa Elmadamu, wa Eri,

²⁹wa Yoshua, wa Eliezeri, wa Yorimu, wa Mathati, wa Lawi,

³⁰wa Simeoni, wa Yuda, wa Yusufu, wa Yonamu, wa Eliakimu,

³¹⑫ wa Melea, wa Mena, wa Matatha, wa Nathani, wa Daudi,

³²⑬ wa Yese, wa Obedi, wa Boazi, wa Salmoni, wa Nashoni,

³³⑭ wa Aminadabu, wa Admini, wa Hesroni, wa Peresi, wa Yuda,

³⁴⑮ wa Yakobo, wa Isaka, wa Abrahamu, wa Tera, wa Nahori,

³⁵wa Serugi, wa Regau, wa Pelegi, wa Eberi, wa Sala,

³⁶⑯ wa Kenani, wa Arfaksadi, wa Shemu, wa Nuhu, wa Lameki,

³⁷wa Methusela, wa Henoko, wa Yaredi, wa Mahalaleli, wa Kenani,

³⁸⑰ wa Enoshi, wa Sethi, wa Adamu, wa Mungu.