Read kiswahili Kumbukumbu la Torati 14 Bible Online

Kumbukumbu la Torati 14 - kiswahili bible

Kumbukumbu la Torati 14

¹ Ninyi mmekuwa wana wa BWANA, Mungu wenu; msijitoje miili yenu, wala msifanye upaa katikati ya macho yenu kwa ajili ya aliyekufa.

² Kwa kuwa u taifa takatifu kwa BWANA, Mungu wako, na BWANA amekuchagua kuwa watu wake hasa, kuliko mataifa yote yaliyo juu ya uso wa nchi.

³ Usile kitu chochote kichukizacho.

⁴ Wanyama mtakaokula ni hawa ng'ombe, na kondoo, na mbuzi,

⁵kulungu, na paa, na kongoni, na mbuzi wa mwitu, na paa mweupe, na pofu, na mbuzi wa mlima;

⁶na kila mnyama aliyepasuliwa ukwato, ukapasuka ukwato wake zikawa mbili, naye ni mnyama mwenye kucheua akatafuna tena, katika wanyama wote, ndiye mnyama mtakayemla.

⁷Lakini, hawa msile katika wale wenye kucheua, na hao waliopasuliwa ukwato; ngamia, na sungura, na kwang'a, kwa kuwa hucheua, lakini hawakupasuliwa kwato, ni najisi kwenu;

⁸na nguruwe, kwa kuwa amepasuliwa ukwato lakini hacheui, huyu ni najisi kwenu msile nyama zao, wala mizoga yao msiiguse.

⁹Mtakula hawa katika wote walio majini; kila kilicho na mapezi na magamba mtakula;

¹⁰na kila kisichokuwa na mapezi na magamba msile; ni najisi kwenu.

¹¹Mna ruhusa kula katika ndege wote walio safi.

¹² Lakini hawa msiwale; tai, na furukombe, na kipungu;

¹³na kengewa, na kozi, na mwewe kwa aina zake;

¹⁴na kila kunguru kwa aina zake;

¹⁵na mbuni, na kirukanjia, na dudumizi, na kipanga kwa aina zake;

¹⁶na bundi, na mumbi, na bundi mkubwa;

¹⁷na mwari, na nderi, na mnandi;

¹⁸na membe, na koikoi, kwa aina zake; na hudihudi, na popo.

¹⁹Na wadudu wote watambaao wenye mabawa ni najisi kwenu; msiwale.

²⁰Mna ruhusa kula katika ndege wote walio safi.

²¹ Msile nyamafu yoyote; waweza kumpa mgeni aliye ndani ya malango yako, ili apate kula; au kumliza mtu wa mataifa; kwa kuwa wewe u taifa takatifu kwa BWANA, Mungu wako. Usimtokose mwana-mbuzi katika maziwa ya mamaye.

²² Usiache kutoa zaka ya fungu la kumi katika mavuno yote ya mbegu zako, yatokayo shamba mwaka baada ya mwaka.

²³ Nawe utakula mbele za BWANA, Mungu wako, mahali atakapochagua apakalishe jina lake, zaka ya nafaka zako, na divai yako, na mafuta yako, na wazaliwa wa kwanza wa makundi yako ya ng'ombe na ya kondoo; ili upate kujifunza kumcha BWANA, Mungu wako, daima.

²⁴ Na njia ikiwa ndefu mno nawe, usiweze kuzichukua kwa kuwa mahali ni mbali nawe mno atakapochagua BWANA, Mungu wako, apakalishe jina lake, hapo atakapokubarikia BWANA, Mungu wako;

²⁵ndipo uzibadili ziwe fedha, na kufunga zile fedha uende nazo mkononi mwako, hata mahali atakapochagua BWANA, Mungu wako;

²⁶na zile fedha zitumie kwa chochote itakachotamani roho yako, ng'ombe, au kondoo, au divai, au kileo, au roho yako itakacho kwako chochote; nawe utakula huko mbele za BWANA, Mungu wako; tena furahi, wewe na nyumba yako;

²⁷ na Mlawi aliye ndani ya malango yako usimwache, kwani hana fungu wala urithi pamoja nawe.

²⁸ Kila mwaka wa tatu, mwisho wake, toa fungu la kumi lote la mavuno yako ya mwaka huo, uliweke ndani ya malango yako;

²⁹ na Mlawi kwa kuwa hana fungu wala urithi pamoja nawe, na mgeni, na yatima, na mjane aliyefiliwa na mumewe, walio ndani ya malango yako, na waje wale na kushiba; ili kwamba BWANA, Mungu wako, akubarikie katika kazi yote ya mkono wako uifanyayo.