Read kiswahili Warumi 12 Bible Online

Warumi 12 - kiswahili bible

Warumi 12

¹ Basi, ndugu zangu, nawasihi, kwa huruma zake Mungu, itoeni miili yenu iwe dhabihu iliyo hai, takatifu, ya kumpendeza Mungu, ndiyo ibada yenu yenye maana.

² Wala msifuate kanuni za dunia hii; bali mgeuzwe kwa kufanywa upya nia zenu, mpate kujua hakika mapenzi ya Mungu yaliyo mema, ya kumpendeza, na ukamilifu.

³ Kwa maana kwa neema niliyopewa namwambia kila mtu aliyeko kwenu asinuie makuu kupita ilivyompasa kunuia; bali awe na nia ya kiasi, kama Mungu alivyomgawia kila mtu kiasi cha imani.

⁴ Kwa kuwa kama vile katika mwili mmoja tuna viungo vingi, wala viungo vyote havitendi kazi moja;

⁵ Vivyo hivyo na sisi tulio wengi tu mwili mmoja katika Kristo, na viungo, kila mmoja kwa mwenzake.

⁶ Basi kwa kuwa tuna karama zilizo mbalimbali, kwa kadiri ya neema tuliyopewa; ikiwa ni unabii, tutoe unabii kwa kadiri ya imani;

⁷ ikiwa ni huduma, tuwemo katika huduma yetu; mwenye kufundisha, katika kufundisha kwake;

⁸ mwenye kuonya, katika kuonya kwake; mwenye kukirimu, kwa moyo mweupe; msimamizi, na asimamie kwa bidii; anayerehemu, na arehemu kwa furaha.

⁹ Pendo na lisiwe na unafiki lichukieni lililo ovu, mkilishika lililo jema.

¹⁰ Kwa pendo la udugu, mpendane ninyi kwa ninyi; kwa heshima mkiwatanguliza wenzenu;

¹¹ kwa bidii, bila kulegea; mkiwa na juhudi katika roho zenu; mkimtumikia Bwana;

¹² kwa tumaini, mkifurahi; katika dhiki, mkisubiri; mkidumu katika kusali;

¹³ kwa mahitaji ya watakatifu, mkifuata ukarimu; katika kukaribisha wageni mkijitahidi.

¹⁴ Wabarikini wanaowaudhi; barikini, wala msilaani.

¹⁵ Furahini pamoja nao wafurahio; lieni pamoja nao waliao.

¹⁶ Mpatane nia zenu ninyi kwa ninyi. Msinuie yaliyo makuu, lakini mkubali kushughulishwa na mambo manyonge. Msiwe watu wa kujivunia akili.

¹⁷ Msimlipe mtu ovu kwa ovu. Angalieni yaliyo mema machoni pa watu wote.

¹⁸ Ikiwezekana, kwa upande wenu, mkae katika amani na watu wote.

¹⁹ Wapenzi, msijilipize kisasi, bali ipisheni ghadhabu ya Mungu; maana imeandikwa, Kisasi ni juu yangu mimi; mimi nitalipa, anena Bwana.

²⁰ Lakini, Adui yako akiwa na njaa, mlishe; akiwa na kiu, mnyweshe; maana ufanyapo hivyo, utampalia makaa ya moto kichwani pake.

²¹Usishindwe na ubaya, bali uushinde ubaya kwa wema.