Read kiswahili 2 Timotheo 4 Bible Online

2 Timotheo 4 - kiswahili bible

2 Timotheo 4

¹ Nakuagiza mbele za Mungu, na mbele za Kristo Yesu, atakayewahukumu walio hai na waliokufa; kwa kufunuliwa kwake na kwa ufalme wake;

² lihubiri neno, uwe tayari, wakati ukufaao na wakati usiokufaa, karipia, kemea, na kuonya kwa uvumilivu wote na mafundisho.

³ Maana utakuja wakati watakapoyakataa mafundisho yenye uzima; ila kwa kuzifuata nia zao wenyewe watajikusanyia waalimu wengi, watakaowaambia yale tu masikio yao yanataka kusikia;

⁴ nao watajiepusha wasisikie yaliyo kweli, na kuzigeukia hadithi za uongo.

⁵ Bali wewe, uwe mwenye kiasi katika mambo yote, vumilia mabaya, fanya kazi ya mhubiri wa Injili, timiza huduma yako kwa ukamilifu.

⁶ Kwa maana, mimi sasa namiminwa kama tambiko, na wakati wa kuondoka kwangu umefika.

⁷ Nimevipiga vita vilivyo vizuri, mwendo nimeumaliza, Imani nimeilinda;

⁸ baada ya hayo nimewekewa taji la haki, ambayo Bwana, mhukumu mwenye haki, atanipa siku ile; wala si mimi tu, bali na watu wote pia waliopenda kufunuliwa kwake.

⁹ Jitahidi uwezavyo kuja kwangu upesi.

¹⁰ Maana Dema aliniacha, akiupenda ulimwengu huu wa sasa, akasafiri kwenda Thesalonike; Kreske amekwenda Galatia; Tito amekwenda Dalmatia.

¹¹ Luka peke yake yupo hapa pamoja nami. Umtwae Marko, umlete pamoja nawe, maana anifaa kwa utumishi.

¹² Lakini Tikiko nilimtuma Efeso.

¹³ Lile joho nililoliacha kwa Karpo huko Troa, ujapo ulilete, na vile vitabu, hasa vile vya ngozi.

¹⁴ Iskanda, mfua shaba, alionesha ubaya mwingi kwangu; Bwana atamlipa kulingana na matendo yake.

¹⁵Nawe ujihadhari na huyo, kwa sababu aliyapinga sana maneno yetu.

¹⁶ Katika utetezi wangu wa kwanza hakuna mtu aliyesimama upande wangu, bali wote waliniacha; naomba wasihesabiwe hatia kwa jambo hilo.

¹⁷ Lakini Bwana alisimama pamoja nami akanitia nguvu, ili kwa kazi yangu ule ujumbe utangazwe kwa utimilifu, hata wasikie Mataifa yote; nami nikaokolewa kutoka kwa kinywa cha simba.

¹⁸Bwana ataniokoa na kila neno baya, na kunihifadhi hata nifike katika ufalme wake wa mbinguni. Utukufu una Yeye milele na milele. Amina.

¹⁹ Nisalimie Priska na Akila, na wale wa nyumbani mwa Onesiforo.

²⁰ Erasto alibaki Korintho. Trofimo nilimwacha huku Mileto, mgonjwa.

²¹Jitahidi uwezavyo kuja kabla ya majira ya baridi. Eubulo akusalimu, na Pude, na Lino, na Klaudia, na ndugu wote pia.

²²Bwana na awe pamoja na roho yako. Neema na iwe pamoja nanyi.