Read kiswahili 1 Wathesalonike 5 Bible Online

1 Wathesalonike 5 - kiswahili bible

1 Wathesalonike 5

¹ Lakini, ndugu, kuhusu nyakati na majira, hamna haja niwaandikie.

² Maana ninyi wenyewe mnajua hakika ya kuwa siku ya Bwana yaja kama vile mwizi ajavyo usiku.

³ Wakati wasemapo, Kuna amani na salama, ndipo uharibifu uwajiapo kwa ghafla, kama vile uchungu umjiavyo mwenye mimba, wala hakika hawataokolewa.

⁴Bali ninyi, ndugu, hamko gizani, hata siku ile iwapate kama mwizi.

⁵ Kwa kuwa ninyi nyote mmekuwa wana wa nuru, na wana wa mchana; sisi si wa usiku, wala wa giza.

⁶Basi tusilale usingizi kama wengine, bali tukeshe, na kuwa na kiasi.

⁷Maana walalao usingizi hulala usiku, pia na walewao hulewa usiku.

⁸ Lakini sisi tulio wa mchana, tuwe na kiasi, hali tukijivika kifuani imani na upendo, na chapeo yetu iwe tumaini la wokovu.

⁹ Kwa kuwa Mungu hakutuweka ili tupate hasira yake, bali ili tupate wokovu, kwa Bwana wetu Yesu Kristo;

¹⁰ ambaye alikufa kwa ajili yetu, ili tuishi pamoja naye, iwe tunakesha au tunalala.

¹¹ Basi, farijianeni na kujengana kila mtu na mwenzake, hakika kama mnavyofanya.

¹² Lakini, ndugu, tunataka mwatambue wale wanaojitaabisha kwa ajili yenu, na kuwasimamia ninyi katika Bwana, na kuwaonyeni;

¹³mkawastahi sana katika upendo, kwa ajili ya kazi zao. Iweni na amani ninyi kwa ninyi.

¹⁴ Ndugu, tunawasihi, waonyeni wale wasiokaa kwa utaratibu; watieni moyo walio dhaifu; watieni nguvu wanyonge; vumilieni na watu wote.

¹⁵ Angalieni mtu awaye yote asimlipe mwenziwe mabaya kwa mabaya; bali siku zote lifuateni lililo jema, ninyi kwa ninyi na kwa watu wote.

¹⁶ Furahini siku zote;

¹⁷ ombeni bila kukoma;

¹⁸ shukuruni kwa kila jambo; maana hayo ni mapenzi ya Mungu kwenu katika Kristo Yesu.

¹⁹ Msimzimishe Roho;

²⁰msitweze unabii;

²¹ jaribuni mambo yote; lishikeni lililo jema;

²² jitengeni na ubaya wa kila namna.

²³ Mungu wa amani mwenyewe awatakase kabisa; nanyi nafsi zenu na roho zenu na miili yenu mhifadhiwe muwe kamili, bila lawama, wakati wa kuja kwake Bwana wetu Yesu Kristo.

²⁴ Yeye ni mwaminifu ambaye awaita, naye atafanya.

²⁵ Ndugu, tuombeeni.

²⁶ Wasalimieni ndugu wote kwa busu takatifu.

²⁷Nawaapisha kwa Bwana, ndugu wote wasomewe waraka huu.

²⁸Neema ya Bwana wetu Yesu Kristo na iwe pamoja nanyi.